Genesis 42

Joseph ko laun ari na wheat diamonko Egypt namaman

Udagi te Jacob na inang Egypt wonong te aniso mu ikiam ale ko kuriang nunga maonam, “Nina awuk se yam bagara suwuta? Ani Egypt sor te inang aniso se ko den ikiem. Se nina namaral na sang diaralko. Mena mu ana baga kuesan.” Se Joseph ko laun ari 10 na inang diamonko Egypt namaman. Bare Jacob Joseph ko uria nunguning Benjamin mu beteram se arungak me namaram. Jacob nguangaram, Benjamin memek tauk bore ko nguangaram ale guramam.

Karak biya Canaan wonong te, se Jacob ko kuriang mu kari saki arungak na diamonko Egypt namaman. Joseph mu Egypt ko bitua kari biya, se wonong suen biya ko kari taikasan mu ilak inang diakasan. Se Joseph ko laun ari tai kote arataman ale koma dugu te taraman. Se Joseph nomoke arigam nunga ikiam. Bare nu me nunga ikia iwita arungu munakakaso. Ale arungak alis ago munakakaso. Ale nunga isuam, “Nina aparete wore taiman a?” mam.

Se nuna balman, “Ana Canaan sor te wore na dianakko taiman.”

Joseph nunga ikiam, bare nuna nu me ko ikikasan. Ale nu ko ipingira ulengkala nuna nogo ko ipingiram mu ko ikiam, ale balam, “Nina tere sor arigal gurugal ale te udagi nangarak kageraralko taiman pa!” mam. “Ale anananga sor aguwaya mu kagerurukko me terong wore arigal ale te nangarak kageraralko!” mam.

10 Se nuna balman, “Kari biya, mena!” maman. “Ana nika ura kari. Ana na dianakko taiman. 11 Ana suen la kari suwanta wore ko kuriang. Se ana tere sor aringinakko kari mena. Ana den nunguning bala ko kari.”

12 Bare Joseph balam, “Mena!” mam. “Nina sor aguwaya kager ko me terong wore arigalko taiman.”

13 Se nuna balman, “Kari biya, ana launuria 12. Ana Canaan kari suwanta wore ko kuriang. Nanga uria gotek mu nanga ba ilak am bagoso. Se nanga bo mu kueram.”

14 Bare Joseph akingtala balam, “Ani maingkala balem pa! Nina tere sor arigalko taiman! 15 Ani iwita ninga ira arigekko. Ani Pharaoh nup te nunguningta nunguning ninga manorsam, nenenga uria gotek balsan mu ewela me tairuk, mu nina peleral ninga sor te me namaralko. 16 Ninga bo namuruk ninga uria ilak tairukko. Se nina saki mu talipara ningi bagaralko. Se ana udagi nenenga den mu nunguningta agi mena agi mu ko ikinakko. Bare nenenga den suen biya mu nunguning mena, mu ani ikiekko nina tere sor arigalko taiman ma balikkowo!” 17 Joseph uwuta balam ale tom ilagala suwan ko talipara ningi nunga awuram.

18 Ale tom ilagala suwan mu te Joseph nunga maonam, “Ani Kaem kuring karo tua kari. Nina aninga agiring kaoral mu asele nina yawarakala bagaralko. 19 Se nina den nunguning ko kari agi mu, ninga ningi suwanta talipara kuwim nina te bagasan imi te bagurukko, se nina saki ninga imet kuriang na ko kuawasan mu nunga na diaral ale ago peleral namaralko. 20 Ale ninga uria gotek mu ilak aningate tairalko. Mu asele ani balik nina me kawelaman, den nunguning balman ma balik se nina me kueralkowo.”

Se nuna Joseph ko den balam mu karo tumonko balman,
21 ale nunumi manarukasan, “Nunguningta ana nanga uria bita maguwuman mu ko ana ikup imi arigisan! Nu niakaso ale sangornakko nanga arukaso se ana aringiman bare nu me sangorman. Buta se ana aitak ikup imi arigisan.”

22 Se Reuben balam, “Ani nina ninga manem, ninga uria me bita maguwuralko balem, bare nina aninga den me karo tuman. Se aitak ikup memek ana arigisan imi nu kueram wore ko koma.”

23 Se Joseph nononga den te nunumi manarukasan mu nu ikiam. Bare ko laun ari nu den ikiwakaso mu me ikiso ko balukasan. Mu awuk, Joseph nu Hebrew den me ikia iwita numi bitakaso, ale Egypt den te arungu munakakaso, se den guruga kari bo bagakaso mu Hebrew den te gurugukaso nuna nunga manaruwakaso. 24 Se Joseph nononga den mu ikiam, ale nu nunga beteram namaram niakaso. Nu nia mo laga mononge siwuram, ale aking nongote tairam ale arungak munakakaso. Ale nu balam se Simeon taman ale nomotam te talipaman.

Joseph ko laun ari peleman Canaan namaman

25 Joseph ko ura kari nunga maonam, nuna noko laun ari nunga korokem nongoma nongoma na ningi tugumon, ale nunga manga na te diaman mu aking gimon am nunga korokem kuring duap te ago tugumonko balam. Ale na lage te namonko mu ago nungarmonko balam. Se ura kari Joseph balam butata beteman.

26 Se laun ari nunga korokem gi nunga donkey te awuman ale namakasan. 27 Nama lage te turom batagam, se animon ale ukirok se aking namomonko. Se bo ko donkey na tuok se naukko ko korokem kuring kaogam, ale ko manga na te diaram wore aking am ningi aniram se arigam. 28 Ale ko saki nunga auram ale balam, “Arigalko!” mam. “Aga manga inang te diarem wore agate peleram ale aga korokem ningi aniso iweya!” Se nuna den mu ikiman ale biririkiman ale ninguru nguangakasan, ale nunumi isarukasan, “Kaem anape munan ananangate beteram a?” makasan.

29 Nuna tai Canaan sor te nunga nonet Jacob kote arataman ale mel suen biya nungumik te aratam mu manarukasan. 30 Ale iwita balukasan, “Egypt ko kari biya ana den alis ago nanga manarukaso, ale balukaso ana tere namatam sor ariga ko namaman ma balukaso. 31 Bare ana iwita balukasan, ‘Ana den nunguning bala ko kari. Ana tere sor ariga ko me taiman. 32 Ana launuria 12, mu kari suwanta wore ko kuriang, bare nanga uria bo kueram, se kulak gotek mu nanga ba ilak Canaan bagoso,’ ma balman.

33 “Se Egypt nunga kari biya mu iwita nanga maonam, ‘Ninga ningi suwanta ani agarak baguruk, se nina suen la na inang gial ale ninga kuriang imet te nunga saongalko ago namaral ale ninga uria gotek ilak tairalko,’ iwita ma balam. ‘Mu asele,’ mam, ‘ani balik nina den nunguning ko kari ma balik, ale nina tere sor arigalko taiman ma me balikko. 34 Asele ninga bo imi te mu tal ale ilak imi te diara guruga ura bita sagaralko,’ mam.”

35 Den mu nonet manaru sapaman, asele udagi te nuna suen la nunga korokem kuring kagorman. Ale na warmonko nega nomoke nomoke nunga manga korokem ningi aniram se aringiman. Ale nunga nonet manga nuna giman mu ago arigam. Ale nuna suen la nguangakasan.

36 Se Jacob nunga maonam, “Nina aninga kuriang suen la agate nunga tagi kututuwura ko ago kaesan e? Joseph memek te namaram. Simeon betela me peleram tairam. Se aitak Benjamin agate tal ale ilak namaralko balsan e? Nina kilek imi te ani angamang bataga aisisan pa!” mam.

37 Se Reuben ko nuet maonam, “Ani Benjamin ilak me pelerik tairik, mu aninga kuriang ilagala nunga moar se kuemonko. Se balu se ani agata ko sinar to se ilak namanak ale aking ilak tainakko.”

38 Bare Jacob balam, “Aninga kuriang nina nengerak me namurukko. Noko laun kueram. Se nu kota suwanta bagoso. Nu lage te memek tauk bore ko ani nguangasam. Ani garukerem. Se nu lage luan te memek arigok, mu ani nina munan betesan imitang ko ani aga aeman magara te kuerikkowo.”

Copyright information for `WSK