Genesis 16

Hagar se Ishmael nunga den

Abram ko nuwus Sarai wore kuriang bo me ilu tuam. Bare ko ura dungan imet bo Egypt ko mu arungak bagakaso, ko nup Hagar. Se Sarai Abram maonam, “Kari Biya ani atagu kaolam se ani kuriang bo me iluwem. Ni namar aninga ura saonga imet wore ilak anir se nu kuriang bo iluwok agi mu aninga.”

Se Abram ko nuwus Sarai ko kuring iluwam.
Se Sarai ko ura saonga imet Hagar mu Abram ko nuwus ko balu tuam. Abram Canaan ningi yar 10 bagakaso se munan umu kote aratam. Se Abram Hagar ilak aniwaram se Hagar tuagu aratam.

Se tom Hagar numi ikiam nu tuagu ago, mu nu Sarai supuling te aragakaso ale gomang maguwukaso.
Se Sarai Abram maonam, “Hagar aninga asupuling te aragoso mu nika ikup la! Ani agata imet imi ni kisem, bare nu aitak numi ikiso nu tuagu ago, se ani asupuling te aragoso. Kari Biya kota ni analak nanga tuterukko!”

Se Abram den koma balam, “Ikiko!” mam, “Hagar mu nika ura dungan imet. Mu ni nu bitarsam. Ni keta ka gemang te nu kumik te ikia aguwaya mu bitarko.”

Se Sarai Hagar ilak kagerakaso ale bita maguwukaso. Se nu naguram,
koma kariimet mena lage wonong Shur namaram mu te namaram ale yu mutim bo duap te daigam bagaram. Se Kari Biya ko engel kote aratam, ale iwita maonam, “Hagar,” mam, “ni Sarai ko ura imet, ni koma awuk bore te tairem ale awuk namarko ya?”

Se Hagar balam, “Ani Sarai, imet ani kote ura iluwasam, wore ko nguangerem ale naguwasam.”

Se Kari Biya ko engel balam, “Piler kote namar ale ko dungan ko am bagerko.” 10 Aking udagi balam, “Maingte ani nika taleng girigir balik se suen biya aratomonko, se kari bo nunga kaurokko me terong.”

11 Kari Biya ko engel aking balam,

“Tom katirta ni kuriang kari ilup, ale ko nup Ishmael meko.
Mu awuk, nika gemang ikup, ka niara mu Kaem arigam.
12 Bare nika kuriang mu donkey diwang iwita bagurukko.
Nu kariimet suen la arungak kagerurukko, se aking kariimet suen la nu ilak kagermonko.
Noko gue suwan arungak ninguru me daigokko.”
13 Se Hagar gomang ningi la iwita balam, “Kaem tom suen biya ani agarki lagoso, se aitak ani nu arigem.” Ale nu Kari Biya ko nup bo iwita beteram, “Ni El Roi, mu awuk, ni mel suen biya arigisam.” 14 Buta se Hebrew den te yu mutim umutang mu nuna balsan Beer-Lahai-Roi. Se yu mutim mu aitak am aniso, wonong Kadesh se Bered nunga kusumuri.

15 Se Hagar Abram ko kuriang kari ilu tuam se nup beteram Ishmael mam. 16 Tom mu te Abram ko yar 86.

Copyright information for `WSK