Genesis 8

Lom nukum

Bare Kaem Noah se buruk-kausik suen biya dal te ilak bagakasan mu me nunga kuamili saparam, am nunga sinar towakaso. Se nu balam se daula aratam se yu kueram kapakaso. Aliti yu kuring kaolam, ale kualala tuwik kuring kaolam, tuwik me kapurukko balam. Tom 150 mu ningi yu lom kumik kueram pila pila namakaso. Se sige 7 ko tom 17 mu te dal nama duruk Ararat awete sanamaram. Se yu kueram am kapawakaso nama sige 10 ko tom 1 mu te duruk aratu aratu namaram.

Udagi te tom 40 namaram, se Noah ko dal ko kuring gotek bo kaogam. Ale inanganang gaogao bo beteram se aratam namaram. Bare yu me marakakaso se am binga lagakaso, me peleram tairam. Se Noah aking inanganang biton bo beteram se aratam namaram, nu te ikiokko yu marakam agi mena agi wore ko. Bare yu am laiwakaso, se biton namaram sor arigam, mu nu kuwim te daigokko wore mena, se peleram dal te tairam. Se Noah kuting garukuam se te daigam, se to ningi beteram.

10 Noah aking tom 7 baga aking biton mu beteram se namaram. 11 Bainga ningi peleram tai kote aratam, noko kore te olive gawa gurek bo tam ale karogo tairam. Mu te Noah ikiam sor marakam. 12 Se nu tom 7 akingtala kimi beteram ale biton mu beteram se aking namaram. Tom mu biton mu udagi me peleram tairam.

13 Noah ko yar 601, se yar mu te sige 1 ko tom 1 mu te sor marakam. Noah dal gul sang batogam mu te sor arigam gurugam, mu sor marakam namawaram se arigam. 14 Se sige 2 mu ko tom 27 mu te ali maraka saparam.

15 Se Kaem Noah maonam, 16 “Ni dal bitar ale ka kuriang imet iton karogo kaparalko. 17 Se buruk-kausik inanganang suen biya nina nengerak kapomonko. Nunga gue paguk ale sor suen biya te nama dagimonko,” mam. 18 Buta se Noah dal beteram, ale ko imet kuriang iton karogo kapaman. 19 Se buruk-kausik inanganang suen la dal te nunga tuguman mu koma suwan mu eng numi gi gi kapakasan.

Noah Kaem tama bita tuam

20 Noah Kaem tama tua ko kuwim nungam, ale buruk-kausik inanganang nana ko se tama te tua ko mu ningi suwan suwan nunga giam nunga moram, ale tama awete nunga awuram se kaniman, se Kari Biya te tama bita tuam.

21 Se Kari Biya tama umu siring yawara ikiam ale gomang ningi la balam, “Ani udagi kariimet ko kilek memek mu te ali sor me menawurikko. Ani ikisam, ikia memek tom nuna gotektek la karogo lagasan nama karogo nungumik garukoso. Buta se ani udagi mel marak suen la me nunga maguwurikko.

22 “Tom ali imi aniso mu munan imi me menarukko:
inang aguwa ko tom se inang gia ko tom,
sor ipi se sor kowar,
se worem tom se tuwik tom,
se woremkalal se turom, am butata anirukko.”
Copyright information for `WSK