Genesis 6

Kariimet nunga betera kaora memek

Udagi te kariimet pagam ali lilim te nama sapaman. Nuna nunga kuriang imet mu karogo. Se engel memek
Gen 6:2 “Engel memek” masan umutang Satan ko engel saki agila. Hebrew den te bala iwita aniso: “Kaem ko namar ari”. Se den mu Job 1:6 2:1 38:7 te ago aniso se ko nunguning batoga mu te mu iwita: “engel” 2 Peter 2:4-5 ago arikko.
imet itiwik mu nungarkaman yawarakala, se nunga nongomang te nunga kuakasan mu nunga nunuwus ko nunga gikasan.
Se Kari Biya balam, “Ani aga marak sokel tom suen biya te bagara ko mu kariimet mu me nungarikko. Mu awuk se? Mu nuna kariimet, se nuna kuemonko. Aitak se tom udagi kariimet 120 yar iwita baga kuemonko.”

Tom mu te, se tom udagi te, mu kari lagara bibiya nunguningkiri ali imi te bagakasan. Se kari umutang mu imet engel memek arungu nokasan wore nononga kuriang. Nuna kari sokel ago nunguningkiri. Nuna tom mu te ko kari nunup ago.

Kari Biya sor suen biya te kariimet nunga betera kaora arigam mu memek nunguningkiri. Nuna tom suen biya kilek memek ko la ikia tokasan. Se nu nungarkam ale gomang ninguru batagam. Ale nu girakala kariimet ali imi te nunga beteram mu ko me amilmilakaso. Buta se balam, “Ani kariimet suen la nunga menawurikko, ale buruk-kausik inanganang karogotala nunga menawurikko. Ani mel mu suen la nunga beterem bare me ko amilmilasam.” Bare Kari Biya Noah kota suwanta ko amilmilakaso.

Noah

Noah ko dugu duap mu iwita: noko kuriang kari ilagala suwan, Shem, Ham, se Japheth. Noah mu nu kari diram nunguningkiri, tom mu te ko kariimet ningi nu kota ko bagara aolak diram. Nu Kaem ilak kapetaram ale bagakaso.

11 Bare kariimet suen biya Kaem koma te nunga bagara am memek. Kilek memek, kager daong karogo mu ali sor suen biya te pagam sor iram. 12 Se Kaem ali sor lilim la te loagaram mu munan memek ninguru pagam sor iram se arigam. Kariimet suen la nononga bagara siring karogo, se memek nunguningkiri.

Noah dal biya kaolam

13 Se Kaem Noah maonam, “Kariimet suen biya nuna munan memek daong kager ali ewere te bita lagasan. Buta se ani nunga menawu sapirikko, ali karogo maguwurikko,” mam. 14 “Se ni tam yawara yawara arik ale ka dal biya ko kaloko. Ni ningi batoga gotektek awurko. Ale ningi kolta tui, ale ko matangi kolta tui, gagi ningi kapuruk bore ko.

15 “Ni dal iwita kaloko: ko maisa mu 133 metre, ko ulal mu 22 metre, se ko kalel mu 13 metre. 16 Ni dal ko gul kalo, bare dal ko kinikan ago me awete kapeturukko, am awar nuam 44 centimetre iwita bagurukko. Ni dal ningi kawam ilagala suwan kaloko, bo aliti, bo kusumuri, se bo kualala. Ale songkuring bo kinikan ko bitarko. 17 Ani balik se lom biyala ali imi te aratuk ale mel suen la marak anisan mu nunga maguwu sapurukko. Mel suen biya ali te mu am kua sapomonko. 18 Bare ani nikerak den kalosam mu ani nikerak angamang suwanta bagirikko.

“Se ni ka imet kuriang se iton karogo mu dal ningi nama naguralko.
19 Ale iwita bitarko. Ni melmasak marak bagasan mu nunga ningi ilagala ilagala nunga gi, bo imet, bo kari, se dal mu ningi nama nagumon ale me kuemonko. 20 Buruk kausik, inanganang se mel suen biya marak bagasan mu nunga ningi ilagala ilagala kete taimon ale marak bagomonko. 21 Ale na inang duap duap, nenenga mu se, buruk-kausik inanganang nunga, mu karogotala giko.”

Buta se Noah mel suen biya Kaem balam butata bita saparam.
Gen 6:22 Noah: Heb 11:7 2 Peter 2:5.


22 

Copyright information for `WSK