Genesis 18

Kaem Sarah kuriang iluwokko balam

Udagi Kari Biya Abraham kote aratam, Mamre ko tam bibiya mu duap ningi. Worem kowar biya se Abraham ko kawam sel kuringi dagiwakaso. Ale nu loagaram kari ilagala suwan pingi sanami se animan mu nungarkam ale ko kawam sel beteram ale naguram nongote namaram ale nomoke dugu te tararam ale koma ali ningi kaparam. Ale balam, “O kari bibiya,” mam, “nina aninga kawam me kiaralko, ani ninga sangikko. Ani nenenga ura kari. Ani kari bo aurik se yu utuok ago tairuk se nisiwik te anuwalko. Nina tam imi bowa ningi neneman saparalko. Se ani namirik na sang, te sokel ningarik se udagi te barasal aking aolak iluwalko, mu giek ago tai ningarikko. Nina aninga kawam duap te taiman se ani ninga sangikko.”

Se nuna balman, “Mu terong. Balsam butata bitarko.”

Se Abraham tairatela kawam sel ningi namaram ale nuwus Sarah maonam, “Tairate plaua ningo owore to ale daro sang kaiko,” mam. Aking kota naguram bulmakau ningi namaram ale bo kumik ningo mu iluwam, ale ko ura kari tuam se nungam ale kaiyam. Bulmakau nunguning kaniram se Abraham giam ale bread, amin se ko minan ago giam ale kari ilagala suwan dagiman mu nungaram. Se nuna na nowakasan se Abraham nungumik duap te tam bowa ningi sanamiwakaso.

Na no kutuwuman, mu nuna Abraham isarman, “Nika niwus Sarah apalak bagoso ya?” maman.

Se Abraham balam, “Nu kawam sel ningi bagoso,” mam.

10 Se kari ilagala suwan taiman mu bo balam, “Yar namake ko taiwoso mu ko sige bo te ani pelerik tairik mu nika niwus kuriang kari iluwokkowo,” mam.

11 Se Sarah mu kari nukung buring ko kawam sel kuringi sanamiwa se den ikiwakaso. Abraham Sarah ilak garukaman nunguningkiri, ale Sarah kuriang iluwokko me terong. 12 Se gusiram ale gomang ningi la balam, “Ani garuk nunguningkiri, ale kuriang iluwekko me terong. Se aga agari betela garuk nunguningkiri. Se awuk ta ani den mu ko angamang ningi nunguning arukko?”

13 Se Kari Biya Abraham isuam, “Awuk se Sarah gusiram ale balam, ‘Ani garukerem pa’ mam, ‘ale awuk kuriang iluwekko owore ya?’ mam. 14 Se mel awuk bore ani Kari Biya betera me ikisam? Udagi sige 9 buring ko ani pelerik tairik se Sarah kuriang kari iluwokkowo.”

15 Se Sarah nguangaram ale kawelaram ale balam, “Ani me gusirem,” mam.

Bare Kari Biya balam, “Mena. Ni gusirem.”

Kari Biya Sodom wonong maguwurokko Abraham maonam

16 Kari ilagala suwan mu barasaman ale namakasan. Se Abraham arungak nama lage te nunga awurokko arungu namakaso. Se aolak ilu nama sanamaman, ale nomotam kaparam se sor Sodom mu aringiman.

17 Ale Kari Biya iwita ikia tam, “Ani mel bitirikko mu ko den Abraham koma te me kaluwurekko, am manik se ikiokko. 18 Mu noko taleng aratomon ale sokel ago la bagomonko. Ani nu te sor suen biya ko kariimet marak nungarikko. 19 Mu awuk, ani nu balem, ko kuriang, ko taleng girigir nunga manuk se aninga den karo tumon ale munan diram la betemonko. Se mel suen biya ani nu kumik te bitirikko balem mu bita sapirikko.”

20 Buta se Kari Biya Abraham maonam, “Sodom Gomorrah ningi munan duap duap memek nunguningkiri wore aratoso, se ko den suen biya aratoso. 21 Se ani nama kapirik arigekko, den ikiem mu nunguning agi kawel agi mu ko nama kapirik arigekko.”

22 Se engel ilagala nuna Kari Biya Abraham ilak nunga awu beteman ale aolak iluman Sodom namakasan. Bare Kari Biya mu Abraham ilak am bagakaso.

23 Se Abraham Kari Biya kote pingi kasu namaram ale isuam, “Kari Biya,” mam, “nunguningta ni kari ningo kari memek nunga biguwur menawurko e? 24 Se kari ningo 50 sor mu te bagomon se nungarki, mu ni sor mu ko kariimet am lilim la maguwur i? Se kari ningo nuam 50 nunga iki mu ni wonong me maguwurko agila? 25 Ni kari ningo kari memek biguwur ale nunga maguwurko mu me terong. Ni suwuta me bitarko. Ni buta bitar, mu kari ningo se memek mu memek tamonko. Suwuta mu me terong. Ni ali sor suen la ko Tutera Kari se diram la bitarko.”

26 Se Kari Biya den koma iwita balam, “Ani Sodom ningi kari ningo 50 nungarkik, mu ani kariimet suen la memek me nungarikko, se kari ningo mu ago memek me tamonko.”

27 Se aking Abraham balam, “O Kari Biya, ni aninga den suen biya mu ko gemang me magurukko. Ani kari yam, se den bo balikko mena. 28 Bare kari ningo nuam 50 mena, se 45, mu ni sor mu maguwur agi mena e?”

Se Kari Biya balam, “Ani kari ningo 45 arigek, mu ani sor me maguwurikko,” mam.

29 Se Abraham aking balam, “Bare kari ningo nuam 45 mena, se 40, mu ni sor mu maguwur agi mena e?”

Se Kari Biya balam, “Ani kari ningo 40 arigek, mu ani sor wonong me maguwurikkowo,” mam.

30 Se aking Abraham balam, “Kari Biya, ani aking den bo balik mu me ko gemang magurukko. Kari ningo 30 mu awuk me i?”

Se Kari Biya balam, “Ani kari ningo 30 nungarkik, mu ani sor wonong me maguwurikko.”

31 Se Abraham aking balam, “O Kari Biya, aninga den suen biya imi ni ko gemang me magurukko. Se kari ningo nuam 20, mu awuk me i?”

Se Kari Biya balam, “Kari ningo 20 arigek, mu ani sor wonong me maguwurikko,” mam.

32 Se Abraham aking balam, “O Kari Biya, ani den suwan bo balikko mu me ko gemang magurukko. Bare kari ningo 10 diram nungarki, mu awuk a?”

Se Kari Biya balam, “Ani kari ningo 10 bagomon se nungarkik, mu ani wonong sor me maguwurikkowo,” mam.
33 Kari Biya Abraham ilak munaka kutuwuram ale namaram. Se Abraham peleram ko sor te namaram.

Copyright information for `WSK