John 5

Jesus kari tilital yu Bethsaida duap te nungam

Udagi Juda nunga tom biya bo tai aratam se Jesus Jerusalem namaram. Jerusalem ningi yu gotek bo ko nup Hebrew nunga den te ZZZ check new NIV Bethsaida masan mu aniso. Yu gotek mu Jerusalem ko lage korang bo, ko nup Sipsip nunga Lage Korang masan mu ko pingita. Se ko kawam daula te to se bagomonko mu 5 duap te kalo beteman se anikaso. Se kari kuera ikes ago, nomotam sisira, nungumik memek, nosokel kuera, mu suen biya kawam mu te bagakasan.
John 5:4 Batoga sang girakala batagorman mu te den imi ago aniso: “Mu awuk, tom saki Kaem ko engel taikaso yu ningi kapakaso, se yu mununguning pagakaso se arikasan mu kari kuera ikes ago mu bo girikaso ningi kapakaso mu noko kuera aguwaya wore am menayakaso se nu nungiakaso. Se kariimet kuera ago mu nuna butata taikasan ko kimi bita se bagakasan.
Se nunga ningi kari bo nu kuera ikes ago yar 38 bagakaso. Se Jesus kari mu arigam, nu kuera mu ago yar suen biya am bagakaso mu nu ikiam, ale maonam, “Ni nungerko kuesam e?”

Se kari kuera ago mu nu maonam, “Kari Biya, tom yu namoso taiso mu ani ikisam, bare kari bo aga sanguk ale yu ningi aga bitirukko wore mena. Se ani aimi to tuiwasam mu kari bo maingkala giriso yu ningi kaposo.”

Se Jesus nu maonam, “Bares ka kiwim sor gi ale ago aolak ilupko,” mam. Se kari mu ko kuera tairatela menaram. Se barasam ko kuwim sor giam ale aolak iluwam namakaso.

Mu Sabbath tom,
10 se Juda kari supuling bibiya kari kuera ago bagaram se Jesus nungam mu manorman, “Aitak Sabbath tom, ni te kiwim sor gi karogo aolak ilupko mena! Ni munan kiarem!”

11 Bare nu nunga maonam, “Kari aninga nungam wore aga maonam, kiwim sor gi ale karogo aolak ilupko mam, se ani kuring te aolak iluwasam.”

12 Se nuna nu isarman, “Nu kari awiri wore nu munan sumu ni suwuta meko ka maonam?” 13 Se nu balukko, bare kari nu nungam wore ko nup me ko ikia se. Mu awuk, Jesus nu nungam ale kariimet motam biya mu ningi tetela la nama yumuram.

14 Udagi te Jesus kari nung mu akingtala temple ningi arigam ale maonam, “Ikiko! Ni aitak nungerem. Udagi memek me bitarko, udagi ikup memek biyala arik bore ko!”

15 Se kari mu namaram Juda kari bibiya nunga maonam, “Kari aninga nungam mu ko nup Jesus i,” mam.

16 Se Juda kari supuling bibiya Jesus ilak memek betera duap beteman, mu awuk, nu Sabbath tom te ura owore beteram se. 17 Bare Jesus nunga maonam, “Aninga Ait tom suen biya am ura to lagoso, se ani betela ura tasam.”
John 5:17 Aitak ura te ta ko tom: John 9:4; 14:10.


18 Se nuna den mu ikiman ale nononga nongomang biyala lage bo aringimon ale te ilumon ale momon se kuerukko. Mu awuk, ulengkala nu Sabbath ko munan aora biya wore kiaram. Bare mu la mena. Aitak nu noko Nuet nunguning Kaem mam, ale den mu te nu kota numi Kaem iwitatala mam.

Jesus mu marak nunguning ko duap

19 Se Jesus nunga maonam, “Ani nunguningta ninga manorsam, Kaem ko Namar kota ko ikia te mel bo me beteso. Mena. Noko Nuet mel beteso se arigiso mu nu te beteso. Mel aguwaya Nuet beteso mu nu ago beteso. 20 Mu awuk, Nuet ko Namar ko kueso, ale mel suen biya nu beteso mu nu ago kasurso se ikiso. Se kilek sang kilek bibiya imi kiaram mu nu kausok se bitiruk se arigal ale biririkiralko. 21 Nuet mu kariimet maingkala kueman mu nunga mumurso se maragasan mu turantala, noko Namar ko gomang te kari awiriya mumok se marak bagurukko mu am butata bitirukko. 22 Bare mu la mena. Nuet kariimet me nunga tuteso. Kariimet nunga tutera ko ura mu noko Namar kuting te bita saparam.
John 5:22 Tutera ura mu Jesus kuting te aniso: Acts 10:42.
23 Umutang te kariimet Nuet nup patowasan iwitatala noko nup patawomonko. Kariimet awiriya noko Namar nup me patawoso, mu betelatala Nuet nu beteram se tairam mu agotala nup me patawoso.

24 “Ani nunguningta ninga manorsam, kariimet awiriya aninga den ikiman ale Kari aga beteram se tairem mu ko nongomang ningi nunguning aram, mu nuna marak nunguning tom suen biya te bagomonko mu taman. Mu nuna koma memek me tamonko. Nuna kueman bagaman iwita, bare aitak nuna marak nunguning taman ale te bagasan.

25 “Ani nunguningta ninga manorsam, tom tairuk se Kaem ko Namar te airuk se kuring ikimonko mu tom mu tai aratam. Nunguningta, kariimet kueman anisan iwita mu noko kuring ikimonko. Se arikaya kuring ikisan ale karo tusan mu marak nunguning tamon ale bagomonko. 26 Mu awuk, Nuet mu marak nunguning ko duap. Se butatala nu ko Namar kariimet marak nunguning nungarukko ko ura mu tuam.
John 5:25-26 Jesus marak nunguning nangarso: John 1:4; 6:57; Eph 2:4-6.
27 Ale ko Namar kariimet nunga tuterukko ko ago balam, mu awuk, nu Kari ko Kuriang bagoso.

28 “Nina den imi ko me biririkiralko. Tom tairuk se kariimet maingkala kueman se nunga mutim tuguman mu nu airuk se suen la kuring ikimon 29 ale maragomon mutim betemon ale watingi aratomonko. Kariimet kilek ningo bita laga kueman, mu maragomon ale marak yawara tamonko. Bare kariimet kilek memek bita laga kueman, mu maragomon ale koma memek tamonko.
John 5:28-29 Kariimet kueman mu barasomonko: Daniel 12:2; Mat 16:27; John 6:40; Acts 24:15; Rev 20:4-6,11-15.


30 “Ani agata aga ikia te mel bo bitirikko me terong. Aninga Ait te aga manarso wore te ani kariimet nunga tutesam. Se aninga tutera ura mu diram aratoso. Mu awuk, ani agata aga ikia karo tuekko angamang me aniso. Ani Kari aga beteram se tairem mu ko ikia la karo tuekko angamang aniso.

Jesus balam, noko Nuet se Anuwa Kari John noko dugu duap wetang te balman

31 “Ani agata aimi ko balik, mu nina aninga ko nengemang ningi me nunguning arukkowo. 32 Bare Kari bo aninga dugu duap balso, se ani ikisam noko den mu nunguningta.

33 “Nina ulengkala ninga ura kari ani ago ko John isarmonko nunga manorman se namaman, se John aninga dugu duap nunguningta balam se ikiman. 34 Ani kari bo aga sanguk ale aninga dugu duap balukko me kimi betesam. Mena. Bare aninga angamang nina ani ago ko nengemang ningi nunguning aruk se Kaem ninga giokko, buta se John ko ninga manorsam. 35 John mu nu galep kanikaso ale nikim kariimet nungarukaso iwita, se nina noko nikim mu ko tom tukunangta amilmilaman.

36 “John aninga dugu duap wetang te balam. Bare kilek bibiya aga Ait bitirikko balam se betesam imi mu ani wetang te nunguningkiri aga beteso. Mu kariimet te ninguru ikimon aninga Ait aga beteram se tairem ma balmonko.

37 “Se aga Ait aninga beteram se tairem mu nu agotala aninga duap wetang te baluwoso. Bare nina noko kuring me ikikasan. Mena nunguning. Se ko koma motam betela me arikasan. 38 Ale nina noko den nenenga nengemang ningi me aniso, mu awuk, nu aninga beteram se tairem bare nina ani ago ko me nengemang ningi nunguning aso ewerete se.

39 “Nina balsan Kaem ko den batoga te aniso mu marak nunguning tom suen biya te bagara ko mu ningarso masan, ale nina kau lagasan. Bare batoga umu aninga ko baluwoso!
John 5:39 Kaem ko den batoga te aniso mu Kristus ko baluwoso: Luke 24:27,44.
40 Bare nina aningate tairal ale marak nunguning talko me ko kuesan!

41 “Ani aip patawomonko me ura betesam. 42 Bare ani nina ninga ikisam, nina Kaem ko me kuesan. 43 Ani aga Ait ko nup te ani tairem, bare nina ani me aga kuesan. Bare kari awiriya kota ko nup te tairuk, mu nina noko kueralko. 44 Nina kariimet sang ninip patawomonko kuesan. Bare nina munan ningo beteral se Kaem Biya ninip patawurukko me sail tagisan. Buta se nina awuk ta nengemang ningi nunguning arukko? Mena.

45 “Bare nina ikial ani aga Ait Kaem koma te den te ninga bitirikko ko iwita me ikialko. Mena. Moses, kari nina balsan ninga sangukko masan, mu den te ninga bitirukkowo! 46 Mu awuk, nu giram aninga dugu duap batogam se aniso. Se nina noko den ko nengemang ningi nunguning aram ale mu, nina aninga den ko ago nengemang ningi nunguning aso ale. Bare mena. Nina noko den ko me nengemang ningi nunguning aram. Se nina awuk ta den ani balsam mu ko nengemang ningi nunguning arukko? Mena!”

47 

Copyright information for `WSK