John 3

Jesus Nicodemus ilak munakaram ko den

Juda nunga supuling bo bagaram ko nup Nicodemus, nu Pharisee kari.
John 3:1 Nicodemus: John 7:50-51; 19:39.
Nu tom bo turom Jesus kote tairam ale maonam, “Kari biya,” mam, “ana kilek bibiya sokel ago ni betesam mu aringiman ale ikisan, kari Kaem ilak mena mu kilek ni betesam mu bitirukko me terong. Buta se ana nika ikisan, Kaem nika beteram se noko den nanga kasuruko tairem.”

Se Jesus noko den koma balam, “Ani nunguningta ka manorsam, kari tom suwanta bilangaram mu nu Kaem ko kingdom arigokko me terong. Nu udagi tala aking bilanguruk mu asele nu Kaem ko kingdom arigokko terong mam.”
John 3:3,6 Udagi tala aking bilangara: Mat 18:3; John 1:12-13; 1 Cor 15:50; 1 Peter 1:23.


Se Nicodemus nu isuam, “Mu awuk se kari maingkala bilangaram ale garukaram wore udagi tala aking bo ago bilangurukko? Nu nuam tuagu ningi kasu nagurok ale udagi tala bilangurukko mu me terong!”

Se Jesus noko den koma balam, “Ani nunguningta nunguning ka manorsam, kariimet bilangaman bare bo ago, yu te, se Korang Bur te me bilangomon, mu nuna Kaem ko kingdom ningi kasu nagumonko me terong. Nuam nuet nungumik te kuriang aratasan. Bare Korang Bur ura beteso se kariimet Kaem ko kuriang ko aratasan. Den ani ka manem, ‘Udagi tala bilangaral mu asele Kaem ko kingdom ningi kasu naguralko,’ bare den mu ko me kamin tugumko! Daula noko ikia te la geragoso se ni ko nirung la ikisam. Bare nu apareyate barasoso ale taiso, ale apareyate namoso mu ni me ko ikisam. Butatala Korang Bur ura beteso se kariimet Kaem ko kuriang ko aratasan. Ni me arik, bare mel nu beteso mu te arikko.”

Se Nicodemus nu isuam, “Mel ni balsam mu awuk ta aratukko?”

10 Se Jesus ko den koma balam, “Ni Israel nunga kausa kari biya, bare ni mel imi me ko ikisam e? 11 Ani nunguningta nunguning ka manorsam: mel ana maingkala ko ikiman ale aringiman wore ko balsan. Bare nina bo ningi anananga den balsan imi ko me nengemang ningi nunguning aso. 12 Ani ali imi ko mel ko ninga manorsam, bare nina aninga den ko me nengemang ningi nunguning aso. Se ani duruk wonong ko mel balik, mu nina awuk ta ko nengemang ningi nunguning arukko ya? 13 Kari bo duruk wonong te me namaram. Bare Kari ko Kuriang, duruk wonong te baga ali imi te tai kaparam, mu nu duruk wonong ko mel suen biya ninguru ko ikiso.

14 “Girakala Moses sor garagarayam te ma dora nungam patawu tam baongam mu te ituwuram se kekawakaso.
John 3:14 Ma urer Israel kariimet nunga usikasan se kuakasan. Se Kaem kariimet gomang nungaram ale balam se Moses ma dora nungam patawu tam baongam mu te ituwuram se kekawakaso. Se kariimet ma urer nunga usikasan mu nomotam patawu arikasan mu me kuakasan: Num 21:9; John 12:32-33.
Butata tala nuna Kari ko Kuriang patawu kualala ituwumonko,
15 se awiriya noko nongomang ningi nunguning aruk, mu marak nunguning tom suen biya te bagara ko mu tamonko.”

16 Uwutatala Kaem ali imi ko kariimet gomang nungaram ale noko Kuriang suwanta wore nungaram. Se kariimet noko nongomang ningi nunguning aso mu me sarenga namomonkowo, marak nunguning tom suen biya te bagara ko mu la tamonkowo.
John 3:16 Kaem ko Kuriang suwanta wore nangaram: Rom 5:8; 8:32; 1 John 4:9-10.
17 Mu awuk, Kaem noko Kuriang ali imi te beteram se tairam mu kariimet den ningi nunga awurokko me tairam. Mena. Mu nu tairuk nunga sangukko tairam.

18 Awiriya noko gomang ningi nunguning aram, mu nu kumik te den mena. Bare awiriya noko gomang ningi me nunguning aram, mu nu maingkala kumik den te beteram. Mu awuk, nu Kaem ko Kuriang suwanta wore ko gomang ningi me nunguning aram se.

19 Tutera tom te kariimet den ningi bagomonko mu ko duap iwita: Nikim ali imi te tairam, bare kariimet tiromorom ko kueman, nikim mu meman. Mu awuk, nononga munan memek se. 20 Awiriya kilek memek beteso mu nu nikim meso ale biriruwuso. Nu ko munan wetang te aratukko me kaeso. Buta se nu nikim mu kumik duap te me taiso. 21 Bare awiriya den nunguning ikiso ale ninguru karo tuso, mu nu nikim mu te taiso. Se kariimet te aringimon ale balmon, ‘Mu Kaem ko kuring karo tuso,’ ma balmonko.”

Anuwa Kari John Jesus ko dugu duap balam

22 Udagi te Jesus ko olekem arungu Jerusalem wonong beteman ale Judea sor bo te namaman. Jesus mu te arungak bagakaso se kariimet taikasan anuwa to gilingikasan.
John 3:22 John 4:2 ago arikko.
23 Tom mu te Herod John me talipara la, John anuwa ura agotala tokaso. Nu Aenon bagakaso, Salim ko pingita. Sor mu ko yu suen biya ago. Se kariimet suen la taikasan se nu nunga anukaso.

25 Se John ko olekem saki Juda kari bo ilak anuwa ta ko den tagikasan. 26 Se olekem John kote namaman manorman, “Kari biya,” maman, “kari nikerak yu Jordan komasang te bagaram se ni ko dugu duap balem ale nanga kausem, kari borta kariimet nunga anuwoso, se kariimet suen la nu kote nama gilingisan.”

27 Se John nunga maonam, “Kaem kari mel me balu tuok, mu kari mu kota ko sail te mel mu taukko me terong. 28 Nina noko den ani maingkala balem mu ikiman. Ani balem, ‘Ani Kristus mena,’ maem, ‘bare Kaem aga balam se girem nu te tairukko lage nunguruwasam,’ ma balem. 29 Kari bo imet taso, mu imet mu kari nu tam umutang kota la ko nuwus. Se kari mu ko bo mu noko kimi bitawoso, se nu ko imet taukko mu ilak munakoso se kuring ikiso, mu nu ninguru amilmiloso. Betelatala ani angimik ningi amilmil biyala taiso. 30 Jesus nup mu am biyala barasuk se aninga aip mu am kapurukko.”

Kari duruk wonong te tairam

31 Kari duruk wonong te tairam mu nu mel suen biya ko supuling. Kari ali imi te aratoso mu nu ali imi ko kari, se nu ali ko mel la ko balso. Kari duruk wonong te tairam mu nu mel suen la ko biya. 32 Nu mel arigam ikiam mu ko balso, bare kari bo ta noko den balso mu taso gomang ningi me beteso. 33 Bare awiriya noko den ikiso ale gomang ningi beteso, mu nu iwita balso, “Kaem den balso mu nunguningta.”

34 Kari Kaem beteram se tairam mu nu Kaem ko den la balso. Mu awuk, Kaem Korang Bur biyala tuam se. 35 Kaem ko Namar ko biyala kueso ale mel suen biya nu kuting te beteram. Se awiriya Kaem ko Namar ko gomang ningi nunguning aram, mu nu marak nunguning tom suen biya te bagurukko mu tam. Bare awiriya noko Namar kuring me karo tuso, mu nu marak nunguning mu me taukko, mu Kaem ko gomang magara mu tom suen biya kari mu kote anirukko.

36 

Copyright information for `WSK