Hebrews 4

Naneman sapara yawara mu Kaem ana nangarso

Kaem ko den ningo ana nago ko balam, kariimet noko kuwim lila mu ningi kasu nagumonko ma balam, mu aitak den mu am sanamaram aniso. Buta se ana ninguru sinar tanakko, nanga saki alo lila yawara owore me aringimon bore ko. Israel kariimet ikiman iwitatala, ana den gilalong yawara ikiman. Bare nuna den mu ikiman bare me ko nongomang ningi nunguning aram, buta se den umutang me nunga saongam. Bare ana kariimet nangamang ningi nunguning aram mu kuwim lila mu ningi kasu nagusan. Kaem nu kariimet nongomang ningi nunguning mena alo mu nunga iwita balam:

“Ani angamang magaram se den aora biya balem,
‘Nuna aninga kuwim lila mu ningi me ta utu nagumonko!’ ma balem.”
Heb 4:3-4 Psalm 95:11. Kaem noman saparam: Gen 2:2.

Nina ikisan, Kaem ali mel suen biya beteram mu te ko ura kueram.
Mu awuk, batoga bo te tom 7 mu ko iwita balso: “Kaem ko ura bita saparam, asele tom 7 umutang te noman saparam.” Se batoga ana maingkala ninga kasurman mu te, Kaem nongomang ningi nunguning mena alo mu nunga iwita balam, “Nuna aninga kuwim lila mu ningi me ta utu nagumonkowo,” ma balam.

Buta se ana ikisan, kariimet saki mu kuwim mu ningi kasu nagumonkowo. Kariimet girakala den gilalong yawara ikiman mu me ko nongomang ningi nunguning aram, se kuwim lila mu ningi me kasu naguman. Se umutang ko, Kaem tom ulengkala David ko kuring te tom bo tala, aitak es te bagasan imitang, ko iki se balam:

“Nina aitakta Kaem ko aira ikial mu karo tualko,
nengemang aora biya me bagaralko,” ma balam.
Heb 4:7 Psalm 95:7-8. Kaem ko gomang biyala ana noko lila ningi kasu nagunak ale ilak naneman sapanakko, umutang ko nu balso, “Aninga aira ikialko,” maso.

Mu ana den mu maingkala ninga kasurman se ikiman.

E Joshua anananga taleng girigir arungu kasu naguram ale mu, Kaem udagi tala David kuring te tom bo aitakta imi ko ago me balam ale. Bare nu David kuring te uwutata balam.
Heb 4:8 Joshua mu Israel alo arungu ali sor Kaem balam mu ningi arungu namaram. Bare Kaem mu ana noko lila kuwim ningi ilak baganakko wore ko baluwoso.
Buta se mu te ana ikisan, Kaem tom 7 mu te noman saparam iwitatala, noko kariimet nunga nonoman sapomonko tom karogo. 10 Mu awuk, Kaem noko ura menawuram ale noman saparam iwitatala, awiriya Kaem ko kuwim lila ningi kasu naguso, mu noko ura kua saposo se nu noman sapurukko.
Heb 4:10 Anananga ura: John 6:29. Kristus te ana nangamang suwanta Kaem ilak bagasan: Rom 5:1; 8:1-2. Ale lila te bagasan: Mat 11:28-30.
11 Buta se ana kuwim lila mu ningi kasu nagunakko ninguru sail taginakko. Nanga saki alo nanga taleng girigir beteman iwitatala, Kaem ko kuring batagarmon ale lila yawara me aringimon bore ko.

12 Kaem ko den marak sokel ago, ale sokel agotala ura iluwoso. Ale betela batir koma singsang kore wuli kapawara mu kiaram tala. Mu nu kari gomang motam atumokko, ale ningi biya namuruk, se kota ko ikia gomang aguwaya te bagoso mu ko ikiokko.
Heb 4:12 Kaem ko den: 1 Peter 1:23; Rev 2:12.
13 Mel suen biya Kaem beteram mu bo ta noko motam te yumurokko mena. Mel suen biya mu noko motam te am wetang te biya. Nu kota suwanta ana moke dugu te sanamanak ale nanga dugu duap balnakko.

Jesus mu anananga Priest Supuling Biya

14 Buta se, ana nangamang ningi nunguning ninguru ilukuawunakko. Mu awuk, anananga Priest Supuling Biya ago, nu duruk wonong te nunguningkiri Kaem koma te namaram, umutang Jesus, Kaem ko Namar. 15 Ana nangata mu nasokel mena. Bare anananga priest supuling mu gomang motam ana me nangarukko iwita mena. Mu nangarukkowo. Mu awuk, ira ariga ko lage suen biya ananangate aratoso iwitata, nukote aratukaso, bare nu kilek memek bo me beteram. 16 Buta se, ana me nguanganakko, ana Kaem kote pingi namanakko. Nu gomang nangaruk, nanga memek siwurok, ale nanga ikup suen biya te nanga sangukko.

Copyright information for `WSK