John 7

Jesus ko uria mitak nu ko nongomang ningi me nunguning akaso

Juda kari supuling alo nuna Jesus momonko kaeyakasan. Buta se nu Judea ningi geragukko me kuakaso, ale am Galilee ningi la geragakaso. Se Juda nunga tom biya, sasal gotektek kalomon ale ningi bagomonko tom, mu tai pingi aram.
John 7:2 Tom biya: Lev 23:33-36. Tom umutang te Israel alo sor garagarayam te aolak iluman taikasan mu ko nungamin tugukasan. Sor mu te Kaem na inang nungarukaso, yu ago nungarukaso. Se tom biya mu ningi pris alo yu Siloam mu te namakasan yu utukasan ale temple ko titeng te warukasan. Jesus mu manna nunguning duruk wonong te tairam: 6:35. Betela nu yu nunguning kariimet marak sokel nungarso: 7:37.
Se Jesus ko uria mitak nu manorman, “Ni wonong imi bitar ale Judea namar se ka olekem alo kilek kasa ni betesam mu aringimonko. Kari bo kariimet nomotam te nup biya ago bagurukko kueso, mu nu kilek bibiya nu beteso mu kaluwuso ale yumura te me beteso. Se ni kilek bibiya betesam agi mu, kariimet nomotam te nimi wetang te bitar ale kilek sumu bitar se kariimet ka ikimonko!” Nuna Jesus ko uria mitak, bare nuna buta nu manorman. Mu awuk, nuna noko nongomang ningi me nunguning aram.

Se Jesus nunga maonam, “Aninga tom nunguning me tai aratoso. Nina mu tom suen biya mu nenenga tom. Ali imi ko kariimet me nengerak betemonko, mu awuk, nina nuna iwitatala. Bare ani mu asele agarak memek betesan, mu awuk, ani nuna kilek memek bita lagasan owore ko nunga manaru lagasam. Se nina mu tom biya mu ko namaralko. Bare ani mu aitak me namirikkowo, aninga tom me taiso se.” Nu uwuta balam ale eng Galilee bagakaso.

10 Bare ko uria mitak tom biya mu ko namaman se nu kota udagi namaram. Bare wetang te me namaram, am yumura la namaram. 11 Juda supuling alo tom biya mu ningi noko loagakasan ale balukasan, “Kari nukung aparete bagoso ya?” makasan. 12 Se kariimet suen biya nuna noko kasi kasi te nunumi manarukasan. Sika balukasan, “Nu kari yawara,” makasan. Se sang balukasan, “Mena, nu kariimet nunga kulurso,” makasan. 13 Bare nuna Juda supuling nunga nguangakasan ale den biyala wetang te me balukasan.

Juda nunga tom biya bo te Jesus temple kar ningi den balukaso

14 Tom biya mu ko tom saki namaram asele udagi te Jesus temple ko kar ningi kasu naguram ale den nunga manarukaso. 15 Se Juda supuling alo Jesus ko den ikiman ale ninguru tengeman ale balukasan, “Kari imi aparete ikia biya wore tam ale balso ya? Nu anananga kausa kuwim te me taikaso.”

16 Se Jesus balam, “Den ani ninga manorsam mu agata aga ikia te me ninga manorsam, Kari aga beteram se tairem wore ikia aisiso se te balsam. 17 Se awiriya Kaem kuring karo tuokko, mu den ani balsam imi agata aga ikia te balsam agi, Kaem aisiso se balsam mu ko duap ikiok ale baluk, “Mu ikia Kaem tuso pa!” maukko. 18 Kari kota ko ikia te munakoso, mu nu kota nup biya taukko munakoso. Bare kari awiriya kari nu beteram se tairam umu ko nup biya taukko ura beteso, mu kari mu diram, kumik te kawel bo mena. 19 Moses Law Den ningaram, bare nina me karo tusan. Se nina anape ko aninga moral se kuerikko negawasan?”

20 Nu den mu balam se kariimet motam biya balman, “Ni ngualara agila pa! Arika nika momonko negawasan wore balsam?”

21 Se Jesus nunga maonam, “Ani Sabbath tom te munan bo beterem se nina aringiman biririkiman ale ikia ninga moawoso.
John 7:21 Jesus Sabbath tom te kari tilital bo nungam. John 5:1-9 arikko.
22 Bare nina nengeta Sabbath tom te ura tasan. Moses munan ninga kuriang kari mu nungumik guang batoga ko mu ningaram. Buta se, nina ninga kuriang kari iru bilangaman nunga tom 8 aram mu te, Sabbath tom agi, bare nungumik guang am batagorsan. (Bare Moses munan imi duap me beteram, mu nenenga taleng girigir girakala ko wore munan imi duap beteman.) 23 Nina Moses ko Law Den mu ninguru karo tualko se Sabbath tom te ningimik guang batoga ko ura umutang betesan. Se ani Sabbath tom te kari bo kumik guang nungem se nina awuk se ani ago ko nengemang magoso? 24 Buta se anapeya den balalko mu ninguru ko ikial ale asele balalko!”

Nuna isakasan, “Kari ewere Kristus agila?” makasan ko den

25 Se Jerusalem kariimet saki nunumi isarukasan, “Awuk? Kari oworta anananga supuling alo momon se kuerukko balsan. 26 Arigalko! Nu wetang te munakawoso, bare nuna den bo me manorsan! Agi supuling alo ikisan mu nunguningta Kristus masan agila? 27 Bare Kristus tairuk, mu ana noko wonong duap me ko ikinakko, bare imi ana noko wonong duap ko ikisan.”

28 Se Jesus temple ko kar ningi den am baluwa se biyala airam balam, “Nina nunguningta ani aga ikisan e? Ale ani wonong apareyate tairem mu ko aga ikisan e? Bare ani agata aga ikia te me tairem. Kari aga beteram se tairem mu noko munan suen biya mu nunguning la. Nina nu me ko ikisan. 29 Bare ani nu ko ikisam, mu awuk, ani nu ilak baga aga beteram se tairem.”

30 Jesus den mu balam se nuna tom mu te la nu ilumonko kaeyakasan, bare noko tom me tai aratukaso se bo kumik me ilu tokaso. 31 Bare kariimet suen biya tala nu ko nongomang ningi nunguning aram, se balukasan, “Tom Kristus tairuk mu kilek bibiya kari imi beteso iwita bitiruk i? Mena. Kari imi Kristus pa!”

Nuna kari sang Jesus ilumonko nunga beteman se namaman

32 Se Pharisee alo kariimet Jesus ko dugu duap tawun biya ko balukasan se nuna ikiman, ale ko priest bibiya arungak biguwuman ale munakaman, ale temple bitua kari sang nunga manorman se Jesus ilumonko namaman.

33 Se Jesus balam, “Tom katirta ani nina nengerak baga pelerik Kari aga beteram se tairem mu kote namirikko. 34 Se nina aninga loagaral bare me agarkalko, mu awuk, kuwim ani te namirikko mu nina te namaralko me terong.”

35 Se Juda supuling alo nongota nunumi isarukasan, “Nu aparete namuruk se ana udagi me aringinakko wore balso ya? Agi nu Greek nunga wonong bibiya, ana Juda anananga saki te anisan mu te namuruk ale Greek kariimet Kaem ko den nunga manukko e? 36 Nu balso, ana noko loaganak bare ana me aringinakko maso, ale kuwim nu te namuruk mu ana me te namanakko maso, mu ko nunguning awuk?”

Yu kariimet marak sokel nungarso ko den

37 Tom biya sasal ningi bagara ko mu ko tom nukum te umutang tom biya nunguningkiri.
John 7:37 Verse 2 ko footnote arikko. Yu nunguning kariimet marak sokel nungarso: Isaiah 55:1; Jeremiah 2:13; John 4:10,14; Rev 22:1-2.
Tom mu te Jesus barasam ale biyala airam balam, “Ni awiriya yu ko kuar agi mu aningate tair ale yu noko.
38 Kaem ko batoga te balam butata, kari awiriya ani ago ko gomang ningi nunguning, mu yu marak sokel ago mu noko gomang ningi lairuk ale kapurukko!” 39 Mu Jesus mu Korang Bur ko balukaso, udagi awiriya nu ko gomang ningi nunguning aruk mu Bur mu nukote tai kapuruk ilak bagurukko. Tom mu te Jesus me kueram, nup biya taukko duruk wonong te me namaram, ale Korang Bur beteram se me taikaso ko tom te.

Kariimet pagaman motam ilagala aman

40 Kariimet sang nu den mu balam se ikiman ale balukasan, “Nunguningta nunguning, kari imi anananga Prophet biya!” makasan.
John 7:40 Moses giram ale prophet biya bo tairukko mu balam: Deut 18:15-18.
41 Saki balukasan, “Mu Kristus!” makasan. Bare saki balukasan, “Kristus mu Galilee ningi me aratukkowo!” makasan. 42 “Kaem ko batoga te maingkala balam Kristus mu David ko gue te aratukko, ale nu Judea ningi Bethlehem bilangurukko, wonong girakala David te bagakaso,” ma balukasan.
John 7:42 Micah 5:2.
43 Buta se Jesus kumik te kariimet pagaman motam ilagala arataman. 44 Saki nononga nongomang mu Jesus ilumon talipomonko kuakasan, bare nuna bo ta Jesus kumik te kuting me bitakaso.

Juda kari supuling alo Jesus ko me nongomang ningi nunguning aram

45 Se temple bitua ko kari peleman Pharisee se priest bibiya nongote namaman. Se nunga isarman, “Awuk se nina ilak me taiman?”

46 Se bitua kari balman, “Girakala kari bo kari imi munakoso iwita me munakakaso!”

47 Se Pharisee alo nunga manorman, “Nina karogo nengemang kulukurso agila pa! 48 Se ana Pharisee se kari bibiya noko nangamang ningi nunguning aso se nina arigisan e? Mena! 49 Bare kariimet motam biya mu Law Den ko me ikisan! Se Kaem koma memek nungarukkowo!”

50 Buta balman, bare Pharisee nunga ningi bo Nicodemus, nu giram Jesus arigokko kote namaram borta, mu ko saki nunga maonam, 51 “Anananga munan mu kari bo yam den ningi betenak ale bita maguwura ko ago balso e? Mena. Mu ana girinak kuring te den ikinak ale, anapeya mel beteso agi mu aringinak ale asele.”
John 7:51 Munan aniram: Deuteronomy 1:16.


52 Bare nuna mu noko den koma iwita balman, “Se ni noko turan Galilee kari bo tala e? Prophet nunga batoga ninguru kaur ale keta ikiko, Galilee ningi prophet bo me aratukkowo!”

Kariimet parasaman nunga sor sor namaman.

53 

Copyright information for `WSK