Genesis 22

Kaem Abraham maonam, Isaac te tama bita aisuko mam

Udagi Kaem Abraham ira arigam. Ale auram ale maonam, “Abraham,” mam. Se Abraham balam, “Ani bagasam iweya.”

Se Kaem maonam, “Ni ka kuriang suwanta Isaac ni ninguru ko kuesam wore to ale ilak Moriah sor te namarko. Ale duruk ani balik mu te namar ale Isaac te tama bita ani aisuko,” mam.

Se ukiram turom biyala Abraham tam sang tama te bitirukko mu pakokaram ale ko donkey awete awuram. Ale ko kuriang Isaac, se ura kari ilagala ago nunga giam ale sor Kaem balam mu te aolak iluman namakasan. Ale tom ilagala suwan mu te Abraham sor mu arigam, mu awar nuam bagakaso se arigam. Ale noko ura kari ilagala mu iwita nunga maonam, “Nina ilagala imi te donkey ilak bagaral se ani kuriang ilak koma owore te namanak ale Kaem nup patowanakko, asele udagi te aking pelenak nengete tainakko,” mam.

Ale Abraham tam te tama bitirukko mu Isaac tuam se giam. Se Abraham tama batir ago giam. Ale nuna wete aolak iluman nama se Isaac nu nuet isuam, “Ba,” mam.

Se Abraham balam, “Kuriang, awuk a?”

Se Isaac balam, “Ani tama tam bo arigisam, bare sipsip te tama betenakko wore apoko ya?” mam.

Se Abraham den koma balam, “Kuriang,” mam, “Kaem kota sipsip arigok nangarukko,” mam. Ale wete aolak iluman namakasan.

Ale nuna ilagala nama kuwim Kaem balam mu te arataman, se Abraham mu te manga bolala awuram ale tam awete loangaram. Ale ko kuriang Isaac iluwam mayang te taliparam, ale patawu awete beteram. 10 Ale batir tam, te morukko negawaram se 11 Kari Biya ko engel duruk wonong te baga se auram, “Abraham! Abraham!” mam.

Se Abraham balam, “Ani bagasam iweya.”

12 Se Kari Biya ko engel nu maonam, “Nika kuriang me moarko. Ale ikia memek nu kumik te me bitarko. Nika kuriang suwanta, bare ni me guramem. Buta se ani ikisam, ni Kaem kuring karo tua ko kari.”

13 Se Abraham loagaram gurugam ale sipsip anumang bo, ko dinak tam kower kutiram mu bagaram se arigam. Ale namaram iluwam ago tairam ale kuriang kuwim te Kaem tama tuam. 14 Abraham sor umu nup beteram, “Kaem mel ani aisukko,” mam. Se aitak kariimet betela balsan, “Kari Biya ko duruk te mel nangarukko.”

15 Se Kari Biya ko engel akingtala Abraham auram ale maonam, 16 “Kari Biya iwita balam, ‘Ani agata aip te den nunguningta balsam,’ mam. ‘Ni ka kuriang suwanta sumu me guramem. Buta se ani marak ningo kisekko. 17 Nika taleng girigir ningo mena, taiti bowa ko baras aniso se langi saun aniso iwitatala aratomonko. Ale nuna nononga kager kari nunga kiamonko. 18 Se ani nika taleng girigir mu nungumik te ali likilim ko kariimet marak nungarikko. Mu awuk, ni aninga agiring karo tuem.’”

19 Se Abraham peleram ko ura kari ilagala nongote namaram ale nuna suen la peleman Beersheba namaman. Ale Abraham sor mu te bagakaso.

Nahor ko kuriang

20 Udagi te Abraham den ikiam, ko uria Nahor ko nuwus Milcah kuriang kari 8 nunga iluwam. 21 Se ko kuriang nunga nunup mu iwita: Uz mu laun, se uria Buz, se Kemuel, nu Aram ko nuet, 22 se Kesed, se Hazo, se Pildash, se Jidlaph, se Bethuel buta. 23 Bethuel mu Rebecca ko nuet. Abraham ko uria Nahor ko nuwus Milcah kuriang kari 8 umutang nunga iluwam. 24 Se Nahor ko nuwus uria mu ko nup Reumah, se ko kuriang kari nunga iluwam mu Tebah, Gaham, Tahash, se Maacah.

Copyright information for `WSK