Hebrews 12

Ana Jesus la arikuawunakko

Kariimet motam biya nongomang ningi nunguning imi nanga taluru guruguman anisan. Buta se ana anapeya mel ikup, se kilek memek nanga kalowoso, mu kututuwu warnak, ale ikia suwanta te lage Kaem balu nangaram mu te la nagunakko.
Heb 12:1-3 Ana Jesus la arikuawu se sokel ago nagunakko: 1 Cor 9:24-25. Ana noko molak karonakko: Mat 10:24-25.
Ale Jesus la arikuawu se nagunakko. Nu la anananga nangamang ningi nunguning ko duap se kota tala ko nukum bagoso. Nu amilmil biya tom udagi te bagurukko mu ko iki se tam kangono te dolara taukko mu mel yam ko balam. Ale ikup yaman giam ale kueram. Ale nu aitak barasam nama Kaem ko kuting sengam mu te dagiwoso. Se umutang ko, nu te ikialko. Nu kari memek alo ninguru bita maguwukasan, bare nu am sokel ago sanamiwakaso. Se mu te ikial ale nina me nguangaral ale me meralko, am aora biya bagaralko. Nina kilek memek menawuralko karogo kaeya lagaman, bare mu ko memek bo me taman, ale ninga gue bo me kaparam.

Agi nina nengemang sokel tualko den Kaem ninga maonam mu ningamili saparam agila? Nu balso nina noko kuriang maso, ale balso:

“Aninga kuriang, tom Kari Biya ni te giris meko ikup katir kisok,
mu am kutek me ale ikiko.
Ale ining kisok, mu gemang me batagukko.
Mu awuk, Kari Biya awiriya ko kueso mu te giris maukko ikup tuso.
Ale awiriya noko kuriang ko awuso, mu te giris palagukko memek tuso.”
Heb 12:5 Proverbs 3:11-12.

Se ikup giwasan agi mu, am gi sagaralko. Ale iwita ikialko, ana Kaem ko kuriang, se ana te diram la baganakko ikup nangarso.
Heb 12:7-11 Kaem ana te diram la baganakko ikup nangarso: Deut 8:5; 2 Sam 7:14; Pro 13:24; 1 Peter 1:6-7.
Kuriang awuk bore yam bagoso ya, se te giris maukko nuet ikup mu me tuso e? Mena.
Kaem ko kuriang suen la ikup nungarso. Se nina ikup me tal, mu ko ikia nina noko kuriang mena, nina kuriang nonet mena iwita.

Ali imi te ana suen la nanga nainet alo te giris palaganakko alis nangarukasan, se mu ko ana nunga nguanga se nunup patawukasan. Buta se anananga Nainet Biya, ko Bur te marak sokel nangarso, mu ana ninguru kuring karo tunak ale marak baganakko! 10 Anananga nainet alo mu tom ana gotektek bagakasan mu te la, nongota nunga ikia te la, ining nangarukasan. Bare Kaem mu nanga sangukko ikup nangarso, mu ana nu turan laili se kako baganakko butata beteso. 11 Se tom ana te giris palaganakko ikup nangarsan se gisan, mu ana me amilmilasan, ana yaman kua se bagasan. Bare ana ikup mu am karo tunak ale bowa ningi namanak, mu ko nunguning udagi te bagara ningo diram se nangamang lila umu te baganakko.

12 Se umutang ko, nisiwik nigiting kua gugum awurok agi mu, sokel tual ale, 13 lage diram kaoralko. Umu te bo suwik memek agi mu, suwik mel bo te me soruruk, mu am ningo la aolak iluwokko.
Heb 12:12-13 Isaiah 35:3-4 arikko.


Kaem nabiring me tua ko den / Ana Kaem nabiring me tunakko / Sinar den

14 Nina kariimet suen la arungu lila te se welang te bagara ko munan mu ko sail tagiralko. Ale kako bagara ko munan mu ago ko sail tagiralko. Mu awuk, nina kako me bagaral, mu nina Kaem me arigalko. 15 Ninimi ko ninguru sinar talko! Ninga ningi bo Kaem ko lila yawara buring tuok bore ko. Agi bo tam memek mu turan tarigiruk, ale ko nunguning no kuera mu te kariimet suen la kuera nungaruk bore ko.
Heb 12:15-17 Esau: Gen 25:33-34; 27:38.


16 Aking ninga ningi saman katagot aniruk bore ko. Agi bo Esau beteram turan, Kaem buring tuok bore ko sinar talko. Esau mu kuriang laun, bare nu tom suwanta ko inang mu diarukko negeram ale nu kari laun wore ko marak saparam. 17 Nina ikisan, nu udagi lage bo arigok ale te aking marak mu taukko i makaso, ale ko nia se loaga lagakaso, bare mena. Ko nuet ko ikia me ta gurugukaso.

Duruk Sinai se Duruk Zion ko den
Heb 12:18 Duruk Sinai mu Kaem ko Law Den umu ko balso: Exo 19 se 20; Gal 4:24. Se Duruk Zion mu lage iru Jesus beteram umu ko balso: Heb 7:19; 10:20.

18 Duruk nina te taiman mu duruk namatam te ariga ko mu iwita mena, mu Israel alo Duruk Sinai te tai arataman mu iwita mena. Tom mu te pure, tama kuamili biya, se tiromorom biya aratuwakaso. 19 Se biugel niakaso se kuring bo munakakaso, se kariimet ikikasan ale nguangakasan. Ale Moses manaru diruwukasan ale balukasan, “Ana kuring mu bo ago munakuruk se ikinakko me ko kuesan!” ma balukasan. 20 Mu awuk, kuring mu iwita balam, “Ikialko! Kariimet bo agi, sipsip mel bo agi, duruk imi ilu tauk, mu am usagal se kuerukko,” ma balam. Se nuna mu ko ninguru nguangakasan. 21 Mel suen biya aratukaso mu nuna nguangara nungarukaso. Se Moses betela balam, “Ani ninguru nguangasam tala, ale angimik barawara maso,” mam.

22 Bare nina duruk mu te me taiman. Imi Duruk Zion nina te taiman, mu Jerusalem wonong kualala, mu Kaem marak bagoso wore ko wonong biya. Se mu te engel suen biya nunguningkiri, nunga kaura ko koma mena, biguwuman ale amilmil bitawasan.
Heb 12:22-23 Duruk wonong: Gal 4:26; Rev 5:11; 21:2. Kaem ko kariimet nunga nunup mu te aniso: Luke 10:20.
23 Ale nina tai Kaem ko kariimet nunga nunup duruk wonong te aniso mu arungu biguwuman. Ale nina Kaem kote taiman, nu kariimet suen la nunga Tutera Kari. Se kariimet Kaem nunga balam kariimet ningo diram mam se baga kueman, mu nunga nodora yawarakala noko wonong te ilak anisan. 24 Ale nina Jesus kote taiman. Mu nu den iru Kaem nego ko nungam mu ko priest supuling, se noko gue nina nego ko kaparam mu aniso. Se gue umutang Abel ko gue mu kiaram. Mu awuk, Abel ko gue mu memek koma kutuwura ko baluwoso.
Heb 12:24 Abel: Gen 4:10.
Bare Jesus ko gue mu Kaem nanga memek siwu saparam mu ko nanga manaruwoso.

25 Se nina ninguru sinar talko! Nina Kari ninga manaruwoso mu ko kuring me batogalko! Kariimet girakala ali imi te Kaem ko kuring nunga manaruwaram mu batagorman, mu nuna suen la memek to gilingiman. Se aitak Kari duruk wonong te nanga manaruwoso mu kuring batagornak, mu ana memek me tanak i? Mena, ana memek ninguru tanakko! 26 Tom mu te noko kuring aratuwakaso mu ali uririkikaso. Bare nu aitak den bo aking balam, “Udagi te bo agotala aking ali yukuekko. Bare ali la mena, taiti sige baras agotala.”
Heb 12:26, 29 Haggai 2:6; Deut 4:24.
27 Se den “bo agotala” maso mu iwita: mel suen la beteram mu yukuok se mena namomonko. Se mel gek am mu la am animonko.

28 Bare ana kingdom aora biya, me yukuok ale dagulokko, mu ana taman. Umutang ko ana Kaem amilmil tunakko! Ale nu ko nguanga se munan nu ko amilmilurukko mu te la nup patowanakko. Mu awuk, anananga Kaem mu tama gigip biya nunguningkiri, mel kaiso se kani saposo wore turan.

29 

Copyright information for `WSK