John 8

Imet kari ago wore tere nam ko den

Bare Jesus mu Duruk Olive te namaram. Ale ukiram se tumong biyala nu peleram temple ko kar ningi namaram se kariimet suen biya kote arataman. Se nu daigam ale den nunga manarukaso.

Se Law Den ko kausa kari sang, se Pharisee alo mu imet bo kari ago wore kari bo ilak aniram se nuna aringiman, ale diruwuman ilak tai kariimet nomokete beteman se sanamaram. Se nuna Jesus manorman, “Kari biya, imet imi nu kuari ago, bare munan kiaram se ana aringiman. Anananga Law Den te Moses iwita balam, imet iwita mu manga te usaganak se kuerukko balam. Se ni, awuk ikisam?”

Nuna uwuta Jesus ira aringimon se den kigilik baluk agi wore te den ningi betemonko. Bare Jesus tararam ale ali tuagu te kuting peperek te garek batagurukaso.

Se nuna isaru diruwuman se nu tarawa barasu dirmam ale nunga maonam, “Buta mu nenenga ningi awiriya numi ko ikiso nu memek bo me beteram umutang girok manga tauk ale sapuruk imet imi te usagukko.” Nu uwuta balam ale aking tararam ali te garek batagurukaso.

Se nu den mu balam se nuna ikiman mu te, suwan suwan aratu aratu nama gilingiman, kari bibiya giriman se kari sikina nogowom karoman. Nuna suen la Jesus beteman se nu kota bagaram, se imet mu koma dugu te sanamiwakaso.

10 Se Jesus tarawa barasu dirmam ale imet mu isuam, “Imet, kari imi te bagaman mu aparete namaman? Bo me ining kisam e?” 11 Se imet mu balam, “Kari Biya, bo buta me beteram,” mam. Se Jesus balam, “Buta se ani betela den mena. Am namarko. Bare udagi te kilek memek sumu me bitarko.”
John 8:1-11 Den imi mu batoga sang girakala batagorman mu te me aniso, chapter 7 verse 53 betelatala.


Jesus mu ali lilim ko Nikim

12 Udagi tala Jesus den nunga manaruwa balam, “Ani agata ali lilim ko nikim. Awiriya ani agowom karuk, mu nu tiromorom ningi me aolak iluwokko, mu nu nikim te baguruk, se nikim mu marak nunguning tuokko.”
John 8:12 Jesus mu Nikim: John 1:4-9; 12:46.


13 Se Pharisee alo nu manorman, “Ni keta suwanta ka nimi duap baluwasam. Buta se ana nika den ko nangamang ningi me nunguning arukkowo!”

14 Se Jesus nunga maonam, “Ani agata aga aimi duap balik, bare nina am ko nengemang ningi nunguning arukko. Mu awuk, kuwim aguwaya ani te tairem ale aguwaya te namirikko mu ani ko ikisam. Bare nina ani kuwim apareyate tairem ale aguwaya namirikko mu nina me ko ikisan. 15 Nina ali ko kilek te kariimet nunga tutesan. Bare ani kariimet bo me nunga tutesam. 16 Bare ani kariimet nunga tuterik mu aninga ura mu diram aratukko. Mu awuk, ani agata suwanta mena, aninga Ait aga beteram se tairem wore ilak se. 17 Nengeta ninga Law Den batoga bo te iwita balso, ‘Kari ilagala den balmon se den koma suwanta la ikial, mu nononga den mu nunguning.’
John 8:17 Deuteronomy 17:6.
18 Iwitatala, ani agata aga aimi ko duap balsam, se aga Ait aga beteram se tairem mu nu agotala aninga den sokel tuso.”

19 Nu uwuta balam se nuna nu isarman, “Se nika niet apalak bagoso ya?”

Se nu den koma balam, “Nina ani me aga ikisan, ale aga Ait betela nina me ko ikisan. E nina ani ago ko ikisan ale mu asele, aninga Ait karogo ko ikisan ale.”

20 Jesus temple ningi, kuwim nuna te Kaem nuguting munan tuikasan, wore te sanamaram ale den mu balukaso, ale kariimet den nunga manarukaso. Bare kari bo nu me taliparam. Noko tom me tai aratukaso ewerete se.

Kariimet me giris palagasan, mu nunga memek ago kuemonko

21 Jesus akingtala nunga maonam, “Ani ninga bitirik namirik se nina aninga loagaral bare me agarkalkowo. Se tom nina kueral, mu nina ninga memek ago kueralko. Nina kuwim ani te namirikko mu te namaralko me terong mam.”

22 Se Juda alo nunumi isarukasan, “Mu awuk se nu uwuta balso, kuwim nu te namuruk mu ana te namanakko me terong maman nu balso? Agi nu kota numi moruk ale kuerukko wore ko balso agi?”

23 Se Jesus balam, “Nina mu ali ewere ko. Bare ani mu ali imi ko mena. Nina mu ali ewere ko kariimet. Bare ani mu duruk wonong ko. 24 Umutang ko ani iwita ninga manem, nina ninga memek ago kueralko. Ani agata kari borta
John 8:24-25 Jesus balam “Ani agata kari borta” mam, mu nu kota Kaem tala wore numi balam. Greek den te “ego eimi” aniso, se ko nunguning mu “ani bagasam”: Exodus 3:14.
, bare aninga dugu duap baluwasam imi ko me nengemang ningi nunguning aruk, mu nunguningta nunguning, nina ninga ikup umu ago kua namaralko.”

25 Se nuna isarman, “Se ni awiri ya?”

Se Jesus nunga maonam, “Imi anigita, den ulengkala ani ninga manaru lagerem bore.
26 Aningate den suen biya nenenga munan ko am balikko, ale nenenga munan suen biya ani am tuterikko. Bare Kari aninga beteram se tairem mu ko den mu nunguningta, se den noko kuring te ikisam mu la ani nina ali imi ko kariimet ninga manorsam.”

27 Mu nu Nuet ko butata balam, bare nuna ninguru me ko ikikasan. 28 Buta se nu nunga maonam, “Tom nina Kari ko Kuriang kualala patawu ituwumon se arigal
John 8:28 Tam kangono ko den: John 3:14; 12:32. Greek den te “ego eimi” aking aniso: Exodus 3:14.
, mu tom mu te nina Ani awiriya mu aga ikialko. Ale ikial mu ani agata aga ikia me karo tusam, ani aga Ait ko kuring karo tusam, ale den nu aninga kasurso mu la balu ningarsam.
29 Kari aninga beteram se tairem mu nu ani agarak la. Ale nu ani me aga beteso. Nu ani ago ko amilmiloso. Mu awuk, ani tom suen biya mel nu balso wore la betesam.”

30 Jesus nu uwuta balam se kariimet suen biya noko nongomang ningi nunguning aram.

Abraham ko kuriang nunguning

31 Se Jesus Juda kariimet noko nongomang ningi nunguning aram mu nunga maonam, “Nina aninga den karo tual mu asele aninga olekem nunguning bagaralko. 32 Ale nina den nunguning ko ikial se den nunguning mu ninga bataguru tauk se nina te yawarakala bagaralko, dungan kari ko me bagaralko.”

33 Se Juda kari Jesus ilak bitakasan mu nu manorman, “Ana Abraham ko taleng girigir! Ana bo ko dungan katir me beteman! Se ni awuk se balem ana dungan kari ko me baganakko balem?”

34 Se Jesus nunga maonam, “Ani nunguningta ninga manorsam, awiriya memek beteso mu nu kilek memek ko dungan bagoso. 35 Ikialko. Ura dungan kariimet alo mu nunga kari biya ko kawam te tom suen biya me bagomonko. Bare kawam kotam ko kuriang alo mu asele nonet ko kawam tom suen biya te ilak bagomonko. 36 Buta se ko Namar munan memek memek mayang iwita ninga taliparam se te bagasan umu kututuwu waruk, mu nina udagi te kilek memek ko dungan me bagaralko, am yawarakala ilak bagaralko.

37 “Nina Abraham ko taleng girigir mu ani ikisam. Bare nina nengemang ningi aninga moralko ikiwasan, mu awuk, nina aninga den karo tualko me ko kuesan. 38 Ani mu mel aninga Ait ilak baga se arigem wore ko ninga manorsam. Se nina mu ninga nenet kote munan taman wore diram bitawasan.”

39 Se nuna balman, “Anananga nainet Abraham i,” maman.

Se Jesus nunga maonam, “Nina nunguningta Abraham ko kuriang ale mu, nina Abraham ko munan bitakaso turantala betesan ale. Bare mena.
John 8:39 “Anananga nainet Abraham i” makasan: Mat 3:9.
40 Den ani ninga manorsam mu ani Kaem kote taem. Bare nenenga nengemang ningi mu aninga moral se kuerikko ikiwasan. Abraham munan bo suwuta me bitakaso. 41 Nina munan betesan sumu nenenga nenet beteso wore turan nina betesan.”

Se nuna balman, “Ana lage luan kuriang mena. Anananga nainet suwanta mu Kaem.”

42 Se Jesus nunga maonam, “Nunguningta nenenga nenet Kaem ale mu, nina aninga kuesan ale. Mu awuk, ani Kaem ilak baga tairem. Ani agata aga ikia te me tairem, mu Kaem balam se ani tairem. 43 Nina aninga den balsam wore ko nunguning ninguru me ikisan mu ko duap iwita: nina aninga den ikial ale karo tualko nengemang me aniso. 44 Nina nenet Satan ko kuriang nina! Se noko ikia te namaralko ninguru kuesan.
John 8:44 Satan ko kuriang: 1 John 3:8.
Girakala biya nu kari moruk se kuerukko kari. Nu den nunguning me balso, mu awuk, nu munan ningo noko gomang te me aniso. Noko gomang ningi mu munan kawel ewere tawun biya aniso, ale ko kuring te den kawel aratoso, den nunguning bo me balso. Nu kawel kari se den kawel ko kotam nu.

45 “Ani pempem den nunguning la balsam. Se umutang ko nina aninga den ko me nengemang ningi nunguning aso! 46 Awiri aga atumukirok ale memek bo angimik te aniso agi mu wetang te bitirukko? Mena. Ani pempem den nunguning la balsam.
John 8:46 Jesus memek bo me beteram: 1 Peter 2:22 (Isa 53:9).
Se awuk se nina aninga den ko nengemang ningi me nunguning aso?
47 Kaem ko kuriang alo mu nuna noko den iki lagasan. Bare nina noko den ikial ale karo tualko mesan, mu awuk, nina Kaem ko kuriang mena.”

Abraham mena tom te Jesus bagaram

48 Buta se Juda alo Jesus ko den koma balman, “Ana den nunguning la diram balukasan, ni Samaria kari makasan
John 8:48 Juda alo Samaria kariimet nunga ari maguwukasan.
, ni bur memek kimik ningi aniso makasan!”

49 Bare Jesus balam, “Ani bur memek bo angimik ningi me aniso. Ani aga Ait ko nup patowasam. Bare nina aninga aip maguwu lagasan. 50 Ani agata nup biya taikko me aimi patowasam. Bare Tutera Kari nunguning bagoso borta aip patawoso. 51 Ani nunguningta ninga manorsam, awiriya aninga den karo tuok mu nu me kuerukko, nu tom suen biya marak bagurukko.”
John 8:51 Marak nunguning: John 5:24; 6:40.


52 Se Juda alo nu manorman, “Aitak ana nika ikiman, bur memek nikate aniso! Abraham kueram, se prophet alo betela kueman. Bare ni balsam awiriya nika den karo tuok mu nu me kueruk, tom suen biya marak bagurukko balsam! 53 Agi ni anananga girigir Abraham kiarem e? Mu nu maingkala kueram. Se prophet alo ago kueman. Se ni keta awuk nunguningkiri aratuko ago kaesam?”

54 Se Jesus nunga den koma iwita balam, “Ani agata aimi patawirik, mu aninga aip biya mu mel yam. Bare aninga Ait, Kari nina balsan nenenga Kaem masan, borta aninga aip patawoso. 55 Bare nina nu me ko ikisan, ani agata ko ikisam. Ani balik ani nu ko me ikisam maik, mu ani nenenga turan, kawel kari. Bare ani noko ikisam, ale ko den karo tusam. 56 Nenenga girigir Abraham nu ani tai kapirikko tom ikiam ale ninguru amilmilaram. Nu giram arigam ale ko gomang ningi yawarakala.”

57 Se Juda alo nu manorman, “Ikiem, nika yar 50 mena bare ni Abraham arigem masam e?”

58 Se Jesus balam, “Ani nunguningta ninga manorsam, girakala Abraham mena tom te Ani bagakasam.”
John 8:58-59 Greek den te “ego eimi” aniso, se ko nunguning mu “ani bagasam”: Exodus 3:14; John 1:1. Leviticus 24:16 mu ago arikko.


Se nuna den mu ikiman mu manga giman ale sapomon te usagomonko, bare Jesus numi kaluwuram ale temple ko kar beteram watingi aratam.

59 

Copyright information for `WSK