Genesis 41

Joseph Pharaoh ko ipingira duap balam

Yar ilagala namaram se udagi Pharaoh turom aniwa ipingiram. Noko ipingira mu iwita: nu Yu Nile norogen te sanamiwaram se bulmakau 7 nungumik ningo yu ningi arataman ale yu norogen te sirsir nokasan se nungarkam. Aking udagi mu bulmakau 7 nungumik memek, sokelel la, mu arataman ale taiman bulmakau nungumik ningo sanamingaman mu nongote tai sanamaman. Ale bulmakau nungumik memek barasaman nungumik ningo mu nunga naman. Pharaoh uwuta ipingiram arigam ale maragaram.

Aking aniram ale ipingira bo tala arigam. Mu iwita: kon duap suwanta wore te nunguning 7, bare nunguning bibiya se garukaman. Se udagi kon 7 tala papak maman ale tarigiman, bare yar tairam nunga kaiyam se siririmaman. Se kon siririyam mu barasaman kon ningo mu nunga no gilingiman. Se Pharaoh aniwa barasam ale ipingiram mu ko ikiam. Ale tumongola la Egypt ningi ikia kari, se mang kari mu nunga auram se taiman, ale ko ipingira ilagala mu nongoma te balam. Bare kari bo noko ipingira duap balukko me terong.

Udagi asele waen bitua ko kari supuling mu Pharaoh maonam, “Ani ulengkala memek beterem wore wetang te balikko,” mam. 10 “Ulengkala ani se, bread kaiya ko kari supuling mu ilak ni nanga gemang magaram, se talipara ningi nanga awurem. 11 Se mu te baga turom bo animan ale ipingiman. Ale anananga ipingira mu ko nunguning kirker. 12 Se Hebrew kuriang kulak bo ana nangarak talipara ningi bagakaso. Nu kager kari nunga supuling ko ura dungan. Bare ana ilagala nanga ipingira ko manorman se nu ko nunguning namake namake nanga maonam. 13 Se mel nu balam butata aratu nangaram. Ani aga ura girem iluwerem mu ko pelerem, se bread kaiya ko kari supuling balam butata ituwuman se kueram.”

14 Se Pharaoh den mu ikiam ale Joseph tairukko balam. Se tairate talipara kawam te namaman ale Joseph taman ilak taiman. Joseph numi nungam, somone turuwuram, ale guang kigilik mu tam kataram, asele Pharaoh kote kasu naguram. 15 Se Pharaoh nu maonam, “Ani ipingirem, bare kari bo ipingira duap baluk se ikiekko wore mena. Kari saki iwita balman se ikiem, ni ipingira aguwaya wore ni ko duap balsam.”

16 Bare Joseph balam, “Ani agata me terong. Bare Kaem kota ka ipingira duap mu wetang te baluk se ikiko.”

17 Se Pharaoh balam, “Ani ipingirem ale yu Nile norogen te sanamiwerem se 18 bulmakau nungumik ningo 7 yu ningi arataman ale yu norogen te sirsir nokasan. 19 Se aking udagi mu bulmakau 7 tala arataman. Nuna nungumik memek, sokelel la, ani Egypt ningi bulmakau bo iwita me nungarkem. 20 Se bulmakau nungumik memek mu barasaman bulmakau nungumik ningo mu nunga no gilingiman. 21 Nunga naman, bare nunga nungumik ariga yam memek biya, nuna na bo me naman iwita.

22 “Se udagi anirem ale akingtala ipingirem. Ale kon suwanta wore ko nunguning 7 arataman mu arigem, nunguning bibiya, se garukaman. 23 Udagi te kon 7 tala papak maman tarigiman, bare yar daula tairam nunga kaiyam se siririmaman. 24 Se kon siririyam mu barasaman kon nungumik ningo mu nunga naman, mu arigem. Ani mang kari alo mu aninga ipingira imi nomokete balem. Bare bo ta aninga ipingira duap me balman.”

25 Se Joseph Pharaoh maonam, “Nika ipingira ilagala sumu ko nunguning koma suwanta. Kaem mel bitirukko wore nika kausam se arigem. 26 Bulmakau nungumik ningo 7 mu se, kon ningo 7 mu iwita: mu yar 7. Mel ilagala umu nunga nunguning koma suwanta. 27 Se bulmakau nungumik memek 7 udagi arataman, se kon memek 7 tala arataman bare yar tairam nunga kaiyam se siririmaman mu ko nunguning iwita: yar 7 karak biya kapurukkowo.

28 “Ani maingkala ka manem, Kaem mel bitirukko wore ka kausam se arigem. 29 Yar 7 te mu Egypt ningi na suen biya aratukko. 30 Bare ko buring ko mu yar 7 ningi karak biya kapurukkowo. Se tom mu te Egypt kariimet baga turutuwumon ale yar 7 ningo mu nungamili sapurukko. 31 Karak biya ali imi iluwok mu memek nunguningkiri, se tom mu te nuna yar 7 ningi mel terong la bagaman mu ko nungamili sapurukko. 32 Ka ipingira tom ilagala mu iwita: Kaem mel mu nunguningta bitirukko wore ka kausam, ale bitirukko pingi aram!

33 “Se aitak ni kari bo ko ikia ningo nuam wore balu se Egypt sor bituokko. 34 Ale kari sang mu ago nunga baluko. Se yar 7 na ago mu ningi, kari umutang kariimet suen la nunga na gisan mu pagarmon pagaru 5, ale 4 nungaru se suwanta kutuwu bolala awumon, wonong wonong kawam bibiya ningi awumon ale ko sinar tamonko. 36 Se udagi yar 7 tala umu ningi, karak biya Egypt kapurukko tom mu te, Egypt kariimet na bolala awuman se aniso mu la gimon no se bagomonko. Ikia mu te asele kariimet na ko me kuemonkowo, mam.”

Pharaoh balam se Joseph Egypt nunga kari biya ko aratam

37 Pharaoh se ko kari supuling arungu den Joseph balam mu ko kueman. 38 Se Pharaoh nunga maonam, “Kari imi Kaem ko Korang Bur ilak bagoso. Ana kari bo nu iwita aringinakko me terong.”

39 Ale Pharaoh Joseph maonam, “Kaem kota mel imi suen biya nika kausam. Ale kari bo ko ikia ningo nika ikia turan mena. 40 Se ani ni aninga wonong ko kari biya ka betesam. Se wonong imi ko kariimet nika kiring la karo tumonko. Ani king, se ani agata suwanta aga aip nika kualala anirukko.”

41 Ale Pharaoh Joseph maonam, “Aitak ani ni Egypt kariimet nunga kari supuling biya ko ka betesam,” mam. 42 Ale king ko ring kuting peperek te aniram mu kutuwuram Joseph kuting peperek te tugu tuam. Ale guang ningo nuam mu tam Joseph tugu tuam, ale kulolo gold tam dogotak te tugu tuam. 43 Ale king ko karis ilagala mu bo Joseph te geragukko tuam. Se Joseph te geragakaso mu ura kari girikasan nuguring biya te “tagi talko” makasan.

Pharaoh munan mu te Joseph Egypt nunga kari biya ko beteram.
44 Ale maonam, “Ani king, se ani balsam Egypt kari bo kota ko ikia te mel bo me bitirukko. Mena. Mu nu girok nika isok bore asele.”

45 Ale Pharaoh Egypt nunga nup Zaphenath-Paneah mu Joseph tuam. Ale imet bo tuam, ko nup Asenath, nu Potiphera, On
Gen 41:45-46 On wonong ko nup bo Heliopolis. Nup mu ko nunguning “worem ko wonong”.
wonong ko priest bo ko nanawus.

Joseph ko yar 30 se nu Egypt nunga king Pharaoh ko ura iluwa duap beteram. Nu wonong Pharaoh te bagakaso mu beteram ale Egypt wonong suen la te geragakaso.
47 Se yar 7 na suen biya aratukko tom mu te na suen biya aratam. 48 Se Joseph wonong suwan suwan te na gikaso, ale nononga wonong bibiya ningi kawam tugu tugu ago namakaso. 49 Nu wheat nunguning suen biya gikaso ale kawam tugukaso, langi saun iwitata. Ale na kauwaram mu beteram, mu awuk, na suen biya se.

50 Karak biya kapurukko yar me tai arata la, Joseph ko nuwus Asenath kuriang kari ilagala iluwam. Asenath mu Potiphera, On wonong ko priest bo, wore ko nanawus. 51 Se Joseph balam, “Kaem aninga saongam se angamang ikup aninga angamang te aniram mu se, aga ait aga launuria nunga angamili saparam.” Ale ko kuriang laun mu nup beteram Manasseh mam. 52 Ale aking balam, “Kaem sor imi ani te memek arigem wore te kuriang aisam,” mam, ale nup beteram Ephraim mam.
Gen 41:51-52 Nup Manasseh mu ko nunguning mu “angamili saparam”. Se nup Ephraim mu ko nunguning mu “nunguning akingtala kaparam”.


53 Yar 7 na inang ago mu menaram. 54 Se yar 7 karak biya te aratukko Joseph balam butata mu aratam. Se ali sor suen biya te karak biya kaparam. Bare Egypt wonong suen la mu te na terong la anikaso. 55 Udagi Egypt sor te na ningam ningi mu menaram. Se kariimet na ko kueman ale Pharaoh na nungarukko niakasan. Se nu nunga maonam, “Nina Joseph kote namaral ale mel baluk mu la beteralko,” makaso.

56 Karak biya memek nunguningkiri Egypt wonong suen la te aratam, se Joseph kawam bibiya inang ningi tugu awuram mu kaogam se Egypt kariimet taikasan na diakasan. Se ali sor saki ko kariimet agotala Egypt taikasan ale Joseph kote na diakasan. Mu awuk, karak memek wonong suen biya te aratam.

57 

Copyright information for `WSK