John 10

Jesus mu Sipsip nunga Bitua Kari Yawara

Jesus balam, “Ani nunguningta ninga manorsam, kari sipsip ko kar kuring te diram me kaposo, kar kuali kaposo, mu nu tere daong kari. Bare kari kar ko korang nunguning te kaposo mu nu sipsip bitua ko kari nunguning, se lage korang nunguning te kasu kaposo. Se tom nu taiso mu lage korang bitua ko kari mu korang kagaru tuso. Se sipsip noko dogotak kuring ikisan. Nu ko sipsip suwan suwan nunup te nunga aruso se kote taisan, se arungak kar buring ko aratoso. Se noko sipsip suen la aratasan mu nu giriso se kowom karosan. Mu awuk se kowom karosan? Mu nuna noko kuring dogotak ko ikia se. Bare nuna kari bo kilimik kowom me karomonko, nuna nagumonko, mu awuk, nuna noko dogotak kuring me ikia se.”

Jesus den ira imi nungaram, bare nuna ko nunguning me ko ikiman. Buta se nu aking balam, “Ani nunguningta nunguning ninga manorsam, ani sipsip nunga kar ningi kasu nagumonko nunga songkuring ani. Kari sang giriman tai gilingiman mu nuna tere daong kari. Bare sipsip nononga nuguring me karoman. Ani agata sipsip nunga songkuring. Kari awiriya aningate tairuk ale kar ningi kasu nagurok, mu Kaem nu aru taukko. Se ani nu bituek se kasu nagu aratu se, na ningo no se, yawarakala bagurukko. 10 Tere kari nu sipsip nunga moruk maguwurok ale tere naukko taiso, nu mel bo ko me taiso. Bare ani tairem mu sipsip te marak ningo tamon ale marak sokel nungumik ago terong mauk se amilmil te bagomonko tairem.

11 “Ani sipsip nunga bitua kari yawara.
John 10:11 Sipsip nunga Bitua Kari: Psalm 23:1. Nu memek taso ale kueso: John 15:13.
Sipsip bitua kari ningo mu nu sipsip te yawarakala bagomonko nu memek taso ale kueso.
12 Kari manga ko ura taso, ale nu sipsip nunga bitua kari nunguning mena se sipsip mu noko mena tala, mu nu kausik diwang taiso se arigiso mu nu nunga beteso ale naguso. Se kausik diwang sipsip nunga moso ale nunga karoso parasuwuso se ngual ngual namasan. 13 Bitua kari naguso mu ko duap iwita: nu manga ura taso, ale nu sipsip nunga ikia me taso ale nu naguso.

14 “Ani sipsip nunga bitua kari yawara. Aninga Ait aga ikiso se ani noko ikisam turantala, aninga sipsip nunga ikisam se nuna ani ago ko ikisan. Se ani sipsip te yawarakala bagomonko memek taik ale am kuerikko. 16 Ani aninga sipsip saki ago, nuna motam imi ko mena. Bare ani nunga giekko, se nuna aninga agiring ikimonko. Se udagi sipsip motam suwan aruk se nunga bitua kari suwanta kowo.
John 10:16 Sipsip motam suwan arukko: John 11:52.


17 “Aninga Ait ani memek taik ale kuerikko mel mu ko ninguru aga kueso. Aninga sipsip te yawarakala bagomonko memek taik ale kuerikko; ale udagi aking marak barasikko. 18 Kari bo aga moruk se kuerikko me terong. Ani agata aimi ikiem nunga bitirik se aga momon se kuerik ale aking maragirikko mu ko terong maem aimi ikiem, se aga momon se kuerikko. Ani uwutata bitirikko aga Ait balam se.”

19 Noko den mu te akingtala Juda kariimet pagaman motam ilagala arataman. 20 Kariimet suen biya balukasan, “Nu bur memek kumik ningi aniso se ngualoso. Se nina anape ko ko den owore ikisan a?”

21 Bare saki balukasan, “Kari imi kari bur memek ago iwita me munakoso. Agi kari bur memek ago mu kari nomotam sisira mu nomotam nungok se loagomon i?”

Juda supuling alo Jesus ilak bitakasan

22 Sor ipi ko tom te Juda nunga tom biya bo Hanukkah masan mu Jerusalem kaparam.
John 10:22 Tom biya mu ko duap iwita: 167 B.C. Syria alo taiman ale Juda alo nunga temple ningi munan memek bitakasan. Se 164 B.C. mu te Juda alo nunga karoman ale temple nungurman laili awuman ale korang kagorman, mu ko amilmil bitakasan.
23 Se Jesus temple ko kar ningi, kuwim Solomon ko nup te beteman mu te geragawaram, 24 se Juda kari sang taiman talurman ale isarman, “Kam maiya biya nika dugu duap ana ko nangamin yena lagakaso. Se ni amaru nanga manaruko? Ni Kristus agi mu wetang te baluko!”

25 Se Jesus nunga maonam, “Ani ulengkala ninga manem, bare nina aninga den ko me nengemang ningi nunguning aram. Kilek kasa aninga Ait ko nup te betesam mu ani awiriya mu nina ninga kasurso. 26 Bare nina aninga sipsip mena se ani ago ko me nengemang ningi nunguning aso. 27 Aninga sipsip aninga agiring ikisan ale karo tusan. Mu ani nunga ikisam, se nuna ani agowom karosan. 28 Se ani marak nunguning tom suen biya te bagomonko mu nungarsam. Buta se nuna me kuemonko, mena. Kari bo ani agiting te nunga kututuwu giokko me terong.
John 10:28 Jesus ko kariimet ninguru nunga sinar taso: John 6:39; 18:9.
29 Aninga Ait nuna ani agiting te nunga awuram, se nu sokel nuam, nu mel suen biya nunga kiaram. Se kari bo noko kuting te betela nunga giokko me terong. 30 Aninga Ait ilak ana suwanta.”

31 Se Juda alo aking manga giman ale te momonko. 32 Bare Jesus nunga maonam, “Aninga Ait ko kilek ningo ningo suen biya ani nina nemekete beterem se aringiman. Se nina kilek awuk bore ko aninga moralko?”

33 Se Juda alo noko den koma balman, “Ana kilek kasa ningo ko nika monakko me kaesan. Mena. Bare ni Kaem ko nguanga se den me balsam borta ko ka monakko. Mu awuk, ni kari yam, bare ni nimi Kaem ko balsam.”
John 10:33 Kaem nup balu maguwura: Lev 24:16; John 5:18.


34 Se Jesus nunga maonam, “Bare Kaem ko den bo balam mu nenenga munan den te iwita batagorman se aniso, “Nina kaem iwitata,” mam.
John 10:34 Psalm 82:6.
35 Kaem ko den kariimet nongote tairam mu te Kaem kota nunga balam nuna kaem iwitata ma balam. Se kariimet Kaem ko den maguwumonko me terong, Kaem ko den tom suen biya anirukkowo. 36 Bare ani mu Kaem kota aga balam ale aga beteram se ali imi te tairem. Se ani balem, “Ani Kaem ko Namar,” maem, se nina awuk se balsan ani Kaem balu maguwusam masan?

37 “E ani aga Ait ko ura ningo me bitirik mu asele nina ani ago ko me nengemang ningi nunguning arukko. 38 Bare ani noko kilek kasa nunguning betesam. Ikialko. Nina aninga den ko nengemang ningi nunguning arukko me ko kuesan agi mu, nina kilek duap duap ani betesam mu ko ikia tal ale nengemang ningi nunguning arukko. Umutang te nina ani Ait ilak, se Ait ani agarak, mu ko ikialko.”
John 10:38 Nuna Jesus kilek bitakaso mu te am noko nongomang ningi nunguning arukko: John 14:10-11.


39 Nu buta balam se aking udagi tala talipomonko negeman, bare nu nunga beteram ale namaram.
John 10:39 Nuna Jesus ilumonko me terong: John 7:30; 8:59.


40 Udagi peleram aking yu Jordan komasang te kuwim ulengkala John te kariimet nunga anukaso mu te namaram bagakaso. 41 Se kariimet suen biya nukote taikasan. Nuna balukasan, “John kilek biya bo sokel ago mu me beteram, bare nu den suen biya kari imi ko balam mu nunguningta.” 42 Se sor mu ko kariimet suen biya Jesus ko nongomang ningi nunguning aram.

Copyright information for `WSK