Genesis 26

Isaac Gerar se Beersheba bagakaso

Karak tom bo akingtala kaparam, ulengkala Abraham ko tom te kaparam iwitatala. Se Isaac Gerar wonong te Philistia nunga king Abimelech kote namaram.

Kari Biya Isaac kote aratam ale iwita maonam, “Ni Egypt me namarko,” mam, “ni kuwim ani te ka manik mu te la bagerko. Ni imi te dagi bager asele ani nikerak baga se marak kisekko. Mu awuk, ani ali imitang ni ka taleng girigir arungak ningarikko. Ale den nika niet Abraham ilak balem mu me angamili sapurukko. Ani balik se nika taleng girigir suen biya taiti bowa ko baras iwitata aratomonko. Ale ali imi suen la nuna nungarikko. Se ka taleng girigir te ani ali lilim ko kariimet marak nungarikko. Mu awuk, Abraham aninga den suen la ikiam ale karo tuam.” Kari Biya uwutata balam. Buta se Isaac eng am Gerar daigam bagakaso.

Se sor mu te ko kari alo Rebecca ko isarukasan mu nu balukaso mu noko koras makaso. Nu baluk noko nuwus ma balukko bare nguangakaso. Nu ikikaso noko nuwus mauk, mu sor mu ko kari nu momon ale Rebecca tamonko. Mu awuk, Rebecca ko ariga yawarakala se.

Isaac sor mu te daigam kam maiya nuam te bagaram, se Philistia nunga king Abimelech ko kawam te baga se ko songkuring te motam kaparam se Isaac ko nuwus Rebecca iluwaram mu arigam. Ale nu Isaac auram ale maonam, “Sumu nika niwus,” mam. “Bare anape ko anananga kulem ale nika koras ma balem?”

Se Isaac balam, “Ani iwita ikia taem: ani balik aninga aiwus ma balik, mu aninga momon se kuerikko iwita ikiem.”

10 Se Abimelech akingtala balam, “Ni awuk se anananga maguwurko ago kaesam? Arikko, aninga kari suen biya anisan. Mu bo namaram nika niwus ilak aniram ale mu, ana ikup taman ale, bare mu nika memek beterem.” 11 Asele Abimelech den aora biya ko kariimet nunga maonam, “Kari bo kari imi nuwus ilak nungumik te memek bitiruk, mu nu kuerukko.”

12 Yar mu te na muguri Isaac aguwam mu nunguning yawarakala kaparam. Mu awuk, Kari Biya marak tuam se. 13 Isaac mel suen biya giam ale kari kumik mel suen biya nunguningkiri ko aratam. 14 Noko sipsip, ko bulmakau, ko ura kariimet suen biya. Se Philistia alo aringiman ale ko nongomang magaram. 15 Se yu mutim suen biya Abraham ko ura kari iman mu saguwu gilingiman.

16 Se Abimelech Isaac maonam, “Aitak ni anananga bitarko,” mam. “Ni sokel ago nunguningkiri. Ana nikerak me terong maman.”

17 Se Isaac nunga sor mu beteram ale namaram sor Gomeng Gerar makasan mu ningi bagakaso. 18 Sor mu te Abraham yu mutim saki ago nungam. Bare tom nu kueram mu Philistia yu mutim mu saguwu gilingiman. Se aitak Isaac aking iram, ale nunga nunup koma suwanta nuet te balam mu aking nu te balukaso.

19 Se sor mu te Isaac ko ura kari yu mutim bo tala iman, ale yu te aratuwaram se aringiman. 20 Bare Gerar wonong/sor ko bulmakau bitua kari mu Isaac ko bitua kari nunga ining nungarman, ale balman, “Yu imi mu anananga,” maman. Se Isaac yu mutim umu nup beteram “Esek” mam.
Gen 26:20-22 Nup Esek mu ko nunguning “ining”. Nup Sitna mu ko nunguning “ining biya”. Se nup Rehoboth mu ko nunguning “kuwim den kaola bo mena”.


21 Se aking Isaac ko ura kari yu mutim bo tala iman, bare umu ko agotala iningiman. Se Isaac yu mutim umu nup beteram “Sitna” mam. 22 Buta se Isaac awar nuam namaram ale aking yu mutim bo tala iram. Bare umu ko me iningiman. Se Isaac yu mutim umu nup beteram “Rehoboth” mam. Ale balam, “Aitak Kari Biya kuwim imi nangaram, se ana nangimik mel ago imi te am baganakko.”

23 Udagi Isaac sor mu beteram ale Beersheba namaram. 24 Ale turom mu te Kari Biya nukote aratam ale maonam, “Ani nika niet Abraham ko Kaem. Me nguangerko. Ani nikerak bagasam. Ani marak kisek se ka taleng girigir suen biya aratomonko. Mu awuk, aninga den maingkala aga ura kari Abraham ilak balem se aniso.”

25 Se Isaac tama bo mu te galaram ale Kari Biya nup patowaram. Ale mu te kuwim sor nungam, se ko ura kari yu mutim bo i gilingiman.

Isaac Abimelech ilak den nungurman

26 Se Abimelech Gerar wonong beteram ale Isaac arigokko Beersheba tairam. Ahuzzath mu nu ikia Abimelech tuokko kari, se Phicol mu ko kager kari nunga supuling. Nuna ilagala Abimelech ilak tai gilingiman.

27 Se Isaac nunga maonam, “Nina ulengkala ani ninga sor te bagerem se ining aisiman ale aga karoman. Se awuk se aningate taiman?”

28 Se nuna balman, “Aitak ana ikisan Kaem nikerak bagoso. Ale ana nikerak den nungurnakko. Ana ni me ka bita maguwuman. Buta se ana ni nangarak den nunguruko, ni ana me nanga moar, se ana ni me ka monakko. Ana kilek ningo nikate beteman. Tom ni anananga wonong beterem namakasam mu ana ni me ka moman, se ni gemang lila te ka beteman se tairem. Se aitak Kari Biya ni marak kisam.”

30 Se Isaac na yu biya bita nungaram se no gilingiman. 31 Tumong biyala barasaman ale kari suwan suwan iwita balukasan, “Nunguningta nunguning, ani nina nengerak tom suen biya nangamang suwanta baganakko,” maman. Asele Isaac amilmil nungaram, ale nuguting iluwam se nama gilingiman.

32 Se tom suwanta umutang te tala Isaac ko ura kari taiman ale manorman, “Ana yu mutim bo iwa yu aringiman!” 33 Se Isaac yu mutim umu nup beteram Shibah. Se aitak wonong mu eng ko nup Beersheba masan.
Gen 26:33 Nup Beersheba mu ko nunguning mu iwita: “den nungurman ko yu mutim”.


Esau ko imet

34 Esau ko yar 40 nu imet ko nup Judith mu tam. Judith mu Beeri, Heth kari, wore ko nanawus. Esau imet bo ago tam, ko nup Basemath, Heth kari bo tala ko nup Elon wore ko nanawus. 35 Se Isaac Rebecca ilak imet ilagala umu nunga munan ko ninguru nongomang magakaso.

Copyright information for `WSK