Genesis 50

Se Joseph ko nuet awete dagulam iluwam ale niakaso. Ale udagi te nu ko ura kari doctor mu nunga maonam, “Tairal aga ait ko kumik guang mel mel siring ago owore te nungal burangaral se me iwirokko,” mam. Se nuna butata beteman. Nuna tom 40 ningi ura umu bita gilingiman, mu Egypt alo ura mu uwutata bitakasan. Se udagi te Egypt kariimet arataman tom 70 ko Jacob ko mo nia lagakasan.

Se ma niara nongomang bataga tom mu menaram, mu Joseph Pharaoh ko ura supuling nunga maonam, “Nina ani ago ko nengemang yawarakala, mu aninga den imi tal ale Pharaoh maonalko: ‘Tom aninga ait kuerukko nega se iwita aga maonam: tom nu kueruk mu ani ilak Canaan sor te kuwim nungam wore te mutim tugumekko balam. Se ani aing maem buta bitirikkowo maem. Se aninga angamang ni balu se ani aga ait ilak nama mutim tugumek asele pelerik tairikko.’”

Se Pharaoh den koma iwita balam, “Mu terong. Nika niet balam se ni aing maem butata ilak nama mutim tugum ale tairko.”

Se Joseph nuet mutim tugumokko ilak namakaso. Se Pharaoh ko ura supuling, se Egypt kari bibiya, se Joseph ko imet kuriang, se ko nuet ko kariimet suen la nu ilak namaman. Nunga kuriang gotektek mu diram sipsip belelek bulmakau arungu Goshen bagakasan. Karis, se kari horse te geragawara mu ago Joseph ilak namaman. Kariimet suen biya nunguningkiri ilak namaman.

10 Se tom nuna nama Atad arataman, Atad mu sor wheat te nunga, Yu Jordan komasang te, mu nuna biyala mo nia gilingikasan. Ale sor mu te tom 7 ko Joseph ko nuet ko mo nia se worem kaniwakasan. 11 Se Canaan kariimet Atad sor te ma niara biya kapawaram mu aringiman ikiman, ale balukasan, mu “Imi Egypt nunga ma niara ko munan pa,” makasan. Se nuna sor mu nup beteman Abel-Mizraim.
Gen 50:11 Nup Abel-Mizraim mu ko nunguning mu “Egypt nunga ma”.


12 Jacob ko kuriang alo nu balam butata bita gilingiman. 13 Nuna giman ilak Canaan namaman, ale sor Machpelah, Mamre ko koma worem bausa mu te mutim tuguman. Ali mu girakala Abraham Heth kari Ephron kote dia tam. 14 Joseph ko nuet mutim tuguman, mu ko launuria se kariimet saki ilak taiman mu arungak peleram Egypt namaram.

Joseph ko launuria nunga nguangara menawuram

15 Nunga nonet Jacob kueram, se Joseph ko launuria balukasan, “Aitak awuk a? Joseph ana munan nu kumik te beteman mu ko koma kutuwurokko gomang magawoso agila?” 16 Se nuna den imi Joseph ikiokko beteman se kote namaram, “Anananga nainet me kuera la, ana nika isarnakko balam, 17 kilek memek ana ni kimik te beteman mu ko kamili sapurukko mam. Se ana ka manorsan, ana, nika niet ko Kaem ko ura dungan kari, wore memek ni kimik te beteman mu ko kamili sapurukko.” Se Joseph den mu ikiam ale niaram.

18 Se ko launuria nu kote taiman ale koma dugu te dagulaman. Ale balman, “Ana nika ura dungan kari,” maman.

19 Bare Joseph nunga maonam, “Nina me nguangaralko. Ani Kaem koma me kulukuekko. 20 Nina ulengkala ani memek te aga beteralko iki se baluwaman. Bare Kaem mel nenenga ikia memek mu te aratam mu gurugam se mel ningo ko aratam, se aitak kariimet te me kueman, aitak ningo nuam anisan. 21 Se nina aitak me nguangaralko. Ani nina se ninga kuriang ago ninga sinar taikko.” Joseph den ningo welang te ko laun ari nunga maonam, nongomang lila awuram, ale nguangara menawuram.

Joseph kueram

22 Joseph, ko launuria, se ko nuet ko kariimet arungu eng Egypt bagakasan. Joseph ko yar 110 se nu kueram. 23 Nu bagaram la Ephraim ko kuriang numasari arataman se nungarkam. Se Manasseh ko namar Makir ko kuriang arataman, mu Joseph nunga giam noko kuriang ko nunga awuram.

24 Joseph ko launuria iwita nunga maonam, “Ani kuerikko tom pingi aram. Bare Kaem nina ninga sinar taukko. Ale sor imi te ninga giok ale nengerak ali sor nu balu Abraham Isaac Jacob nungaram mu te nengerak namurukko.”

25 Ale Joseph ko kariimet nunga maonam, “Kaem tairuk ale ninga sangukko tom mu te aninga asokel bilal, ale gial ago sor imi beteral ale namaralko,” mam. Nu sail ago nunga maonam se nuna balman, “Ana butata betenakkowo,” maman.

Joseph ko yar 110 se nu kueram, Egypt sor te. Se ko kumik guang mel siring yawara ago mu te sapa ago namaman, ale patawu ko kuwim nungurman mu ningi beteman.
Gen 50:26 Joseph: Acts 7:9-16 Hebrews 11:21-22.


26 

Copyright information for `WSK