Genesis 21

Sarah Isaac iluwam

Kari Biya maingkala balam uwutata Sarah saongam. Se Sarah tuagu aratam se kuriang iluwam, tom Kaem giram balu tuam borta te kuriang iluwam. Tom mu Abraham garukaram nunguningkiri. Se Abraham kuriang nup beteram Isaac mam. Udagi tom 8 namaram se Abraham Kaem balam butata ko kuriang Isaac kumik guang batogam. Abraham ko yar 100 se Sarah kuriang Isaac iluwam.

Se Sarah iwita balam, “Kaem ani angimik te munan ningo beteram, se ani ko amilmilasam ale gusisam! Se kariimet suen biya ikimon mu ani agarak amilmilomonko.” Ale Sarah aking balam, “Ulengkala kari bo ta Abraham manarukaso ale ‘nika niwus Sarah kuriang bo iluwok ale amin tuokko’ ma me balukaso. Bare Abraham garukaram nunguningkiri se ani ko kuriang amu ilu tuem.”

Abraham nu Hagar Ishmael nunga maonam se namaman

Se kuriang lagaram. Se tom nu amin beteram mu Abraham ko na biya bo beteram. Bare Sarah nu Egypt imet Hagar ko kuriang Abraham kumik te iluwam mu Isaac gusirukaso se arigam. 10 Ale Abraham maonam, “Ura saonga imet ko kuriang ilak nunga karoko!” mam. “Imet sumu ko kuriang nika mel sang me giokko. Mel suen biya imi mu aninga kuriang Isaac ko,” mam.

11 Bare Ishmael mu Abraham ko kuriang tala. Se Sarah den mu balam mu Abraham ikiam noman batagam. 12 Bare Kaem Abraham maonam, “Ni ura saonga imet Hagar ko kuriang ilak nunga me neman batagukko. Ni Sarah den balso mu karo tuiko. Mu awuk, noko kuriang Isaac te diram nunguningkiri nika kuriang nimas aratomonko.
Gen 21:12 Den imitang ago arikko: Gal 4:28-31; Rom 9:7.
13 Bare ani balik se nika ura saonga imet ko kuriang umu ko kuriang imas, ko taleng girigir suen biya tala aratomonko. Mu awuk, nu nika kuriang tala.”

14 Ukiram se tumong biyala Abraham na se yu bo ago patawu Hagar biwinang te awuram se giam. Ale ko kuriang ilak nunga kaoram se namakasan. Ale nama Beersheba koma kariimet me te anira mu te geragakasan.

15 Udagi te yu kuting ago giam mu menaram, se Hagar ko kuriang ilak nama tam gotek bo bowa ningi beteram se bagakaso. 16 Se nu nama awar nuam daigam ale ikia moakaso, se kuamin tugu laga balukaso, “Ani kuriang ari sagirik se kuerukko me ko kuesam,” makaso. Ale nu daigam baga kuriang niakaso se nu ago niakaso.

17 Se Kaem kuriang mu ko niara ikiam. Se ko engel duruk te baga se Hagar auram ale maonam, “Ni anape ko gemang batagoso? Me nguangerko! Kaem kuriang niaram mu ikiam. 18 Nama patawur se barasuk ale gomang kulukuru se kawus maukko. Ani balik se noko gue te ko taleng girigir suen biya aratomonko.”

19 Se Kaem Hagar motam dingumuram se yu mutim bo arigam, ale te namaram yu kuting te utuam ale sang karogo nama kuriang tuam se nam.

20 Kaem kuriang mu ilak bagaram se lagaram kari aram. Nu sor koma Paran masan, kariimet me te bagakasan mu te bagakaso, ale nu bulamara kari ningo nuam ko aratam. 21 Se ko nuam Egypt imet bo to tuam.

Abraham Abimelech ilak den nungurman

22 Tom mu te King Abimelech ko kager kari supuling Phicol ilak Abraham kote taiman ale iwita manorman, “Ni mel suen biya betesam mu Kaem nikerak bagoso. 23 Buta se ni Kaem koma te iwita baluko, ni ani agarak munan kawel bo me bitarko, ale aga kuriang arungu agi aga taleng girigir arungak me bitarko ma baluko. Ani munan ningo nikerak bitakasam. Buta se ni munan ningo tala ani agarak bitar ale ali sor te bagasam mu te ago bitarko.”

24 Se Abraham balam, “Ani butata bitirikko Kaem aninga den ikiwoso,” mam.

25 Asele Abraham ko yu mutim Abimelech ko kari iluman ale utu nokasan wore ko den Abimelech ilak balam. 26 Se Abimelech nu maonam, “Arikaya mel sumu bitakasan wore ani me ko ikisam. Ni ulengkala ani me aga manem. Aitakta diram ani ikiem.”

27 Se Abraham sipsip sang se bulmakau sang ago Abimelech tuam se nuna ilagala den nungurman. 28 Asele Abraham ko sipsip ningi sipsip gotek pagar 7 mu nunga giam ale kilimik nunga awuram. 29 Se Abimelech nu isuam, “Ni awuk se suwuta betesam a?” mam.

30 Se Abraham den koma balam, “Sipsip gotek 7 ani tutia beterem imi mu to ale mu te baluko, yu mutim Abraham nungam ma baluko.”

31 Nuna ilagala sor mu te den nungurman. Buta se sor mu ko nup beteman Beersheba maman.
Gen 21:31 Nup Beersheba ko nunguning mu iwita: “den nungurman ko yu mutim”.


32 Se Abimelech Phicol ilak peleman Philistia namaman. 33 Se Abraham Beersheba sor te tam tamarisk bo aguwam
Gen 21:33 Tam tamarisk mu sor garagarayam ko tam bo, kalel biya tarigiso ale tamarum yawara beteso. Ale ko yager du biya ali ningi namoso.
, ale Kari Biya tom suen biya bagoso mu ko nup patowaram.
Ale nu Philistia koma mu te tom maiya biya bagakaso.

34 

Copyright information for `WSK