Genesis 28

Se Isaac Jacob auram se tairam, se marak tuam ale maonam, “Ni Canaan imet bo me toko,” mam. “Ni nimi nunguru ale ka niam ko nuet Bethuel kote Mesopotamia namar ale ka niam ko koras Laban mu ko nanawus bo toko. Se Kaem Sokel Karogo mu marak kisok se ka kuriang suen biya aratomonko. Umu te ni kariimet suen biya nunga nonet bagerko. Kaem Abraham marak tuam iwitatala, ni ka kuriang, ka taleng girigir ago marak ningarukkowo. Se ali aitak ni kari awar taira iwita te bagasam sumu ni toko. Ali imi mu Kaem maingkala Abraham tuam.”

Isaac uwuta balam ale Jacob beteram se Aram kari Bethuel ko namar Laban kote Mesopotamia namaram. Laban mu nu Esau Jacob ilak nunga nunam Rebecca ko koras.

Esau imet bo agotala tam

Isaac Jacob marak tuam, ale imet bo taukko Mesopotamia namurukko maonam. Se Esau den mu ikiam. Ale Isaac Jacob marak tui se Canaan imet bo me taukko maonam mu ko den ago ikiam. Ale nu ikiam, Jacob ko nuamnuet nuguring karo tuam ale Mesopotamia namaram. Se Esau iwita ikikaso, noko nuet Isaac mu Canaan imet munan betesan mu nu me ko kueso makaso. Ale nu nongotak Abraham ko namar bo Ishmael mu kote namaram, ale ko nanawus Mahalath, Nebaioth ko koras, mu auwam. Nu imet ilagala maingkala arungu bagakaso, bare umu agotala tam.

Jacob Bethel aniwa ipingiram

10 Jacob Beersheba beteram ale barasam Haran namakaso. 11 Nama sor turom batagam se sor mu te aniram. Nu manga bo tam, supuling te beteram ale aniwaram. 12 Tom nu aniwa mu ipingiram ale titeng bo, ko duap aliti se kopa duruk wonong te nama tarigiram mu arigam. Se Kaem ko engel te tarigi kapawakasan.

13 Se Kari Biya tairam Jacob beta duap te sanamaram ale maonam, “Ani Kari Biya, nika nengetak Abraham ko Kaem, se ka niet Isaac ko Kaem. Se ali ni aitakta te aniwasam imi mu ani ka taleng girigir nungarikko. 14 Nuna saun iwita suen biya aratomonko. Ale nuna ali suen la to sapomonko. Se ni te, se ka taleng girigir te, ali ko kariimet suen la marak tamonko. 15 Ani nikerak baga se sor aguwaya ni te namar mu ani ka sinar taikko. Ale aking kerak pelerik sor imi te tairikko. Ani me ka bitirikko, nama mel suen biya ani balem mu aratu sapurukko.”

16 Se Jacob aniwa barasam, ale balam, “Mu nunguningta, Kari Biya sor imi te bagoso, bare ani me ko ikiem.” 17 Ale nu nguangakaso ale balam, “Ani sor imi ko ninguru nguangasam pa! Imi Kaem ko kawam nunguning se duruk wonong ko songkuring!”

18 Ale Jacob tumong biyala barasam, ale manga supuling te beteram ale aniram mu patowaram ale baongam, ale olive gureng awete waram. 19 Ale sor mu balam “Bethel” mam.
Gen 28:19 Nup Bethel mu ko nunguning mu “Kaem ko kawam”.
Ulengkala kariimet balukasan Luz wonong makasan.

20 Ale Jacob iwita Kaem ilak den nungam, “Kari Biya, ni ani lage maiya biya karowasam imi te aga sinar to ale na aisu, se guang nagurikko mu aisu, 21 se ani yawarakala nama aga ait ko wonong te aratik, mu ni aninga Kaem ko bagerko,” mam. 22 “Se manga ani sor imi te bangaru beterem mu ko ikia mu kuwim nika nip te patawomonko. Se mel suen biya ni ani aisu, mu ani pagik bilik 10 awurek, ale bo ni kisek ale ani 9 giekko.”

Copyright information for `WSK