Genesis 47

Joseph namaram ale Pharaoh iwita maonam, “Aninga ba, aga launuria arungu Canaan wonong beteman ale tai arataman. Nuna nunga sipsip bulmakau, se nunga mel suen biya ago taiman, aitak Goshen anisan.” Ale Joseph ko launuria 5 nunga giam, ale Pharaoh nungarkukko nongorak kote namaram. Se Pharaoh nunga isuam, “Anape ura nina betesan a?” mam.

Se nuna balman, “Kari biya, anananga nainet alo bitakasan turan ana sipsip nunga bitarsan.
Ana sor ewerete baga se ura betenakko taiman. Mu awuk, karak biya Canaan kaparam, se anananga sipsip sirsir ito namonko wore mena. Se anananga nangamang ni balu se ana Goshen baganakko.”

Se Pharaoh Joseph maonam, “Nika niet se ka launuria imi te nikate tai arataman. Se Egypt koma aguwaya nuna te dagimonko mu am te dagimonko. Bare kuwim ningo Goshen mu nungaru se te dagimonko. Se nunga ningi saki bulmakau mel nunga ninguru sinar tasan mu nunga iki, mu balu se saki taimon aninga bulmakau mel nunga bitarmonko.”

Asele Joseph ko nuet Jacob tam ale ilak Pharaoh kote namaram se arigam ilak amilmilaram. Se Jacob Pharaoh marak den tuam. Se Pharaoh Jacob isuam, “Nika yar awila ya?”

Se Jacob balam, “Ani sor suen biya te geragem mu aninga yar 130. Yar umu suen nuam mena, bare ani ningi ikup suen biya arikasam. Aninga ait angatak alo nunga yar mu suen nuam, aninga yar ago me terong, nuna aninga kiaman.” 10 Jacob uwutata Pharaoh maonam, asele ka bo bagerko ma se namaram watingi aratam.

11 Joseph Pharaoh balam butata beteram, ale ko nuet ko launuria ago nunga saongam, ale Egypt sor te Rameses wonong ko pingita ali nungaram se dagi gilingiman. Sor koma mu ningo nunguningkiri, Egypt ko sor saki nunga kiaram. 12 Se Joseph na inang saki ko nuet tuam, ale ko launuria nunga imet kuriang ago terong ma la nungaram.

Joseph karak tom te nu kariimet nunga bitarukaso

13 Karak biya kaparam ale namawakaso, se sor suen biya te na mena biya. Se Egypt kariimet, Canaan kariimet, inang ko nosokel mena muruwuman. 14 Se na diakasan, se Joseph ko koma manga mu gikaso karogo Pharaoh ko kawam te namakaso. 15 Egypt Canaan kariimet nunga manga na te dia kutuwu sapaman mu, Egypt kariimet Joseph kote taikasan ale manarukasan, “Na nangaruko,” makasan. “Mena mu, ana na ko kuera nunguning kuenakko pa!” makasan. “Ni anananga sangaruko lage korang arikko. Anananga manga suen la menaram.”

16 Se Joseph balam, “Ninga manga menaram agi, mu ninga bulmakau sipsip mel ago tairal asele na ningarikko.” 17 Se nuna nunga horse, sipsip, belelek, bulmakau, donkey, ago Joseph kote taikasan se na nungarukaso. Joseph butata bitawaram se yar mu menaram.

18 Se aking yar udagi nuna kote taiman ale balman, “Kari biya, anananga ikup ni kema te kaluwunakko me terong. Anananga manga mena saparam, se nanga bulmakau sipsip maingkala nikate aniso. Se ana mel bo ni kisinakko mena. Anananga nangimik guang, se nanga ali la diram aniso. 19 Ana kuenakko iwita me nanga bitarko! Aking anananga ali betela ipi aniruk maguruk bore ko. Lage korang ko loager ale nanga sangaruko. Ni na inang te ana ali ago likilim nanga dier se ana Pharaoh ko ura dungan ko baganakko, se anananga ali mu Pharaoh ko. Se kon muguri agunakko mu ago nangaruko. Mu asele ana me kuenakko, se nanga ali me magurukko.”

20 Karak memek nunguningkiri, se Egypt kariimet nunga ali Joseph ilak diakasan, se nu dia kutuwuram. Se ali suen biya mu Pharaoh ko la. 21 Se Egypt sor suen la ko kariimet mu Pharaoh ko dungan ko la aratu muruwuman. 22 Priest nunga ali mu asele Joseph me diaram. Pharaoh priest la manga nungarukaso, se na te diakasan, ale nunga ali me diakasan.

23 Joseph kariimet iwita nunga maonam, “Nina ikialko,” mam. “Ani nina ninga ali ago likilim ninga diarem, se nina aitak Pharaoh ko la,” mam. “Buta se kon muguri imi gial ale karogo nama ningam te aguwalko. 24 Se udagi tarigiruk nunguning kapuruk, mu nunguning tuteral 5, se bo Pharaoh ko, se 4 mu nenenga. Se sang aguwa ko awural, sang ninga imet kuriang ago nalko.”

25 Se nuna balman, “Kari biya, ni ana ninguru nanga sangem se ana bo me kueman. Se ana suen la Pharaoh ko ura dungan kariimet baganakko.”

26 Joseph kariimet Egypt sor te bagakasan mu uwutata den nungaram, na garugaruk mu bo Pharaoh ko mam. Se munan mu aitak tom imi te am aniso tala. Bare priest alo nunga ali mu Pharaoh nongote me gikaso.

Jacob ko den nukum

27 Israel alo Egypt sor te Goshen dagi gilingiman. Ale nunga kuriang suen biya nunguningkiri kapaman, ale nunga melmasak suen biya tala.

28 Jacob Egypt ningi yar 17 bagakaso, se noko yar biguwuman mu 147. 29 Nu kuerukko tom pingi aram, se ko kuriang Joseph auram se tairam se maonam, “Ni nunguningta nunguning ani Egypt sor imi te me aga mutim tugumko mu baluko,” mam. 30 “Aninga angamang ni aga ait alo nungumik duap te aga mutim tugumko. Aga gi ale agarak Canaan namar, ale kuwim nuna te nunga mutim tuguman mu te aga mutim tugumko.”

Se Joseph balam, “Ani ni balsam butata bitirikko pa,” mam.

Bare Jacob balam, “Ni butata bitarko mu nunguningta nunguningkiri baluko.” Se Joseph nuet koma te den nunguningta nunguning balam, asele Jacob ko sikir te numi sangaru se maigam ale Kaem nup patowaram.

31 

Copyright information for `WSK