Genesis 35

Kaem Bethel sor te Jacob marak tuam

Kaem Jacob iwita maonam, “Bares ale sor Bethel mu te nama bagaralko. Ale manga loanger ale aip patawurko. Ani Kaem, tom ni ka laun Esau ko nguangerem ale ko naguwerem se sor umutang te ani kete aratem, wore ko tama aisuko.”

Se Jacob ko imet kuriang, se ko kariimet ilak bagara, mu suen la nunga maonam, “Nina ninga kaem kawel ago bagasan mu suen la waru saparalko. Ale ninguru gural ale guang karur mena mu naguralko. Ana sor imi betenak ale Bethel namanakko. Se mu te ani Kaem ko altar nungekko. Nu aninga ikup ko tom te aninga saongam, ale sor suen biya ani te namakasam mu nu ani agarak bagakaso.” Se nuna nunga kaem kawel karogo bagaman mu suen la Jacob tuman. Ale ring sang nodogowa te mu ago tuman. Se giam ale Shechem sor te tam biya bo bagaram mu ko duap ningi mutim tugumam.

Tom Jacob ko kuriang kari mu arungak aolak iluman sor mu bitakasan, mu wonong wonong Shechem ko pingi mu nguangara biya nongote tairam, se nuna Jacob ko kariimet arungak me arungu kagerman.

Jacob ko kariimet ago Luz wonong te nama arataman. Luz mu ko nup bo Bethel, wonong mu Canaan sor te. Asele Jacob manga bolala awuram ale Kaem nup patowaram, ale sor mu ko nup beteram El-Bethel mam, mu awuk, tom nu ko laun Esau ko nguangaram ale naguram tom mu te Kaem sor mu te ipingira te kote aratam.
Gen 35:7, 15 Nup El-Bethel mu ko nunguning mu “Bethel sor ko Kaem”. Se nup Bethel mu ko nunguning mu “Kaem ko kawam”.


Se Deborah, Rebecca ko sinar taukko imet, mu kueram, se tam biya Bethel sor te bagaram mu ko bowa ningi mutim tuguman. Ale tam nup beteman “Niara ko Tam” maman.

Se tom Jacob Mesopotamia beteram ale peleram Canaan tairam, mu Bethel sor mu te Kaem akingtala kote aratam ale marak tuam. 10 Ale maonam, “Nika nip Jacob i,” mam. “Bare udagi ka arumon Jacob ko me ka arumonko. Aitak mu nika nip Israel.” 11 Aking nu maonam, “Ani Kaem Sokel Karogo. Nika kuriang suen biya aratomonko. Ni kariimet suen biya nunga girigir, se ka girigir saki mu king ko aratomonko. 12 Ani ali Abraham Isaac nungarem mu aking ni ka taleng girigir ago ningarikko.” 13 Kaem buta balam, ale Jacob beteram ale namaram. 14 Se Jacob kuwim Kaem ilak te munakaram mu te manga bo baongam, ale yu waen se olive gureng mu awete waram, ale te kuwim kako nunguningkiri beteram. 15 Ale sor mu nup beteram Bethel mam.

Rachel kueram

16 Nuna Bethel beteman aolak ilu Ephrath namangaman awar nuam, se Rachel kuriang iluwokko tom tai aratam. Se nu yaman tokaso. 17 Tom nu yaman biyala iram mu ko saonga imet mu iwita maonam, “Ni me nguangerko,” mam. “Kuriang imi kari,” mam. 18 Se Rachel kuriang iluwam, ale kuerukko nega se kuriang nup beteram Benoni mam. Bare ko nuet nup beteram Benjamin.
Gen 35:18 Hebrew den te nup “ben” mu ko nunguning mu “namar”. Nup Benoni mu ko duap iwita, “kuriang yaman ago iluwam”. Se nup Benjamin mu ko nunguning wetang te mena; mu “amilmil kuriang” agi “kuriang ko kuera tawun biya”.


19 Rachel kueram se nuna lage Ephrath namara mu ko norogen te mutim tuguman. Nup Ephrath mu aitak Bethlehem masan. 20 Se Jacob ko ali motam te manga bo bangaru beteram. Se aitak manga mu am aniso. 21 Se Jacob aolak iluwam namaram Eder kariimet nunga kawam kalel biya mu komasang te noko kuwim nungam.

Jacob ko kuriang alo

22 Jacob sor mu te bagaram se ko kuriang laun Reuben noko nuet ko ura imet Bilhah ilak kilek memek beteram. Se Jacob ikiam ale ninguru gomang magaram.

Jacob ko kuriang kari 12.
23 Se ko nuwus Leah ko kuriang mu nunga nunup Reuben, mu laun, se Simeon, Levi, Judah, Issachar, se Zebulun butata. 24 Se ko nuwus bo Rachel mu ko kuriang ilagala, Joseph se Benjamin. 25 Se Rachel ko ura imet Bilhah mu ko kuriang ilagala, Dan se Naphtali. 26 Se Leah ko ura imet Zilpah mu ko kuriang ilagala tala, Gad se Issachar. Tom Jacob Mesopotamia bagaram mu ko kuriang 11 mu umu te bilangaman, se Benjamin mu asele Bethlehem bilangaram.

27 Jacob ko nuet Isaac kote Mamre, Hebron ko pingita, sor Isaac Abraham te animan mu te tairam bagakaso. 28 Isaac yar l80 bagaram. Nu garuk ta baga asele kueram. Se ko kuriang Esau Jacob ilak mutim tugu gilingiman.

29 

Copyright information for `WSK