Genesis 9

Kaem Noah ilak den kaolam

Kaem Noah se ko kuriang ago marak den nungaram ale balam, “Kuriang suen biya iluwal se nunga gue ali sor suen biya terong maukko. Aliti buruk-kausik inanganang wal suen biya mu nenenga nguangomon, se nina nunga bitualko. Nina mel suen biya umutang am nunga nalko. Ani ulengkala ulang sume nina nalko ningarem iwitatala, aitak ani mel suen biya ningarsam, mu nina am nalko.

“Mel suwanta nina me nalko, mu mel nunguning gue biyala ago mu me nalko. Mu awuk, mu gue marak karogo se. Kari awiriya kari bo moruk se kueruk, mu nu koma ikup taukko. Se buruk-kausik bo kari bo moruk se kueruk, mu koma moral se kuerukko.

“Ani Kaem se kari aninga turantala beterem se aratam.
Buta se kari awiriya kari bo moruk se kueruk,
mu nu betelatala kari nuguting te kuerukko.
“Bare nina mu kuriang suen biya iluwal se nunga gue ali sor suen biya te namomon bagomonko.”

Se Kaem Noah ko kuriang karogo nunga maonam, “Aitak ani ni se ka kuriang se gue udagi aratukko mu den imi ninga manorsam, 10 ale mel suen biya marak karogo, buruk-kausik inanganang dal ningi bagaman wore munan imi nuna karogo nungarsam. 11 Den ninga manorsam mu iwita: mel marak anisan mu udagi tuwik lom biya me ta nunga maguwurokko. Aking udagi lom biya sor me maguwurokko tala.”

12 Kaem akingtala balam, “Ani magulep bitirik se taiti nuwi ningi aratukko. Mu te nina arigal ale te ikialko, ani udagi ali sor likilim la tuwik lom te me maguwurikko. 14 Tom ani taiti nuwi bitirik se aratuk, se magulep karogo aratuk se arigek, 15 mu ani den nengerak kalem mu ko ikiekko, ani nina, buruk-kausik, se mel suen biya udagi yu lom te me ninga maguwurikko. 16 Tom ani magulep taiti nuwi ningi aratuk se arigek, mu aninga den nina se, mel suen biya marak anisan mu nengerak kalem mu ko ikia taikko, (mu awuk,) den mu tom suen biya anirukkowo.”

17 Kaem udagitala Noah maonam, “Aninga den nina se mel suen biyala marak bagasan nengerak kalem mu magulep te la ko ikialko.”

Noah ko kuriang alo

18 Noah ko kuriang dal beteman ale tai aliti kapaman mu Shem, Ham, se Japheth. Se Ham mu Canaan ko nuet. 19 Noah ko kuriang ilagala suwan umu kariimet suen biya ali imi te anisan wore nunga taleng girigir.

20 Noah mu ningam ura iluwa ko kari. Se nu ningam beteram
Gen 9:20 Bala bo mu iwita: “Se nu kota giram ningam beteram ale mayang waen ningi aguwam.”
ale mayang waen ningi aguwam.
21 Udagi nu waen sang nam ale ngualaram, ale ko guang kutuwu waram ale nunguning la ko kawam sel ningi aniwakaso. 22 Se Ham, Canaan ko nuet, mu tairam, ko nuet nunguning la aniwaram se arigam, ale peleram namaram ko launuria ilagala mu nunga maonam. 23 Se Shem Japheth ilak guang bo taman ale nubiwinang te beteman ale nubiring ko aolak iluman nama kawam sel ningi kasu naguman, ale nonet nunguning la aniwakaso wore aringimon bore ko, nomotam kaluwu se guang taman nonet te ereman.

24 Se udagi te Noah ko ikia dirmam, se ko kuriang Ham nu kumik te kilek beteram mu ko den ikiam. 25 Ale nu kuriang umu ko den iwita balam:

“Canaan mu ikup biya nunguningkiri irokko!
Nu noko launuria nunga dungan kari ko bagurukko.”
26 Ale aking balam,
“Ana Kari Biya, Shem ko Kaem, wore nup patowanakko!
Canaan nu Shem ko ura dungan kari ko bagurukko.
27 Kaem baluk se Japheth ko taleng girigir suen biya aratukko!
Ale nuna Shem ko taleng girigir arungu wete bagomonko!
Se Canaan Japheth ko ura dungan kari ko bagurukko.”
28 Yu lom menaram mu Noah 350 yar agotala bagakaso. 29 Umu te noko yar tom nama 950 se kueram.

Copyright information for `WSK