Genesis 30

Leah kuriang kari 4 nunga iluwam. Bare Rachel mu kuriang bo me ilukaso, ale ko laun Leah ko gomang magakaso. Se nu Jacob maonam, “Ni kuriang ani aisuko! Mena, mu ani kuerikkowo!”

Se Jacob Rachel ko gomang magaram se balam, “Ani Kaem me kiarikko! Nu kota ni tagu kaolam se ni kuriang me ilusam.”

Se Rachel balam, “Ni aninga ura imet Bilhah to ale ilak anir se tuagu aratukko. Se kuriang bo ilu ani aisukko. Se umu te ani kuriang nunga nunam arikko.”

Asele Rachel ko ura imet Bilhah maonam se Jacob kote namaram se ilak aniram. Se tuagu aratam ale Jacob ko kuriang kari ilu tuam. Se Rachel balam, “Kaem aninga ngatangara ikiam ale aga saongam ale kuriang kari aisam.” Ale kuriang nup beteram Dan mam.
Gen 30:6 Nup Dan mu ko nunguning mu “Kaem aninga saongam.”
Bilhah akingtala tuagu aratam ale Jacob ko kuriang kari bo tala ilu tuam. Se Rachel balam, “Aninga laun ilak ninguru kagererem ale aitak ani nu kiarem.” Ale kuriang mu ko nup Naphtali beteram.
Gen 30:8 Nup Naphtali mu ko nunguning mu “ani kagererem”.


Leah kuriang bo me ilukaso, ale numi ikiam, ale ko ura imet Zilpah to ko kuari Jacob tuam, ko imet arukko. 10 Se Zilpah Jacob ko kuriang kari ilu tuam. 11 Se Leah balam, “Ani ago ko mel yawarakala beteram.” Ale kuriang nup Gad beteram.
Gen 30:11 Nup Gad mu ko nunguning mu “yawarakala”.
12 Udagi Leah ko ura imet Zilpah ko kuriang kari bo tala iluwam. 13 Se Leah balam, “Aitak ani ninguru amilmilasam! Se imet suen la aga balmon ani amilmil biyala betesam mamonko.” Ale kuriang nup Asher mam.
Gen 30:13 Nup Asher mu ko nunguning mu “amilmil”.


14 Wheat nunguning gia ko kam te Reuben ningam ningi namaram, ale tam muguri sang “mandrake” masan mu arigam,
Gen 30:14 Tam umu muguri giam mu nuna ikikasan mu namon kuriang te ilumonko iwitata ikikasan.
ale giam karogo tairam ko nuam Leah tuam. Se Rachel Leah maonam, “Ka kuriang tam muguri giam wore sang aisuko,” mam.
15 Bare Leah balam, “Ni aninga agari taem mu me terong mam se tairem aninga kuriang mel arigam mu ko ngatangorsam a?”

Se Rachel balam, “Nika kuriang ko tam muguri sumu sang aisu mu asele aitakta turom Jacob ilak anirko,” mam.

16 Se bainga ningi Jacob ningam ningi laga peleram tairam, se Leah arigokko namaram ale balam, “Aitak turom imi te ni ani agarak anirko,” mam. “Ani maingkala aga kuriang ko tam muguri te ka diarem.” Asele turom mu te Jacob ilak aniram. 17 Se Kaem Leah ko ngatangara ikiam ale kuring iluwam se Leah tuagu aratam. Ale Jacob kuriang kari 5 mu ilu tuam. 18 Ale balam, “Ani aga ura imet aga agari tuem se Kaem koma yawara aisam.” Ale kuriang nup Issachar beteram.
Gen 30:18 Nup Issachar mu ko nunguning mu “munan betera ko koma yawara”.
19 Leah akingtala tuagu aratam ale kuriang 6 kari tala iluwam. 20 Ale balam, “Kaem munan ningo ani aisam. Se aitak aninga agari ani ninguru aga kuerukko, mu awuk, ani ko kuriang kari 6 nunga iluwem.” Ale kuriang nup Zebulun beteram.
Gen 30:20 Nup Zebulum mu ko nunguning mu “munan ningo”.
21 Se udagi Leah kuriang imet iluwam, ale nup Dinah beteram.

22 Se udagi Kaem Rachel ko kuamin tugumam ale ko ngatangara ikiam ale saongam se kuriang iluwokko terong. 23 Se Rachel tuagu aratam se kuriang kari iluwam. Ale balam, “Kaem aninga dolara menawuram. 24 Se aninga angamang udagi Kari Biya kuriang bo ago aisukko.” Ale nup beteram Joseph mam.
Gen 30:24 Nup Joseph mu ko nunguning mu “bo ago tuokko”.


Jacob ko belelek se sipsip

25-26 Rachel Joseph iluwam, se Jacob Laban maonam, “Ani imet kuriang nunga diarikko ura kowar taem. Se nunga awur se pelenak aninga sor te namanakko. Mu ni ikisam, ani ni ninguru ka sangem.”

27 Bare Laban Jacob maonam, “Ikiko,” mam. “Ani den bo ka manikko. Ani ikiem, ni agarak bagasam mu ko Kari Biya ani marak aisam. Buta se me namarko, ani agarak am bagerko. 28 Nika ura koma awilaya toko mu diram aga manaru asele kisekko.”

29 Se Jacob nu maonam, “Ni keta ani ura iluwem mu ko ikisam. Ale ni ikisam ani ka sipsip se mel suen biya ninguru nunga bituem. 30 Ulengkala mu nika sipsip mel suen biya uwuta mena. Bare aitak ani nikerak bagasam umu te Kari Biya marak kisam se suen biya arataman. Ani tom awuk bore te agata aga kuriang imet nunga ura iluwekko ya?”

31 Se Laban Jacob isuam, “Ani anape te ka diarikko?” mam.

Se Jacob balam, “Ani manga ko me isesam. Bare ni aninga den ko kuar mu asele ani ka sipsip ka belelek aking bituekko.
32 Aninga den mu iwita: Ani nika sipsip belelek ninguru nungarkik ale sipsip gotek kaetam, se belelek kumik tom kulukumura mu ago nunga giekko. Umutang aninga ura koma.
Genesis 30:32 Sor Jacob te bagakaso mu te sipsip se belelek suen biya mu nunga nungumik am siraram se kaetam la. Nup Laban mu ko nunguning mu “siraram”.
33 Se udagi te ni keta arik ani munan diram beterem agi mu arikko. Mu awuk, tom ni tai sipsip belelek nunga kar ningi, se aninga kar ningi sipsip siraram bo, agi belelek kaetam likilim agi siraram likilim agi mu bo arik, mu ni tairate iki mu nika bare ani tere taem iwita ko ikiko.”

34 Se Laban balam, “Mu terong. Ni balem butata betenakko.”

35 Bare tom suwanta umutang te la Laban kawel bo beteram, ale belelek kari se imet nungumik tom kulukumura mu nunga giam, ale sipsip kaetam mu nunga giam, ale ko kuriang kari nunga bitarmonko nungaram ale arungu namakaso. 36 Se nuna suen la tom ilagala suwan aolak iluman awar biya namaman ale sor bo te bagakasan. Se Jacob mu Laban ko sipsip siraram likilim agi kaetam likilim wore nunga bitaruwakaso.

37 Bare Jacob tam duap duap ko kower marak wore giam, ale guang maiya la naung naung wasaram, se tom siraram maramarak mu aratu namaman. 38 Ale tam umu belelek nunga kuwim te yu nokasan mu te bangaru bangaru ago namaram. Mu nu ikiam, tom belelek yu namonko aratomon tai bolala awumon, mu kari mu pagar mu te nunga aragomonko. 39 Butata se tom belelek kari taikasan pagar mu te nunga aragakasan, mu nuna tam umu arikasan. Se udagi sipsip belelek pagar mu kuriang ilukasan, mu nungumik tom kulukumura ago.

40 Se Jacob sipsip nunga gikaso, kuwim kigilik te nunga awukaso. Ale nongoma gurugu Laban ko belelek nungumik tom kulukumura se nungumik kaetam wore nongote bitakaso. Nu butata bitakaso. Se sipsip pagar mu sipsip gotek kaetam wore nunga ilukasan. Se nu kota ko sipsip belelek suen kelagam, se Laban ko mu arungu me bolala awuram.

41 Se tom belelek sokel ago wore nunumi awete aragakasan, mu Jacob tam kower kuwim nuna te yu nana mu te bangarukaso, se arikasan ale nunumi awete aragakasan. 42 Bare belelek nosokel mena, mu nu tam kower nunga nomokete me bitakaso. Se munan umutang te belelek nosokel mena mu Laban ko, se ningo nuam sokel ago mu Jacob ko.

43 Se mu te Jacob kumik mel gemaram. Nu ko ura kariimet, se sipsip, belelek, camel, donkey kasik biya.

Copyright information for `WSK