John 18

Judas Jesus kager kari nuguting te beteram

(Mat 26:47-56; Mark 14:43-50; Luke 22:47-53)

Jesus den mu balu kutuwuram mu nu ko olekem arungu yu gamung gotek bo ko nup Kidron mu komasang te kasu kapaman, ale nama tam olive te aniso kuwim mu te bagaman.

Judas, kari Jesus kager kari nuguting te bitirukko, mu kuwim mu ko ikikaso. Mu awuk, nu Jesus ko olekem bo tala, se tom suen biya Jesus arungak kuwim mu te bolala awukaso. Se priest bibiya se Pharisee alo nuna kager kari sang se temple bitua ko kari sang nunga balman se Judas nunga giam ale arungak kuwim mu te namaram. Nuna galep mel te kagermonko mu giman ale karogo namakasan.

Se Jesus mel suen biya nu kumik te aratukko mu nu ko ikia, buta se giram tai nomokete sanamaram ale nunga isuam, “Nina awiri ko loagasan a?”

Se nuna balman, “Ana Jesus Nazareth kari wore ko loagasan,” maman.

Se Jesus balam, “Mu Anigita ta iweya.”
John 18:5,6,8 Greek den te “ego eimi” aniso, se ko nunguning mu “ani bagasam”: Exodus 3:14.
Se Judas nu kager kari nuguting te bitirukko mu ago arungu sanamiwakaso.
Se Jesus balam, “Mu Anigita imitang,” mu te nuna biririkiman nubiring ko peleman ale dagulu gilingiman.

Bare Jesus udagi tala nunga isuam, “Nina awiri ko loagasan a?”

Se nuna balman, “Ana Nazareth kari Jesus ko loagasan.”

Se Jesus balam, “Ani maingkala ninga manem, mu Anigita ta imitang. Bare nina aninga loagasan agi mu aninga kari imi am nunga awural se namomonko.” Nu iwita balam mu den ulengkala nu balam mu ko nunguning iwita wetang te aratukko, “Ba, kari ni ani aisem mu bo me sarenga namurukko.”

10 Se Simon-Peter nu ko batir maiya wore ago. Se woyam ale priest supuling ko ura dungan kari morukko negeram ale ko dogowa sengam mu siluwuram. Ura dungan kari mu ko nup Malchus. 11 Bare Jesus Peter maonam, “Ka batir ko singir ningi tugumko! Ni awuk ikisam? Aninga Ait ikup ani giekko aisam mu me giekko e?”

Nuna Jesus diruwuman ilak Annas kote namaman

12 Buta se kager kari, se nunga supuling, se Juda nunga temple bitua ko kari Jesus iluman, mayang te talipaman, 13 ale giriman ilak Annas kote namaman. Annas mu Caiaphas ko tonger, se Caiaphas mu yar mu te Priest Supuling bagakaso.
John 18:13-14 Annas mu A.D 6-15 Priest Supuling ko bagakaso, se ura ko nup eng nukote anikaso. Ko noton Caiaphas mu A.D 18-36 ura mu ilukaso. Caiaphas den balam: John 11:49-51.
14 Caiaphas kari borta ulengkala Juda supuling alo nunga maonam, “Kari suwanta kariimet te yawarakala bagomonko kueruk mu asele terong.”

Peter balam, “Ani Jesus me ko ikisam,” mam

(Mat 26:69-70; Mark 14:66-68; Luke 22:55-57)

15 Simon-Peter olekem bo ilak Jesus kowom karoman. Priest Supuling mu olekem mu nu ko ikikaso se nu Jesus ilak Priest Supuling ko kawam ko kar ningi kasu naguram. 16 Bare Peter mu watingi songkuring ago sanamiwakaso. Se olekem Jesus ilak kasu naguram mu tairam songkuring bitua ko imet mu maonam ale Peter ilak kasu naguram. 17 Se songkuring bitua ko imet Peter maonam, “Ni kari ewere ko olekem bo tala agila?” Se Peter balam, “Ani mena,” mam.

18 Marir kapakaso se ura kari se temple bitua kari tama uwi gilingiman ale kowar gi se sanamiwakasan. Se Peter nongote namaram ale tama kowar gi se arungu sanamiwakaso.

Priest Supuling Annas Jesus isarukaso

(Mat 26:59-66; Mark 14:55-64; Luke 22:66-71)

19 Priest Supuling Jesus ko olekem nogo ko nu isarukaso, ale den kariimet nunga manaru lagakaso mu ko ago isarukaso.
John 18:19 Annas Jesus isarukaso: verse 24 arikko.


20 Se Jesus noko den koma balam, “Ani yumukasam ale den me balukasam. Ani tom suen biya synagogue ningi se temple ningi, kuwim Juda kariimet te biguwusan mu te la kariimet den nunga manarukasam. 21 Awuk se ni aninga isarsam? Ni kari den imi iki lagaman mu nunga isaruko. Nuna den ani balem mu ko ikisan.”

22 Nu iwita balam se temple bitua ko kari bo pingi sanamiwaram mu Jesus moram ale balam, “Ni Priest Supuling suwuta manorsam mu terong e? Nika nguangara mena agila pa!”

23 Se Jesus nu maonam, “Ani den memek balem agi mu, ni den ani balem mu baluko. Bare ani den nunguning balem agi bare awuk se ni aninga morem?”

24 Se Annas balam se Jesus diruwuman mayang kumik te aniram se karogo Priest Supuling Caiaphas kote ilak namaman.

Peter akingtala balam, “Ani Jesus me ko ikisam,” mam

(Mat 26:71-75; Mark 14:69-72; Luke 22:58-62)

25 Simon-Peter sanamaram tama kowar giwaram se aking isarman, “Ni kari ewere ko olekem bo agila pa!”

Se nu kawelaram, “Ani mena,” mam.

26 Se Priest Supuling ko ura dungan bo, mu nu kari dogowa siluwuram owore ko gue suwan, umutang balam, “Ani ni ilak tam olive bowa ningi bagerem se karkem agila ta pa!”

27 Bare Peter aking balam, “Ani mena,” mawaram mu te tarak niaram.

Pilate Jesus isarukaso

28 Tumong biyala Juda alo Jesus taman ilak Caiaphas ko kawam beteman ale Rome supuling Pilate ko kawam te ilak namaman. Bare nuna nongota kawam ningi me kasu naguman. Mu awuk, Pilate mu Juda kari mena, se nuna ikikasan kasu nagumon mu nungumik karur nagurok se Passover me namon bore ko iwita ikikasan ale yam watingi bagakasan.

29 Se Pilate nongote aratam ale nunga isuam, “Nina anape mel ko kari ewere den ningi beteman a?”

30 Se nuna noko den koma balman, “Kari imi kari memek mena ale mu, ana ilak iwita me taiman ale.”

31 Se Pilate nunga maonam, “Nengeta tal ale nenenga munan te ilak den arigalko.”

Bare Juda supuling alo nu manorman, “Nina Rome balman ana nangata kari monak se me kuerukko balman.”
32 (Ulengkala Jesus balam nu Rome nunga munan te tam kangono te kuerukko balam, se aitak den mu ko nunguning aratukko negawoso.)
John 18:32 Jesus tam kangono te kuerukko giram balam: Mat 20:19; John 3:14.


33 Buta se Pilate kawam ningi kasu naguram ale Jesus auram se kote tairam se isuam, “Ni Juda nunga king e?”

34 Se Jesus nu isuam, “Ni keta ka ikia te isa sumu ani aisem agi, kari sang ani ago ko suwuta ka manorman se te aninga isem e?”

35 Se Pilate balam, “Ani Juda se ye? Ni keta ka priest bibiya se ka kariimet nika diruwuman kerak aningate taiman. Se ni anape memek beterem?”
John 18:35 Israel kariimet Jesus ari meman / nubiring tuman: John 1:11.


36 Se Jesus balam, “Ani ali imi te ko king bo mena. Bare nunguningta ani ali imi ko king bo ale mu, aninga olekem mu kari aga ilumon ale Juda nuguting te aga betemon bore ko arungu nunumi moman ale. Bare ani sor bo ko king.”

37 Se Pilate nu isuam, “Buta se nunguningta ni king agila pa!”

Se Jesus nu maonam, “Ni diram balsam ani king. Ani den nunguning ninguru balikko ali imi te tairem bilangerem. Se kariimet den nunguning ko kuesan mu aninga agiring ikisan karo tusan.”

38 Se Pilate nu maonam, “Anape den nunguning a?”

Pilate uwuta balam ale watingi Juda nongote aratam ale nunga maonam, “Ani memek bo kari imi kumik te me arigem.
39 Bare nenenga munan bo agotala, ani Passover tom te kari talipara ningi mu bo kutuwu ningarukasam. Buta se nina Juda ninga king ani kutuwu ningarikko agila?”

40 Se nuna aikasan ale balukasan, “Sumu mena,” makasan. “Bare ana Barabbas kutuwu nangaruko!” (Barabbas mu nu tere daong kari.)

Copyright information for `WSK