Genesis 38

Judah se Tamar

Tom mu te Judah ko launuria nunga beteram ale namaram Hirah, Adullam wonong ko kari, wore ilak bagakaso. Ale Canaan imet, ko nuet Shua, mu arigam, ale noko nuwus ko tam. Ale ilak bagaram se kuriang kari iluwam se nup beteman Er. Udagi tala noko imet aking tuagu aratam, se kuriang kari iluwam ale nup beteram Onan mam. Aking udagi kari tala iluwam, ale nup beteram Shelah mam. Judah Chezib sor te baga se ko kuriang Shelah bilangaram.

Se Judah ko kuriang laun Er kari aram, mu Judah imet bo to tuam, imet mu ko nup Tamar. Bare Er ko kilek memek nunguningkiri, se Kari Biya arigam me terong, se balam se Er kueram. Se aking Judah Onan maonam, “Ka laun kueram, bare kumik kuriang mena. Se ni anananga munan karo ale nama ka laun ko nuwus ilak anirko. Se kuriang aratomon, mu ka laun ko nup te.” Bare Onan ikiam kuriang aratomon mu noko nunguning mena. Se tom nu imet ilak anikaso, mu noko kumik yu imet mu ko kumik ningi me warukaso, watingi warukaso. Nu uwuta bitiruk se noko laun kuriang mena ko. 10 Bare Onan munan bitakaso mu Kari Biya arigam me terong, se balam se Onan kueram.

11 Udagi Judah ko noton Tamar iwita maonam, “Ka kari kueram. Buta se ni piler namar ka niet ko kawam te bagerko. Se aga kuriang Shelah laguruk asele ni ilak noko.” Judah uwuta balam, mu nu nguangakaso. Shelah ko laun ilagala kueman wore turantala kueruk bore ko. Se Tamar peleram ko nuet kote namaram.

12 Se kam maiya nuam namaram se Judah ko nuwus, Shua ko nanawus, kueram. Se noman bataga laga ko tom menaram mu Judah barasam ale ko bo Hirah, Adullam kari, wore ilak Timna namaman. Sor mu te ura kari alo Judah ko sipsip mone turuwu se animan.

13 Se kari bo Tamar maonam, “Nika tenger sipsip mone turuwurokko Timna namaram.” 14 Se Tamar den mu ikiam ale guang noko kuari kueram se naguram ago bagaram mu kutuwuram, ale guang sang kigilik giam naguram. Ale guang bo te koma motam kaluwuram ale namaram Enaim wonong duap te, lage Timna namaram mu te daigam bagakaso. Mu nu iwita ikikaso, Judah ko kuriang Shelah mu kari aram, bare nuna me nu tuikasan.

15 Se Judah Timna namawa imet mu arigam, ale nu ikiam lage luan imet ko balam, mu awuk, noko koma kaluwuram. 16 Se nu nama imet lage kinikan te dagiwaram mu kote aratam ale maonam, “Ani nikerak anirekko kaesam.” Bare Judah imet mu noko noton wore nu me ko ikikaso.

Se imet mu balam, “Se ni anape mel ani aisuko?”

17 Se Judah balam, “Aninga belelek ago. Se bo bitirik se kete tairukko.”

Se imet mu balam, “Mu terong pa! Bare mel bo ani aisu se ilu sagirik, se ni belelek bitar asele aking kisekko.”

18 Se Judah balam, “Ani anape mel kisek se ni ilu sager?”

Se imet balam, “Mel nika nip ago degetak te aniso mu se, ka sikir kiting te aniso sumu aisuko,” mam. Se Judah mel ko balam mu tuam. Asele ilak namaram ilak aniram se tuagu aratam.
19 Se Judah barasam Timna namawaram mu imet mu barasam ko kawam te namaram ale guang naguram mu kututuwuram, ale guang noko kuari kueram se naguwaram mu aking tam naguram.

20 Udagi Judah belelek borok bo tam, ko bo Adullam kari Hirah tuam ale balam, “Gi ago namar ale imet aninga melmasak tuem mu tuiko, ale aninga melmasak nu tuem mu gi ago tairko.” Se Hirah namaram kupam bare imet mu me arigam. 21 Ale nu Enaim kari sang nunga isuam, “Lage luan imet lage te dagiwoso mu apoko ya?”

Se nuna balman, “Lage luan imet bo sor imi te me bagoso,” maman.

22 Se nu peleram namaram ale Judah maonam, “Ani namerem, bare imet mu me arigem. Se wonong mu ko kari balman, lage luan imet bo sor umu te me bagoso ma balman.”

23 Se Judah balam, “Aninga melmasak am bo la ilu sagurukko. Kariimet analak nanga gusirmon bore ko. Ani nu nunguningta diarikko belelek borok imi beterem se ni giem ago namerem, bare ni nu me arigem.”

24 Se sige ilagala suwan iwita namaram se kari saki Judah manorman, “Nika neton Tamar lage luan imet ko numi gurugam, ale aitak tuagu ago bagoso.”

Se Judah balam, “Tal ilak aratal ale tama te kaiyal se kuerukko,” mam.
25 Bare tom nuna ilak watingi arataman mu Tamar den beteram se ko tonger Judah kote namaram. Nu iwita balam, “Ani mel ewere ko kotam kumik te atagu aratam,” mam. “Mel ewere ninguru arigalko, dogotak tuguma ko mel, se sikir ewere arigalko, awiriya ko wore.”

26 Se Judah mel koma arigam ikiam, ale balam, “Imet sumu kumik te den mena. Nu aninga kuriang Shelah ilak naukko, bare ani agata memek beterem ale nuna nunumi gimonko lage me nungem.” Nu uwuta balam ale udagi me ta ilak anikaso.

27 Se Tamar kuriang iluwokko kaeyakaso se noko tuagu ningi kuriang kari ilagala. 28 Se kuriang iluwokko negawaram, mu bo giram kuting garukuam se aratam. Se imet nu bitaruwaram mu kuting iluwam ale mayang diriyam mu kuting te kaolam ale balam, “Kuriang imi giram aratoso,” mam. 29 Bare nu kuting tagiram se peleram, se aking ko bo giram aratam. Se bitua imet mu balam, “Nika sokel te girem aratasam e?” Se nup beteman Perez. 30 Se udagi te ko bo kuting kopa mayang diriyam ago mu aratam. Se ko nup beteman Zerah maman.
Gen 38:29-30 Nup Perez mu ko nunguning mu “pagoso aratoso”. Se nup Zerah mu ko nunguning mu “diriyam”.


Copyright information for `WSK