John 11

Lazarus kueram

Kari bo ko wonong Bethany wore kuera tam ago bagaram, ko nup Lazarus. Nu ko koras ilagala Maria Martha arungu Bethany bagakaso.
John 11:1-2 Lazarus, Maria, se Martha: Luke 10:38-39; John 12:3.
Se imet Maria mu borta Kari Biya suwik te ko yu siring yawara mu waram ale mone te kaogam. Lazarus kuera tam, se korasari ilagala mu Jesus kote den beteman, “Kari Biya, ka bo, ka yawara mu kuera tam.”

Se Jesus den mu ikiam ale balam, “Lazarus kuera tam mu eng te nama kuerukko mena. Mu Kaem ko sokel wetang te aratuk se kariimet aringimon ale te nup patawomonko ewere ko tam. Se noko Namar te nup biya taukko,” ma balam.

Jesus mu Martha Maria se nunga nogoras Lazarus ninguru nunga kuakaso. Bare nu Lazarus kuera ago mu ko den ikiam mu nu kuwim te bagoso mu te tom ilagala ko am bagakaso. Asele nu ko olekem nunga maonam, “Ana Judea pelenak namanakko.”

Se ko olekem nu manorman, “Kari Biya, sor mu te Juda alo ni manga te ka usagomonko kerak kaeman! Se awuk se tom maiya mena aking sor mu te piler namarko?”

Bare Jesus nunga maonam, “Worem suwanta te hour 12 nikitang karogo. Kari woremkalal aolak iluwok, mu nu mel bo te me dagulokko, sor nikitang ago se. 10 Bare nu turom aolak iluwok, mu nu dagulokko, nikitang mena se.” 11 Jesus den mu balam, asele nunga maonam, “Anananga bo Lazarus aniwoso. Se namanak ale ani amumek se maragurukko,” mam.

12 Se ko olekem balman, “Kari Biya, nu yam aniwoso agi mu, nungerukko pa!” maman.

13 Jesus Lazarus kueram wore balukaso. Bare ko olekem nu am aniwoso wore balso ko balukasan. 14 Buta se Jesus wetang te nunga maonam, “Lazarus kueram,” mam. 15 “Se ani nu ilak mena se kueram mu ko ani amilmilasam. Mu awuk, mel bo aratuk se nina ani ago ko nengemang ningi nunguning arukko se. Buta se kote namanakko.”

16 Se olekem bo Thomas, ko nup bo Didymus masan, mu nu ko ura suwan nunga maonam, “Aria, ana namanak ale Jesus ilak am kuenakko!”
John 11:16 Thomas: Mark 14:31; John 20:24-28.


Jesus nu kariimet nunga maraguwurok se marak tamonko ko supuling

17 Se Jesus Bethany nama aratam, mu Lazarus mutim tuguman se kam ilagala ilagala mutim ningi bagaram mu ko ikiam. 18 Bethany mu Jerusalem ko pingita, 3 kilometre iwita, 19 se Juda kariimet suen biya Bethany wonong, Martha Maria nononga nogoras kueram wore ko nongomang ira arungu worem kanimonko taiman nongorak bagaman.

20 Se Martha Jesus taiwoso ko den ikiam ale aratam, ale arigokko namaram. Bare Maria am kawam te bagaram.

21 Se Martha nama arigam ale maonam, “Kari Biya, ni imi te bagerem ale mu, aninga agoras me kueram ale. 22 Bare ani ikisam, aitakta imitang nika gemang te mel ko kuar ale Kaem aru mu am kisokko.”

23 Se Jesus nu maonam, “Nika keras kueram mu maragurukko.”

24 Se Martha balam, “Mu ani ikisam, tom nukum te kariimet suen la kueman mu arungu maragurukko.”
John 11:24 Kariimet kueman mu aking barasomonko: John 5:28-29; 6:40.


25 Se Jesus nu maonam, “Ani kari kuera amumek se maraguruk se marak nunguning tuekko mu ani ko kotam. Awiriya ani ago ko gomang ningi nunguning aram, se kueram / kueruk agi wore, mu nu am marak bagurukko. 26 Se awiriya marak bagoso ale ani ago ko gomang ningi nunguning aram, mu me kuerukko. Ni den imi ko gemang ningi nunguning aso agi mena?”

27 Se Martha balam, “Kari Biya,” mam, “ani ni ko ko angamang ningi nunguning aram, ni Kristus, ni Kaem ko Namar, ali imi te tairko balam borta ni tairem.”

Jesus gomang batagam ale mam niaram

28 Martha den mu balam mu nu peleram namaram ekes te ko uria Maria la maonam, “Kari Biya tairam nika isawoso,” mam. 29 Se Maria den mu ikiam mu nu tairatela barasam aolak iluwam Jesus arigokko namakaso. 30 Jesus wonong te me tai aratam, kuwim te bagaram se Martha te nama arigam mu te la bagaram. 31 Se Juda kariimet Maria ilak gomang ira kawam ningi bagaman mu nu barasam namakaso se aringiman, ale ko koras mutim tuguman wore ko ali motam te mauk niarukko namoso i maman, ale kowom karoman ilak namaman.

32 Se Maria nama kuwim Jesus te sanamiwaram mu te aratam ale arigam, ale ko suwik duap ningi tararam ale maonam, “Kari Biya, ni imi te bagerem ale mu, aninga agoras me kueram ale.” Buta maonam ale nu mo niakaso. 33 Se Juda kariimet nu ilak taiman mu ago la mo niakasan.

Se Jesus Maria niakaso mu arigam, ale kariimet suen la niakasan mu ago nungarkam, ale nu agotala gomang tawun biya batagakaso.
34 Se nunga isuam, “Se nina aparete mutim tuguman a?” mam. Se nuna balman, “Kari Biya, tai arikko.” 35 Se Jesus noman batagam se mononge kapakaso.

36 Se Juda alo nunumi manarukasan, “Arigalko! Kari imi gomang biyala Lazarus tuam!” 37 Bare sikina balukasan, “Kari imi ewela bagaram ale mu, Lazarus me kueram ale. Mu awuk, nu kari bo motam sisira wore nungam se te ikiman.
John 11:37 Jesus kari motam sisira nungam: John 9:6-7.


Jesus Lazarus mumam se barasam

38 Jesus akingtala gomang ningurutala batagam. Nu manga gogong Lazarus ningi beteman mu te tai aratam ale manga bo kuring te baguman mu arigam, 39 ale balam, “Manga gurugal se mutim kuring bitirukko.”

Se kari kueram mu ko koras Martha balam, “Kari Biya, tom ilagala ilagala mutim ningi bagaram se kumik siring memek karogo nunguningkiri!”

40 Se Jesus nu maonam, “Awuk se ani girem ka manem, ni Kaem ko gemang ningi nunguning mu Kaem ko sokel arikko maem, bare ni den mu me ko ikiem?”

41 Se nuna manga gurugu due ko beteman se mutim kuring kaigam. Se Jesus kualala loagaram ale balam, “O aga Ba, ni aninga aira ikiem se ani amilmil kisisam. 42 Ani ikisam, tom suen biya nika arusam mu ni aninga aira mu ko nunguning diram betesam se aratoso. Bare ani kariimet bagasan ewere te ikimon ale ni aninga beterem se tairem mamon, ale nongomang ningi nunguning arukko ani iwita ka arusam.”

43 Nu den mu balu kutuwuram mu nu biyala airam balam, “Lazarus, aratuko!” 44 Asele kari kueram mu aratam. Se ko suwik kuting guang biling biling te kalo isi guruguman, ale ko koma motam guang te kaloman, mu ago aratam. Se Jesus balam, “Guang kumik te sowore kututuwural se noman sapurukko,” mam.

Juda supuling alo Jesus momonko den nungurman

(Mat 26:1-5; Mark 14:1-2; Luke 22:1-2)

45 Se Juda kariimet Maria kote taiman mu mel Jesus beteram mu aringiman ale nunga ningi suen biya tala nu ko nongomang ningi nunguning aram. 46 Bare nunga saki peleman Jerusalem namaman ale mel Jesus beteram mu ko Pharisee alo nunga manorman.

47 Se Pharisee se priest bibiya mu kari supuling supuling bibiya nunga aruman se tai biguwuman se munakakasan. Ale balukasan, “Kari imi kilek bibiya suen biya beteso. Se ana awuk manak? 48 Se ana yam namatam la ariwanak se kilek kasa imi bitawuruk, mu kariimet suen la noko nongomang ningi nunguninga sapuruk, se Rome kari nanga bitaruwasan mu taimon anananga temple parasuwumon ale ana karogo nanga bita maguwumonkowo.”

49 Se nononga ningi bo Caiaphas, nu yar mu te Priest Supuling ko bagakaso, mu balam, “Nina ninga ikia mena! 50 Nina me ikisan e? Kari suwanta sumu kumik te ana suen la memek tanakko negawasan. Se kari suwanta ko balsan mu la moral se kueruk se ana te yawarakala baganakko.”

51 Caiaphas kota ko ikia te den imi me balam. Mena. Tom mu te nu Priest Supuling ko bagara se Kaem ikia tuam se nu Jesus Juda nunga sangukko kueruk ewere ko nu balukaso. 52 Se Juda nunga la mena, Kaem ko kariimet sor apareyate anisan mu suen la nogo ko kueruk ale nunga gi bolala awurok se launuria suwanta bagomonko.
John 11:52 Jesus ko kariimet motam suwanta bagomonko: John 10:16; 17:21; 1 John 2:2.


53 Se tom mu te Juda supuling alo Jesus momonko den duap beteman lage kupukasan. 54 Se Jesus Juda alo nunga ningi biyala me geragakaso. Nu Jerusalem beteram peleram sor garagarayam duap te, wonong ko nup Ephraim mu te namaram, ale kuwim mu te ko olekem arungak bagakaso.

55 Se Passover ko kam biya pingi aram se wonong wonong ko kariimet Jerusalem giriman namakasan, nongota nunga memek siwumonko namakasan. 56 Ale nuna Jesus ko loagakasan ale temple kar ningi baga se nunumi isarukasan, “Nina awuk ikisan? Nu Passover tom biya imi me ko tairukko agila?” 57 Mu awuk, Pharisee kari se priest bibiya nononga ikia nu ilumonko se giriman den iwita kariimet nunga manorman, “Kari bo Jesus apareyate bagoso mu ikiok, mu tairuk anananga manuk se ilunakko.”

Copyright information for `WSK