Genesis 32

Jacob Esau arigokko pingi aram

Jacob ago sor mu beteram ale aolak iluwam namawaram se Kaem ko engel lage te kote arataman. Se nu nungarkam ale balam, “Kuwim imi Kaem ko kager kari te biguwusan bo!” mam. Umutang nu sor mu nup beteram Mahanaim mam.
Gen 32:2 Nup Mahanaim mu ko nunguning mu “kuwim ilagala nungurman ale te bagaman”.


Ale Jacob ko ura kari sang nunga maonam, se den ago girimon, ko laun Esau kote, ko sor te Seir namomonko balam. Seir ko nup bo Edom. Ale den Esau manarmonko mu ago nunga kausam, ale balam, “Iwita aga biya Esau maonalko, ‘Nika ura dungan kari Jacob iwita balso: Ani Laban ilak baga laga pelerem taiwasam. Aga bulmakau, donkey, sipsip, belelek, se aga ura kariimet karogo arungak taiwasam. Ale ani den imi ni aninga laun ikiko beterem, aninga angamang ni ani ago ko gemang nungeruk se ani tairikko terong mu balu asele ani tairikko.’”

Se kari den ago Esau kote namaman, ale den koma taman ago peleman taiman Jacob manorman, “Ana nika laun Esau kote nama arataman. Se noko kari 400 nunga giam ale maingkala ni karkomonko taiwasan.”

Se Jacob den mu ikiam ale ninguru nguangakaso, ale ikia moakaso. Se nu ko kariimet, ko bulmakau, camel, sipsip, belelek, donkey, pagaru motam ilagala awuram. Nu ikikaso, “Esau tairuk motam gira nunga moruk agi mu, motam udagi mu nagumonko terong agila.”

Ale Jacob ngatangaram ale balam, “Aninga angatak Abraham ko Kaem, se aga ait Isaac ko Kaem, agiring ikiko! O Kari Biya, ni aninga manem ani pelerik aga sor te aga launuria ningi tairikko balem, ni ani ninguru aga sinar toko balem. 10 Ani kari yam, nika ura dungan kari, bare ni gemang aisem, ale kilek ningo la agate beterem. Tom ani aga wonong duap beterem ale yu Jordan kiarem, mu ani mel bo angimik te me iluwem. Ani sikir te aolak iluwekko wore la iluwem. Bare aitak ani pelesam mu mel suen biya, motam bibiya ilagala. 11 Se ani nika ngatangorsam, ni aninga sangaru, aga laun Esau ko kager kari ago nunga ningi nanga bataguru toko. Ani nguangasam, nu tairuk ana suen la, kuriang imet ago nanga moruk maguwurok bore ko ninguru nguangasam. 12 Nika den ani agarak balem wore ko ikia toko. Ni balem ni aninga ninguru sinar to ale kuriang, imas, taleng girigir suen biya ani aisuko balem. Se kari kaumonko me terong maukko, nuna langi saun aniso iwita suen biya aratomonko balem.”

13 Ale turom Jacob sor mu te baga ukiram se mel sang ko laun Esau munan tuokko mu nunga tuteram: 14 belelek pagar 200 se belelek kari 20, se sipsip pagar 200 se sipsip kari 20, 15 se camel gotek ago mu 30, se bulmakau pagar 40 se bulmakau kari 10, se donkey pagar 20 se donkey kari 10. 16 Nu uwutata beteram asele ura kari nunga paogam, ale nunga tuteram mel paogam mu nunga bitarmonko nunga awuram. Ale nu nunga maonam, “Nina giral se ani negowom karikko. Se melmasak mu motam kirker animonko.”

17 Ale ura kari girok namurukko mu maonam, “Tom aninga laun Esau lage te ni karkuk ale ka isok, ‘Ni awiri ko ura kari ya?’ mauk, ale ‘Aparete namasam a?’ mauk, ale ‘Melmasak imi awiri ko ya?’ mauk, 18 mu ni iwita baluko, ‘Mel suen la imi mu nika ura kari Jacob ko munan noko kari biya nikate beteram se ani ago taiwasam. Se Jacob kota mu udagi taiwoso,’ iwita baluko.”

19 Se Jacob den koma suwanta umutang la ko ura kari mel bitarmonko mu nungaru saparam. Ale nunga maonam, “Tom nina lage te Esau arigal mu den suwanta umutang la nu maonalko. 20 Ale den ‘Nika ura kari Jacob udagi taiwoso’ mu maonalko mu ningamili me sapurukko,” mam. Mu Jacob iwita kuamin tugukaso, “Ani munan imi te aga laun gomang lila awurekko agila. Se nu ani agarkuk, bare memek ani ulengkala nu kumik te beterem mu ko kuamili sapurukko.” 21 Buta se Jacob ko munan laun Esau ko beteram mu balam se giriman ago namakasan, se nu turom umu te ko kuwim te bagaram mu te am bagakaso.

Jacob Kaem ilak

22 Se turom suwanta umu te la Jacob barasam ale ko imet ilagala mu se, ko ura saonga imet ilagala mu se, ko kuriang 11 mu buta nunga giam, ale yu Jabbok komasang te kasu kapaman. 23 Asele peleram ko ura kari nunga diruwuram se ko melmasak suen la ago yu komasang te kasu kapaman nama gilingiman. 24 Se nu kota suwanta yu koma saki te bagaram. Se turom kari bo tairam ilak kagera laga sor ukirokko negawaram se 25 kari numi ikiam nu sail tagirokko me terong se nu Jacob ko bugi duap itam se piriam. 26 Se kari mu Jacob maonam, “Sor ukirokko pingi aram. Aninga bitar se namirikko.”

Bare Jacob nu maonam, “Ni ani marak aisu mu asele ani ka bitirik se namarko.”

27 Se kari mu Jacob isuam, “Nika nip awiri ya?”

Se Jacob balam, “Aninga aip Jacob i,” mam.

28 Se kari mu balam, “Ni udagi ka nip Jacob mena. Ni Kaem ilak nimi iluwem, aking kari nongorak nimi iluwem, ale ni sail tagirem ale nunga kiarem. Se aitak nika nip Israel.”
Gen 32:28 Nup Israel mu ko nunguning mu “Kaem ilak numi iluwam”.


29 Se Jacob balam, “Nika nip balu se ikiekko,” mam. Bare kari mu balam, “Ni anape ko aninga aip ikiko isesam?” Ale nu Jacob marak tuam ale namaram.

30 Se udagi te Jacob balam, “Ani Kaem arigem pa,” mam, “bare ani me kuerem.” Buta se nu sor mu nup beteram Peniel mam.
Gen 32:30 Nup Peniel mu ko nunguning mu “Kaem koma motam”.


31 Worem bausam, se Jacob sor Peniel mu beteram. Bare nu aolak diram me ilukaso, mu awuk, noko bugi duap kutugam. Buta se tom mu te eng tai aitak, Israel alo melmasak nunga bugi duap ko nunguning me nasan, mu awuk, kari Jacob ilak numi iluwam mu Jacob ko bugi duap te itam se.

32 

Copyright information for `WSK