Genesis 7

Yu lom biya aratam

Se udagi te Kari Biya iwita Noah maonam, “Ani ni karkem, mu ni keta kariimet ningi ka bagara aolak diram. Buta se ni ka imet kuriang se iton karogo dal ningi nama naguralko. Ni buruk-kausik na ko, se tama te tua ko, mu suen la nunga ningi kari 7 se imet 7 nunga gi gi ago namarko. Se mel saki ningi mu imet suwan la, kari suwan la nunga gi gi namarko. Ale inanganang duap suen la ningi kari 7 imet 7 nunga gi gi namarko. Ni suwuta bitar mu nuna me kuemonko, udagi te nononga gue paguk ale ali imi te sor terong maukko. Se tom 7 namuruk mu ani balik se ali imi te tuwik biyala kapurukko, woremkalal 40 se turom 40. Se mel suen biya marak ago nunga beterem mu tuwik imi te nunga menawurikko.”

Se Noah mel suen biya Kari Biya balam uwutata beteram.

Noah yar 600 bagaram se lom biya ali imi te kaparam. Nu ko imet, ko kuriang kari, se nunga imet karogo nuna lom biya mu te memek me aringimonko se nuna nama dal biya mu te aragaman. Buruk-kausik inanganang likilim ningi imet kari, imet kari, Noah kote taiman se arungak dal aragam, Kaem Noah maonam se butata beteram. 10 Se tom 7 mu namaram se lom biya aratam ale ali iramuram.

11 Noah ko yar 600 mu ko ningi sige 2 ko tom 17 mu te ali kuring papak mam se yu biya ali ningi aratukaso. Se kualala taiti kuring pagam se 12 tuwik biyala kapakaso, woremkalal 40, se turom 40.

13 Se tom umutang te la Noah, ko imet, ko kuriang ilagala suwan, Shem, Ham, Japheth, se nunga imet karogo, mu dal biya mu te aragaman. 14 Se buruk-kausik duap suen la, giarum ko, wonong ko, gotektek, bibiya, se inanganang duap duap arungak dal te aragaman. 15 Se buruk-kausik inanganang kari te imet te mu Noah ilak dal te aragaman, Kaem balam iwitata bita gilingiman. Se Kari Biya kota dal kuring baguram.

17 Lom biya am kapawaram nama tom 40, se yu tuagu lagaram ale dal patowaram karogo tarigiram. 18 Yu tarigiram du biya, se dal kualala yu awete patawakaso. 19 Se yu biyala nunguningkiri tarigiram, duruk bibiya suen la kaluwuram namakaso. 20 Yu tarigiram duruk kiaram namaram 7 metre. 21 Se ali te mel suen biya marak sokel karogo mu kua sapaman: inanganang, buruk-kausik, kariimet, suen la kua sapaman. 22 Ali te mel suen la marak karogo mu kua sapaman. 23 Kaem ali te mel suen biya marak ago mu nunga maguwu saparam, kariimet, buruk-kausik, inanganang. Se kari suwanta ko imet kuriang se iton karogo arungak dal ningi bagaman mu nongota yu lom te me kueman, am yawarakala bagaman. Se lom kumik me kueram nama tom 150 mu te katir katir pila pila taikaso.

24 

Copyright information for `WSK