Genesis 37

Joseph ko laun ari arungu

Jacob Canaan ali te, kuwim nuet te ulengkala bagaram mu te am bagakaso.

Se Jacob ko kuriang arungu nunga dugu duap iwita:

Joseph kuriang kulak la, ko yar 17. Nu ko laun ari Jacob ko imet Zilpah Bilhah nunga nutagu te wore arungu sipsip belelek nunga bitarukasan. Bare ko laun ari mu kilek memek bitakasan, se Joseph namakaso ko nuet manarukaso.

Jacob ko kuriang suen la nunga ningi nu Joseph ko ninguru kuakaso, mu awuk, nu garuk ningi bagaram se Joseph bilangaram. Se nu guang bo maiya biya bala ago biriram Joseph tuam. Se Joseph ko laun ari nunga nonet Jacob Joseph ko kuakaso ale nuna ninguru me nunga kuakaso mu arikasan, ale nuna Joseph ko ninguru nongomang magakaso, se munak ningo bo me ilak munakakasan.

Se tom bo Joseph ipingiram ale ko duap laun ari nomokete balam. Se nuna nongomang ninguru tala magakaso. Joseph iwita balam, “Aninga ipingira ewere ko ikialko,” mam. “Ana suen la ningam te wheat luan kalowaman se aninga wheat sipikirem mu barasam diram sanamaram, se nenenga mu aninga talurman ale taraman aninga mu kote la namaman.”

Se ko laun ari ipingira mu ikiman ale ninguru nongomang magakaso. Se balman, “Ni ikisam ni king ko aratu ale anananga bitaruko e?” maman, ale ining tuikasan.

Se Joseph akingtala ipingiram ale ko laun ari nunga maonam, “Ikialko. Ani aking ipingira bo tala arigem, mu worem sige se baras 11 ani amake dugu te taraman.”

10 Ale ko ipingira mu ko nuet maonam se ikiam ale ining tuam, “Sowore anape ipingira ya?” mam. “Ni ikisam ani se, ka niam, se ka laun ari tainak nika kema dugu te taranakko e?” 11 Se Joseph ko laun ari nu ko ninguru nongomang magaram. Bare Jacob Joseph ko ipingira mu am kuamin te gomang ningi ikiwakaso.

Joseph ko laun ari nu diaman se Egypt namaram

12 Tom bo Joseph ko laun ari nunga nonet ko belelek sipsip Shechem animan mu nunga bitarmonko namaman bagakasan. 13 Se Jacob Joseph maonam, “Ka laun ari Shechem bulmakau sipsip nunga bitaruwasan mu nama nungarkiko,” mam.

Se Joseph balam, “Mu ani namirikko.”

14 Se noko nuet balam, “Nuna terong bagasan agi wore namar nungarki ale tai aga manaruko.” Tom mu te Jacob Hebron baga se Joseph Shechem namurukko maonam.

Se Joseph nama Shechem aratam ale aguwaya bagakasan wore nunga kupukaso, ale loaga gurugu nama pilawaram.
15 Se kari bo arigam, ale isuam, “Ni anape kupusam a?” mam. 16 Se Joseph balam, “Aninga laun ari bulmakau sipsip nunga sinar tasan wore nunga loagawasam. Se nuna te bagasan mu ni ko ikisam e?”

17 Se kari mu balam, “Nuna sor imi maingkala beteman. Ale Dothan namomonko balman se ani ikiem.”

Se Joseph barasam nogowom kaoram ale nama Dothan nungarkam.
18 Ko laun ari awar la nu ari gilingiman. Ale nu me nongote tai aratukaso la nuna nu momon se kuerukko balukasan.

19 Ale balman, “Ipingira kari taisowo!” maman. 20 “Monak se kueruk se ko kumik guang yu iman se marakam wore ko mutim ningi sapanakko. Ale udagi te namanak mu ‘mel memek moram’ manakko. Ale ana ko ipingira ko nunguning aringinakko!”

21 Bare Reuben den mu ikiam ale Joseph sangukko den balam, “Ana me monak se kuerukko!” mam. “Yu mutim ningi la saparalko, me moralko!” mam. Reuben nu Joseph sanguk ale bitiruk se nuet kote pelerukko ikikaso ale uwuta balukaso. 23 Se Joseph ko laun ari nongote tai aratam se iluman, ale ko guang maiya bala karogo mu kutuwuman 24 ale ilak nama yu mutim ningi sapaman.

25 Ale udagi te dagiman na nowa Ishmael kari taiwaman se nungarkaman. Ishmael kari mu Gilead sor ko, wore aolak iluman Egypt namakasan. Se nunga camel te mu melmasak koma kalel biya, o tam kiri siring yawara se sanda duap duap mu giman, Egypt sor te diamonko namakasan.

26 Se Judah ko launuria iwita nunga maonam, “Anananga uria monak se kueruk se kaluwunak mu anape mel kumik ningi tanakko ya?” mam. 27 “Am ngual Ishmael arungu dianak ale ko koma tanakko. Mu te asele ana me monakko. Nu anananga uria nunguningkiri, ana gue suwanta.” Se Judah ko launuria den mu ikiman ale “butata betenakko” maman.

28 Se Ishmael ningi Midian kari sang manga bibiya wore nongote tai arataman. Se nuna Joseph mutim ningi bagaram mu taman Midian alo nungarman. Se manga biling silver 20 te dia gilingiman ale ilak Egypt namaman.

29 Udagi te Reuben tairam mutim ningi Joseph arigokko loagaram, mena. Se noman batagam, se kota ko guang iluwam barukuam. 30 Ale ko uria mitak nongote peleram ale nunga maonam, “Joseph owola mutim ningi me bagoso. Se ani awuk maikko ya?”

31 Se Joseph ko laun ari belelek bo moman ale ko gue Joseph ko guang te iluman. 32 Ale giman ago nunga nonet Jacob kote namaman ale balman, “Ana guang ewere aringiman. Bare nika kuriang ko agi mena agi?”

33 Se nu arigam ale balam, “Mu borta, noko guang ta,” mam. “Aninga kuriang Joseph mel daong ago wore moa batogam!” 34 Ale Jacob ninguru gomang batagakaso, se ko guang barurumuram ale guang guturum wuli karogo wore kataram. Ale tom maiya biya ko kuriang ko noman bataga lagakaso.

35 Se ko kuriang kari se imet mu suen la taiman gomang bataga menarukko den manarukasan. Bare nu balam, “Mena, ani am mo niawa nukote, kari kuera nunga kuwim te namirik bare asele ko,” makaso. Ale ko kuriang Joseph ko la gomang bataga se bagakaso.

36 Se Midian alo Joseph ilak Egypt namaman. Ale Pharaoh ko kari bo nup Potiphar mu kote dia gilingiman. Potiphar mu Pharaoh ko kawam bitaruwara ko kager kari nunga supuling.

Copyright information for `WSK