Genesis 20

Abraham Abimelech ilak nunga den

Abraham Mamre sor beteram ale Negev namaram, ale wonong ilagala Kadesh se Sur ko kusumuri bagakaso. Ale tom nu Gerar sor te baga se mu, nu ko nuwus Sarah mu noko koras mam. Se Gerar ko king Abimelech Sarah tairukko balam, se kari sang namaman ilak taiman se nukote bagakaso.

Bare turom bo te Kaem ipingira te Abimelech kote tairam ale maonam, “Imet sumu maingkala kuari ago bare ni taem. Buta se ni kuarko.”

Bare Abimelech Sarah kumik duap te me namakaso. Se nu balam, “Kari Biya, ani memek bo me beterem. Bare ni aninga kariimet ago aga bita maguwurko e? Abraham kota balam Sarah mu noko koras mam. Se Sarah betela balam Abraham mu noko koras mam. Se aninga ikia te nu nunguningta balam makasam, ale memek bo betesam iwita me ko ikikasam. Buta se ani memek bo me beterem.”

Se Kaem ipingira te nu maonam, “Mu ani ikiem, nika ikia te dirmam se beterem. Buta se ani nika ikia kalem se ni nukote me namakasam, ale amakete kilek memek me bitakasam. Se aitak kari mu ko nuwus sumu tuiko! Nu prophet, se ni ko ko ngatanguruk se me kuarko. Bare ni me tui, mu ani balik se ni ka kariimet suen la ago kueralko nunguningkiri.”

Se ukiram se tumong biyala Abimelech barasam ko kariimet nunga auram se taiman se mel aratam mu ko nunga maonam. Se nuna ninguru nguangakasan. Se Abimelech Abraham auram se kote tairam se isuam, “Ni awuk se ana nogo ko kilek suwuta beterem a?” mam. “Ani anape memek nikate beterem se ni ani aga kariimet ago ikup memek ewere nangarem? Kilek ni ana nangimik te beterem sumu me terong. 10 Ni anape ko beterem?”

11 Se Abraham den koma iwita balam, “Ani iwita ikiem, sor ewere ko kariimet Kaem ko me nguangasan i maem, ale aninga momon ale aninga aiwus nuna tamon wore ko ikikasam ale buta beterem. 12 Sarah mu nunguningta aninga agoras. Nu aninga ait ko nanawus. Anananga nainet duap suwanta, bare nu ko nuam ago kigilik, se aninga ayam ago kigilik tala. Se ani nu taem. 13 Se ulengkala ani aga ait ko kawam te bagakasam se Kaem ani sor sang te geragikko balam se ani Sarah iwita manem, ‘Ana sor saki te geraganakko mu ni munan ningo iwita ani ago ko bitar ale baluko ni aninga agoras ma baluko.’”

14 Se Abimelech Sarah beteram se Abraham kote peleram namaram. Ale nu sipsip bulmakau se, ura dungan kariimet sang ago Abraham tuam. 15 Ale maonam, “Arikko, ali imi lilim la aninga. Nika gemang koma aguwaya mu te bagerko mu am te bagerko.” 16 Ale Sarah maonam, “Ani manga silver 1000 ka koras tuem. Manga mu te den menarukko. Mu te nuna ikimon ni memek me beterem mamonko.”

Abimelech Sarah tam mu te Kari Biya Abimelech ko imet suen la nutagu kaolam se kuriang me ilukasan. Se Abraham Kaem ngatongam se Kaem Abimelech saongam, ale ko nuwus se ko ura dungan imet suen la nunga nutagu nungam, se aking kuriang ilumonko terong bagakasan.

17 

Copyright information for `WSK