Genesis 17

Kari kumik guang batoga ko den

Abram 99 yar bagaram se Kari Biya kote aratam ale iwita maonam, “Ani Kaem Sokel Ago. Aninga agiring tom suen biya karo ale munan diram la bitarko. Se ani nikerak den kalem mu ko iki se balik se ka taleng girigir suen biya aratomonko.”

Se Abram tararam ale koma motam ali te kaparam.

Se Kaem nu maonam,
“Ani nikerak den iwita kalosam: ni kariimet motam suen biya nunga girigir aratuko. Se ka nip aitak Abram mena. Nika nip mu aitak Abraham, mu awuk, ani ni kariimet motam suen biya nononga girigir ni aratuko.
Gen 17:5 Nup Abraham mu ko nunguning Hebrew den te mu “kariimet motam suen biya nunga girigir”.
Ani balik se nika taleng girigir suen biya aratomon ale saki kari supuling bibiya ko aratomonko. Nuna suen biya aratomon ale motam kirker sanamomonko.

“Ani nikerak den imi kalosam mu nika taleng girigir udagi aratomon mu den imi eng tom suen biya nongote anirukko. Ani nika Kaem, se nika taleng girigir nunga Kaem tala. Se ali imi Canaan, ni aitak sor bo ko kari iwita te geragasam, mu ani lilim la ni kisek, ale ka taleng girigir udagi aratomon mu nungarikko, se ali mu tom suen biya nononga. Ale ani nunga Kaem bagirikko.”

Kaem Abraham aking maonam, “Ni se ka taleng girigir nina aninga den balsam imi karo tualko. Den mu iwita: nenenga kari suen biyala nunga nungumik guang batutumuralko. 11 Ninga kuriang kari iru bilangara mu nunga tom 8 mu te nunga nungumik guang suen la batutumuralko. Se ninga ura imet nunga kuriang kari ilusan mu se, ura dungan kari nina wonong awar te nunga diasan arungu taisan mu suen la nungumik guang batutumuralko. Umutang te kariimet ikimonko ani nengerak den nungem. 13 Nenenga kari suen biya nunga nungumik guang batutumuralko. Se aninga den nengerak kalem mu tom suen biya anirukko. 14 Bare kari bo kumik guang me bataguk, mu nu nina ningi me bagurukko. Mu nu den ani nengerak kalosam imi mu batagarso ale me karo tuso, se kaoral se tagi taukko.”

15 Ale Kaem Abraham maonam, “Aitak ni ka niwus me aru Sarai meko. Aitak noko nup Sarah. 16 Ani marak tuek se nu ka kuriang kari ilu kisokko. Ani marak tuek se nu kariimet motam suen biya nunga taleng girigir imet bagurukko. Se saki kari supuling bibiya ko aratomonko.”

17 Se Abraham tararam ale moke ali ningi kaparam, se gusi laga gomang ningi balam, “Awuk ta kari ko yar 100 mu kuriang aratu tuokko? Se Sarah ko yar 90 mu nu kuriang iluwokko terong i? Mena.” 18 Uwuta balam ale Kaem isuam, “Ishmael marak tui se aninga agiwim taukko,” mam.

19 Bare Kaem balam, “Mena. Nika niwus Sarah kuriang kari ilu kisok se ni nup bitar Isaac.
Gen 17:19 Nup Isaac mu ko nunguning Hebrew den te mu “nu gusiso”.
Ani den nikerak balem ale kalem mu aking nu ilak se ko taleng girigir arungu balik, se den mu tom suen biya anirukko.
20 Ni ani Ishmael marak tuekko aga isem. Mu ani marak tuekko, ale ko kuriang, numasari, taleng girigir suen biya tuekko. Nu ali sor bitaruwara ko supuling 12 nunga girigir aratukko. Ale ko taleng girigir balik se kasik biya nunguningkiri aratomonko. 21 Bare aninga den nikerak balem mu maingte ka namar Isaac se ko taleng girigir nongote anirukko. Se Sarah kuriang Isaac iluwokko mu, yar namake ko taiwoso mu ko sige bo te iluwokko.” 22 Kaem Abraham ilak munaka kutuwuram ale beteram namaram.

23 Se tom suwan mu te Abraham Kaem kuring kaoram ale ko namar Ishmael se, kari noko kawam te bilangaman mu se, kari sor awar te nunga diaram se taiman bagakasan, mu suen la nunga nungumik guang batutumu sapaman. 24 Abraham ko yar 99 baga se kumik guang batagorman. 25 Se ko kuriang Ishmael mu 13 yar se kumik guang batagorman. Nuna ilagala, se ura kari alo nongorak bagara, mu suen la tom suwanta mu te la nungumik guang batutumu sapaman.

26 

Copyright information for `WSK