John 21

Olekem seven nuna Jesus aringiman

Udagi tala Jesus yu batoga Galilee duap te ko olekem nongote aratam.
John 21:1 Greek den te “yu batoga Tiberias”.
Nu iwita nongote aratam:
Simon-Peter, se Thomas, ko nup bo Didymus, se Nathanael, Galilee wonong gotek Cana ko kari, se Zebedee ko kuriang ilagala James John ilak, se olekem ilagala agotala, nuna suen la biguwuman bagaman. Se Simon-Peter mu ko sikina nunga maonam, “Ani wal tagirikko namasam.” Se nuna nu manorman, “Ana ago nikerak namanakko.” Buta se namaman dal te aragaman ale kasu namaman turom dagarok sapakasan. Bare wal bo me iluman.

Se sor ukiram worem duap diruwuram se Jesus langi yu norogen te nama sanamiwaram, se ko olekem nu aringiman, bare nu Jesus wore me ko ikiman.

Bare Jesus nunga isuam, “Aga saki alo, wal i bo iluman e?”

Se nuna balman, “Menawo! Bo me iluman.”

Se nu nunga maonam, “Buta agi mu ninga dagarok dal koma sengam ko mu te saparal ale wal iluwalko.” Se nuna dagarok sapaman mu wal dagarok ningi ninguru tala kapaman se nuna tagimonko me terong mam.

Se olekem Jesus ko ninguru kuakaso mu Peter maonam, “Imi Kari Biya,” mam. Se Simon-Peter den mu ikiam mu tairate ko guang, ura bitirukko se kutuwuram, mu aking tam kaolam, ale tingam yu ningi kaparam. Se olekem saki mu dal te taikasan. Nuna awar biya mena, 90 metre iwitata. Se dagarok wal ago mu tagiman, ale tai langi saun te kapaman. Ale tama kaniwaram mu ko kaok kowar aniram mu aringiman, ale wal tama te aniram mu ago aringiman, ale bread ago aringiman. 10 Se Jesus nunga maonam, “Wal aitakta nina giman wore sang gial ago tairalko,” mam.

11 Buta se Simon-Peter dal te nama aragam ale dagarok gurataram ago saun te aratam. Wal bibiya suen biya, 153 diram, dagarok ningi kapaman. Mu suen biya nunguningkiri, bare dagarok me batuwutuk mam. 12 Se Jesus olekem alo nunga maonam, “Nina tairal na nalko.” Se olekem bo ta nu isok ni awiriya maukko me terong maman, nuna ikiman mu Kari Biya. 13 Se Jesus tairam bread tam nungaram ale wal agotala nungaram.

14 Jesus kueram barasam ale imi ko tom 3 ko olekem nongote aratam se aringiman.
John 21:14 Jesus nongote aratam se aringiman: John 20:19,26.


Jesus Peter maonam, “Aninga sipsip nunga sinar toko,” mam

15 Nuna na naman asele Jesus Simon-Peter maonam, “Simon, John ko kuriang, ni olekem saki nunga kiarem ale ni ninguru ago ko kuesam e?” Se nu balam, “Kari Biya, ni ikisam ani ninguru nika kuesam.” Se Jesus nu maonam, “Ni aninga sipsip gotektek na nungaru sagerko.”
John 21:15 Peter: John 1:42; Mat 26:33-35.


16 Udagi tala Jesus nu maonam, “Simon, John ko kuriang, ni ani ninguru ago ko kuesam e?” Se nu balam, “Kari Biya, ni ikisam ani ninguru nika kuesam.” Se Jesus nu maonam, “Aninga sipsip nunga sinar toko.”

17 Udagi tala Jesus nu maonam, “Simon, John ko kuriang, ni ani ninguru ago ko kuesam e?” Se Simon-Peter gomang batagam, mu awuk, Jesus tom ilagala suwan nu isa mu tuam se nu gomang batagam.
John 21:17 Tom ilagala suwan: John 13:38.
Se balam, “Kari Biya, ni mel suen biya ikisam. Ani ninguru nika kuesam mu ni ikisam!”

Se Jesus nu maonam, “Aninga sipsip nunga ninguru sinar toko.
18 Ani nunguningta ka manorsam: tom ni kulak la mu ni sor apareyate namarko mu ni nimi nungurukasam ale te namakasam. Bare tom ni garuker tom mu te nika kiting patawur se kari bo ka talipuruk ale kerak sor ni te namarko me kuesam mu te kerak namurukkowo.” 19 Jesus iwita balam mu munan Peter te kueruk ale Kaem nup biya tuokko wore ko nu balam. Asele Jesus nu maonam, “Agowom karoko!” mam.
John 21:19 Peter nu Jesus kowom karowa moman se kueram: Mark 1:17; Mat 16:24-25; 2 Peter 1:13-14.


Olekem Jesus ko kuakaso wore ko duap

20 Peter giris palagam buring ko loagaram ale olekem Jesus ninguru ko kuakaso mu nogowom karowaram se arigam. Mu kari ulengkala Passover nana ko tom te nu Jesus beta dugu te daigam baga kote yera namaram isuam, “Kari Biya,” mam, “kari awuk bore ni kager kari nuguting te ka bitirukko ya?” ma balam kari borta.
John 21:20 Olekem John: John 13:23-25.
21 Se Peter nu arigam ale Jesus isuam, “Kari Biya, se kari sumu kumik te awuk mamonko?”

22 Bare Jesus nu maonam, “Aninga angamang nu baguruk se pelerik tairikko agi, mu aninga mel. Mu nika mel mena. Ni agowom karoko!”

23 Buta se udagi olekem saki den daula imi olekem mu ko balukasan, “Olekem imi me kuerukko,” makasan. Bare Jesus olekem mu me kuerukko me balam. Mena. Nu am ko iwita Peter maonam, “Aninga angamang nu baguruk se ani pelerik tairikko agi, mu aninga mel. Mu nika mel mena,” ma balam.

24 Olekem borta tala aitak mel mu ko duap balso ale den imi batogam. Se ana noko den batogam imi ikisan mu nunguning.

Se mel suen biya Jesus agotala beteram. Se mel mu suwan suwan buk te batoga ko negemon, mu buk suen biya aratukko, se ani ikisam ali suen biya buk imi te awura ko me terong maukko.

25 

Copyright information for `WSK