Hebrews 8

Jesus duruk te anananga Priest Supuling bagoso

Den ana baluwasan mu ko den gira aniso mu iwita: mu anananga Priest Supuling yawara karogo. Nu duruk wonong te Kaem Sokel Karogo Nunguning mu ko kuting sengam mu te dagiwoso. Nu kuwim kako nunguningkiri mu te priest ura bita se bagoso. Se kuwim umutang kuwim nunguning, aliti kari me nungurman, mu Kaem Biya kota nungam.

Priest supuling suen la nunga ura mu nuna Kaem tama tumonko. Ale melmasak kariimet munan betesan mu ago Kaem tumonko. Se Jesus mu priest supuling, se nu agotala Kaem tama tuokko. E nu ali imi te bagoso ale mu, nu priest ko me bagoso ale. Mu awuk, ali imi te priest saki alo Kaem tama tumonko mu ago, Law Den te balam butata.
Heb 8:4 Tom kari den imi batogam mu temple Jerusalem wonong te mu am anikaso, se priest alo tama bita Kaem tuikasan.
Nuna kuwim kako ningi ura tasan. Bare ura umu mu duruk wonong te mel nunguning aguwaya aniso wore am ko kausa, ko koma tata. Umutang ko, tom Moses sel te kawam kako bangokko negawaram, mu Kaem nu maonam, “Ninguru sinar toko,” mam. “Mel ani duruk Sinai awete ko dora ka kausem mu turan te mel suen la diram tala bitarko,” mam.
Heb 8:5 Nononga ura mu kausa iwita: Col 2:17; Exodus 25:40.


Bare ura Jesus tam ale iluwoso mu sokel karogo, priest saki alo nunga ura mu kiaram. Mu awuk, den iru Kaem Jesus te kaolam se ko priest bagoso umutang sokel karogo, marak yawara yawara ko balso. Se den girakala Kaem Moses ilak kaolam mu kiaram.

E den Kaem giram Moses ilak kaolam umu ningi memek bo mena ale mu, nu udagi den bo iru me kaolam ale. Bare Kaem kariimet nunga memek arigam ale balam:

“Ani Kari Biya iwita balsam, tom tai aratuk se
ani Israel kariimet se Judah kariimet arungu den bo iru nungekko.
Se den iru umutang mu, tom ani nunga taleng girigir Egypt ningi bagaman se nunga giem ale arungu tai se arungu den nungem mu iwita mena.
Mu awuk, nuna aninga den mu me karo tuman.
Se ani abiring nungarem.
Ani Kari Biya butata balem.
10 Ale aking balsam, den ani Israel arungu nungekko mu iwita:
Tom mu te aninga munan den nunga ikia te bitirik,
ale nongomang te bataguru bitirikko.
Ani mu nononga Kaem bagirik, se nuna mu aninga kariimet bagomonko.
11 Se nunga bo ta barasuk ale ko bo me ikia kausokko,
ko bagara suwan me manuk, ‘Kari Biya ko ikiko,’ ma me balukko.
Mu awuk, nuna nunup ago ta, nunup mena ta, suen la aninga ikimonko.
12 Mu awuk, ani nunga memek siwurek ale udagi me ko ikiekko.”
Heb 8:8-12 Jeremiah 31:31-34.

Kaem den iru mu ko balu se den giram aniram mu sokel menawuram. Se ana ikisan, mel nama garukoso ale sokel menaso, mu tom katirta ko baga eng menaso.

13 

Copyright information for `WSK