Genesis 34

Shechem kilek memek Dinah kumik te beteram

Dinah mu Jacob Leah nunga nanawus. Se tom bo nu Canaan imet saki nungarkukko namaram. Se Hamor, Hivi kari, mu sor mu ko kari supuling. Se ko namar Shechem Dinah arigam ale gomang barasam, se namaram iluwam ale ko sail te ilak kilek memek beteram. Nu Jacob ko kuriang Dinah ko ninguru dagulam, ale gomang kulukua den manarukaso. Ale udagi te namaram ko nuet Hamor maonam, “Ba, imet owore to se aninga aiwus arukko,” mam.

Udagi te Jacob den ikiam, Shechem ko sail te Dinah iluwam ale kilek memek kumik te beteram mu ikiam. Bare noko namar ari bulmakau sipsip mel nunga bitarmonko namaman lagakasan. Se nu den bo me balam, ko kuriang taimonko am nunga kimi bitawakaso.

Se Shechem ko nuet Hamor Jacob ilak munakurukko taiwaram mu Jacob ko kuriang kari nunga ura bita laga tai nongote arataman. Ale Shechem kilek memek nunga nogoras ilak beteram mu ko den ikiman biririkiman, ale ninguru tala nongomang magaram. Se balman, “Shechem kilek memek beteram mu kilek memek dolara karogo,” maman. “Kilek mu ana Israel nanga ikia te me terong nunguningkiri!”

Se Hamor Jacob maonam, “Aninga kuriang Shechem nika nanawus ko ninguru dagulam ale balam. Se am balu se noko imet ko am taukko. Ana laun uria yawara betenakko. Se anananga kuriang kari mu nenenga nanawus ari nunga gimon, se nenenga kuriang kari mu anananga nanawus ari nunga gimonko. 10 Asele nina ana nangarak nanga sor imi te am bagaralko. Se nenenga nengemang kuwim aguwaya te bagaralko kueral, mu am te bagaralko. Ale diara guruga ko ura am beteralko, ali sang dia gialko mu am dia gialko.”

11 Se Shechem Dinah ko nuet se ko korasari iwita nunga maonam, “Nina Dinah aisalko iwita ikial, mu nina anapeya ko kueral balal, mu ani am ningarikko. 12 Ale nina anapeya munan ningarikko balal, ale imet ko manga tom awilaya ningarikko balal, mu ani ningarikko, bare imet sumu balal se ani am taikko.”

13 Se Jacob ko kuriang alo Shechem kilek memek nunga nogoras ilak beteram wore ko ikikasan, ale ko Shechem ko nuet Hamor ilak nunga kula den nunga manarukasan. 14 Ale iwita balman, “Ana balnak se anananga nagoras kari kumik guang me batogam mu ilak me naukko,” maman. “Ana buta betenak, mu ana dolara biya ginakko. 15 Bare nina mel suwanta imi giral beteral asele. Nina nenenga kari mu suen la nungumik guang batutumural se anananga iwita aratomon mu asele. 16 Nina buta beteral, mu asele nina anananga imet gialko, se aking ana nenenga imet ginakko. Ale nengerak kariimet suwan awunak ale baganakko. 17 Bare nina anananga den ningimik guang batoga mu me karo tual, mu anananga nagoras tanak ale sor imi betenakko.”

18 Se Hamor ko namar Shechem ilak den mu ikiman ale ko kueman, ale butata betemonko balman. 19 Shechem tairate den mu karo tuam, mu awuk, nu Jacob ko nanawus ko ninguru kuakaso. Shechem mu ko launuria ningi nu kota gira.

20 Se Hamor ko namar Shechem ilak biguwura kuwim wonong ko songkuring ago mu te namaman, ale den mu nunga wonong suwan nunga manarukasan. Ale balman, 21 “Kari ari mu nuna ana nangarak laun uria yawara betemonko. Se anananga ali biya. Se ana balnak se nuna nanga ali te baga se nunga ikia te am geragomonko. Ana nononga nanawus ari nunga ginak, se nuna anananga nanawus ari nunga gimonko. 22 Bare nuna nungumik guang batoga ko munan ko ninguru sail tagisan. Se ana kari suen la nangimik guang batutumunak ale nuna iwita aratanakko. 23 Ana buta betenak, mu nunga sipsip bulmakau se nunga mel suen biya mu anananga arukko. Se balnak am nangarak bagomonko.” 24 Se wonong mu ko kariimet suen biya Hamor ko namar Shechem ilak nunga den ikiman ale ko kueman, ale kari suen biya nunga nungumik guang batutumuman.

25 Tom ilagala suwan namaram, bare kari nunga nungumik guang batutumuman mu am yaman ikiwakaso. Se sinar ago mena, am ta bagakasan. Se Jacob ko kuriang ilagala, Simeon Levi ilak, mu Dinah ko korasari nunguning, nuna ilagala kager ko batir maiya maiya mu giman ale wonong mu ko kari suen la nunga moman se kueman. 26 Nuna Hamor ko namar Shechem ilak nunga moman se kueman, ale nunga nogoras Dinah Shechem ko kawam te bagaram mu taman ale ilak namaman. 27 Se Jacob ko kuriang sang barasaman wonong mu ningi melmasak suen la giman ale nama gilingiman, mu awuk, kilek Dinah kumik te beteman mu me terong, se ko koma. 28 Nuna sipsip, bulmakau, donkey, suen la nunga gi sapaman, ale mel suen biya wonong te, ningam ningi, mu gi sapaman, 29 nunga manga, nunga imet kuriang suen la, mel suen biya nunga kawam te mu nunga nogoras ko koma ko gi sapaman.

30 Se Jacob ko kuriang Simeon Levi ilak nunga maonam, “Nina kilek memek mu beteman mu aninga aip maguwuman. Se aitak Canaan arika, Perez alo, se awiriya ali imi te, mu nuna ani ago ko nongomang magurukko. Ana kari suen biya mena. Se nunga kari suen la biguwumon ale ani agarak kagermon, mu nuna ana suen la nanga menawumonko.”

31 Bare nuna balman, “Nuna anananga nagoras lage luan imet iwita beteman. Mu me terong.”

Copyright information for `WSK