Genesis 27

Isaac Jacob marak tuam

Isaac garukaram ale motam posaram se mel arigokko me terong. Se ko namar laun Esau auram ale maonam, “Kuriang,” mam. Se Esau balam, “Ani bagasam iweya.”

Se Isaac balam, “Ani garukerem ale kuerikko tom pingi aram. Ka daga gatu gi ale giarum ningi namar ale mel ani naikko koma mu moar ago tair, ale na ani ninguru ko kuesam mu karogo kamir ale ago tair se ani naikko. Ani na mu naik ale marak kisekko. Asele udagi te ani kuerikko.”

Bare Isaac den Esau manaruwaram mu Rebecca ago ikiam. Ale tom Esau aratam giarum ningi mel balam mu arigokko namaram, mu Rebecca Jacob iwita maonam, “Jacob,” mam, “aitakta ani ka ba Esau iwita manaruwaram se ikiem, aitakta namuruk mel ningo naukko koma mu moruk ago tairuk ale kami tuok se nauk, asele Kari Biya koma te marak ningo tuokko balam, ale udagi te nu kuerukko balam. Se Jacob, ni aninga kuriang,” mam, “aninga den ninguru iki ale te bitarko. Namar ale kar ningi belelek borok ilagala moar ale ago tair, se ani kaiyik ale ka ba na nu ninguru ko kueso umu te kamirikko. 10 Se ni gi karogo nama tui se nauk asele ni marak kisokko, asele udagi nu kuerukko.”

11 Bare Jacob ko nuam Rebecca maonam, “Ni ikisam, Esau kumik mone gurum, se ani mu angimik mone mena. 12 Se aninga ba aninga iluwok ale aga ikiok bore ko! Nu uwuta bitiruk mu nu ikiok ani nu kulursam mauk ale aninga maguwura ko den Kari Biya manukko. Ale marak den me aga manukko.”

13 Bare ko nuam iwita balam, “Kuriang, ikup mu aratuk mu ani agata am giekko pa! Bare ani balem butata bitar ale namar belelek ilagala nunga moar ale nunga gi ago tairko.”

14 Se Jacob namaram belelek giam ale ago kote tairam. Se nu inang Jacob ko nuet ninguru ko kuakaso mu kamaram. 15 Ale Esau ko guang ningo nuam kawam te aniram mu giam ale Jacob tugu tuam. 16 Ale belelek guang ko kuting se ko dogotak te tugu tuam. 17 Ale na ningo nuam kamaram ale bread ago kaiyam mu gi Jacob tuam.

18 Se Jacob na giam ago ko nuet kote namaram ale auram, “Ba!” mam.

Se Isaac kuring iluwam ale balam, “Ni aninga kuriang ni awiri ya?”

19 Se Jacob balam, “Ani nika kuriang laun Esau i,” mam. “Ani ni aga manem butata beterem. Se bares ale na inang ani giem ale ago tairem mu no asele marak aisuko.”

20 Bare Isaac balam, “Aninga kuriang, ni awuk mel ani balem wore tairate arigem?”

Se Jacob balam, “Kari Biya nika Kaem wore aninga saongam se arigem.”

21 Se Isaac Jacob maonam, “Pingita utu tair se ani ka ilu arigekko. Nunguningta ni aninga kuriang laun Esau agi wore ko.”

22 Se Jacob ko nuet kote kasu namaram, se ilu arigam ale balam, “Ka munak ka degetak mu Jacob ko dogotak iwita. Bare ka kiting ani ilu arigem mu Esau ko,” mam. 23 Nu Jacob bare nu ninguru me ko ikikaso, mu awuk, noko kuting luan mone ago, Esau ko turan nu ilu arigam ale. 24 Se nu marak tuokko se aking isuam, “Nunguningta ni aninga kuriang Esau e?”

Se Jacob balam, “Se, mu anigita.”

25 Se Isaac balam, “Na inang sang to aisu se naik asele aga marak kisekko,” mam. Se Jacob gi tuam ale yu waen sang ago gi tuam. 26 Se Isaac nam asele balam, “Aninga kuriang, pingi tair ale aga yasirko,” mam.

27 Se Jacob kote pingi namaram yasaram, se Isaac Jacob melmasak awuram mu siring ikiam ale marak tuam. Ale balam,

“Kuriang, nika kimik siring mu ningam bo Kari Biya marak tuam wore ko siring yawara iwita.
28 Ka ningam suen la Kari Biya yu lawung yawara tuok,
se inang suen la ningo aratomonko, wheat suen la se yu waen suen la.
29 Se wonong kasik la ko kari mu nika ura kari ko aratomonko,
kariimet motam suen la nika bowa ningi la bagomonko.
Ale nika gue suwan nunga bitaruko,
ka niam ko kuriang, imas, taleng girigir, mu nika bowa ningi la bagomonko.
Kariimet ni memek toko den balmon, mu memek tamonko.
Se kariimet ni marak toko den balmon, mu marak ningo tamonko.”

Esau ko nuet am marak tuokko ilak wosengam

30 Isaac Jacob marak tuam, se Jacob nu beteram. Se tom umu te la Esau giarum ningi lagaram mu tai aratam. 31 Mu nu betela na ningo nungam ale giam ago ko nuet kote tairam. Ale balam, “Ba,” mam, “bares ale na ani ago tairem ewere no ale ka marak ani aisuko.”

32 Se Isaac isuam, “Ni awiri ya?”

Se Esau balam, “Ani Esau, nika kuriang laun.”

33 Se Isaac ninguru biririkiram, ale barawara makaso ale isuam, “Bare awiri mel bo moram ale kaiyam giam ago tai aisam se ani naem se ni tairem? Se ani aga marak ningo kari mu tuem, se marak ningo mu tom suen biya nukote anirukko!”

34 Se Esau den mu ikiam ale ninguru niakaso. Ale balam, “Ba, ani ago nika marak aisuko!” mam.

35 Se Isaac balam, “Nika uria tairam ale aga kulam ale nika marak tam.”

36 Se Esau balam, “Noko nup Jacob
Gen 27:36 Genesis 25:26 ago arikko.
mu diram, nu kawel kari! Nu tom ilagala aga kulam! Ani kari laun, bare nu aga kulam ale nu kari laun iwita aratam. Aking aitak aga marak ningo tere nam. Se ba, awuk a? Marak ningo butata, agi aninga bo ago agi mu aisuko.”

37 Bare Isaac Esau ko den koma iwita balam, “Ani maingkala balem nu nenenga supuling maem, se noko gue suwan suen la mu noko ura kari maem. Ani wheat nunguning se yu waen maingkala tuem. Mel ito ni kisekko mu me aniso.”

38 Bare Esau ko nuet am isaru diruwuwakaso, “Ba, nikate marak yawara suwanta diram aniram e? Ba, ani ago marak aisuko!” Esau uwuta balam ale biyala niakaso.

39 Se Isaac nu maonam,

“Ka ali ningo nuam mena.
Yu lawung bo nika ali te me kapurukko.
40 Ni daong kager te na yu arikko,
aking kager te tala ka daiga kuwim arikko.
Ale nika uria bowa ningi ko ura kari bagerko.
Bare udagi te ni noko kuring karoko gagorer ale
kuring bataguru ale nagurko.”

Jacob Laban kote namaram

41 Se Esau marak ningo ko nuet ko uria Jacob tuam wore ko ninguru gomang magakaso. Se balam, “Aninga ba kuerukko tom pingi aram. Se naneman magara menaruk, mu ani Jacob morik se kuerukko,” mam.

42 Bare kari sang Esau den balam mu ikiman ale Rebecca manorman, se nu Jacob auram ale maonam, “Ninguru ikiko!” mam. “Esau ni ko marak ningo taem bore ko ka morukko baluwoso. 43 Se kuriang, aitak ani balik butata bitarko. Ni nagur namar ale ka nie, aninga agoras Laban ilak Haran wonong te bagerko. 44 Ka laun ko gomang yaman menaruk se nu mel ni noko kumik te beterem mu kuamili sapuruk, asele piler tairko mu den bitirikko. Ani tom suwanta te nina aga kuriang ilagala memek tal ale aninga beteralko me kuesam.”
Gen 27:44-45 Esau: Gen 25:29-34; 36:8; Hebrews 12:16-17.


46 Udagi te Rebecca iwita Isaac maonam, “Ani Esau ko nuwus ari Heth imet imi mu nunga angimik gagorso. Se Jacob Heth imet nunga bo me ta taukko. E bo tauk, mu ani am kua namirikko!”

Copyright information for `WSK