John 9

Jesus kari motam sisira bilangaram wore nungam

Jesus aolak iluwam namawa kari bo ko nuam tuagu ningi la motam sisira se nuam iluwam se lagaram ale bagaram mu arigam. Se noko olekem nu isarman, “Kari Biya, awiri ko memek te kari imi motam sisira bilangaram? Kota ko ikup te agi, ko nuamnuet nononga memek te?”

Se Jesus balam, “Nu motam sisira mu kota ko memek koma mena, noko nuamnuet nunga memek koma mena tala. Nu motam sisira mu te Kaem ko sokel nu kumik te wetang te aratukko. Aitak ana nikinang te bagasan. Buta se ana Kari aninga beteram se tairem mu ko ura betenakko. Tiromorom tairuk mu kari bo ura taukko me terong. Tom ani ali imi te bagasam mu ani ali ewere ko nikinang.”

Jesus den imi balam asele nu ali gege awete katingiram ale kating ali gege ago biguwuram ale kari mu motam te saparam, ale nu maonam, “Ni nama yu Siloam te guruko,” mam. (Siloam nup imi ko nunguning mu “beteman se namaram”.) Se kari namaram guram se motam nungeram se sor arikaso.

Se noko sikisaki se kariimet saki nu motam sisira baga se mel ko aikaso mu ko ariwara, se nunumi isarukasan, “Kari ewerta motam sisira la baga se kariimet manga ko nunga arukaso e?” Se sang balukasan, “Mu borta,” makasan. Se sang balukasan, “Mu kelemak, bare am ko ariga turan,” makasan. Se kari mu kota balam, “Anigita borta.”

10 Se nuna isarman, “Ni awuk maem ale sor arigisam?” 11 Se nu balam, “Kari ko nup Jesus i masan wore ali gege kating ago gurugam ale amatam te saparam. Ale aga maonam namirik yu Siloam te gurekko mam. Se ani namerem gurem se aga amatam nungeram se sor arigisam.”

Se nuna balman, “Se kari mu apalak bagoso ya?” maman. Se nu balam, “Ani me ikisam,” mam.

Pharisee alo kari motam sisira bagaram se Jesus nungam wore isa tuman

13 Se nuna kari ulengkala motam sisira bagaram mu taman ilak Pharisee nongote namaman. 14 Jesus ali gege kating ago gurugam ale kari mu ko motam te nungam mu Sabbath tom te nu mel mu beteram. 15 Buta se nuna kari mu ninguru isarukasan, “Nika motam awuk maem se nungeram?” makasan.

Se nu nunga maonam, “Jesus ali kalakolok aninga amatam te saparam se yu gurem ale amatam nungeram se te sor arigisam.”

16 Se Pharisee sang balukasan, “Kaem kari mu me beteram se tairam, mu awuk, nu Sabbath ko munan den me karo tuso.” Bare saki balukasan, “Awuk se kari memek ago wore kilek kilek uwuta beteso?” Ale nuna nunumi pagaru kari motam ilagala beteman.

17 Buta se nuna kari motam nungeram mu bo ago isarukasan ale balukasan, “Kari nika motam nungam wore ni noko awuk balsam?” Se nu balam, “Mu nu prophet.” 18 Bare Juda supuling alo nuna kari mu motam sisira baga motam nungeram se loagawoso mu ko nongomang ningi me nunguning akaso. Se nuna ko nuamnuet nunga aruman se taiman se 19 nunga isarman, “Nunguningta imi nenenga kuriang agi mena? Nina balsan nuam motam sisira iluwam ma balsan wore borta e? Bare awuk se aitak sor arigiso?”

20 Se ko nuamnuet balman, “Ana ikisan nu anananga kuriang se nu motam sisira bilangaram mu ana ko ikisan. 21 Bare ana nu aguwaya se aitak sor arigiso mu ana me ikisan. Se awiriya nu motam nungam mu ana betela me ko ikisan. Nu garuk pa! Nina nu isual se nu kota ko numi duap balukko.” 22 Noko nuamnuet uwuta balman, mu awuk, nuna Juda supuling alo nunga nguangakasan. Mu Juda supuling nuna maingkala iwita den nungurman, kari awiriya Jesus baluk nu Kristus ko baluk, mu nuna synagogue ningi karomon se udagi ningi me namurukko. 23 Se umutang ko noko nuamnuet uwuta balman, “Nu garuk pa! Nu kota isual se numi duap balukko.”

24 Buta se Juda supuling alo udagi tala kari motam nungeram mu aruman se nongote tairam se manorman, “Kaem koma te ka dugu duap nunguning la balu se ikinakko. Jesus ana ikisan mu nu memek betera kari.”

25 Se kari motam nungeram mu balam, “Nu memek ago agi mena wore ani me ko ikisam. Mel suwanta ani ikisam, mu ulengkala ani amatam sisira, bare aitak ani amatam sor arigisam.”

26 Se nuna isarman, “Nu ni kimik te awuk mam? Nika motam awuk nungam?”

27 Se nu nunga den koma balam, “Ani maingkala nina ninga manem, bare nina ikialko me kueman. Se awuk se nina aking udagi tala ikialko? Se nina betela noko olekem ko aratalko e?”

28 Se nuna nongomang magaram se den memek manorman ale balman, “Ni keta noko olekem. Bare ana mu Moses ko olekem! 29 Ana ikisan Kaem den Moses balu tuam mu ana ikisan. Bare kari imi mu nu apareyate aratam mu ana me ko ikisan!”

30 Se kari mu balam, “Mel imi mel kelemak nunguningkiri! Nu aninga amatam nungam, bare nina nu apareyate tairam mu me ko ikisan! 31 Ana ikisan, Kaem kariimet memek ago mu nuguring me ikiso. Nu kariimet ko nup patowasan ale ko kuring karo tusan mu asele nuguring ikiso.
John 9:31 Psalm 34:15.
32 Girakala biya den bo kari motam sisira bilangara se kari bo motam nungam se sor arigam mu ana me ko ikikasan. 33 Kaem kari imi me beteram se tairam ale mu, mel bo bitirukko me terong ale.”

34 Se nuna balman, “Nika niam motam sisira ka iluwam mu nika memek koma. Se aitak ni anananga kasuruko e?” Nuna iwita balman ale nu synagogue ningi mu karo gilingiman.

Kariimet sang nikinang mesan ko den

35 Se Jesus nu karoman mu ko den ikiam ale kupam arigam ale maonam, “Ni Kari ko Kuriang ko gemang ningi nunguning aram agi mena?” 36 Se nu balam, “Ani nu awiriya mu ani me ko ikisam. Se aga manaru asele ani ko angamang ningi nunguning arukko.” 37 Se Jesus nu maonam, “Ni maingkala arigem pa!” mam. “Mu kari aitakta kerak munakawoso borta.” 38 Se kari mu balam, “Kari Biya, ani angamang ningi nunguning aram.” Ale bugura kulukuam ale Jesus nup patowaram.

39 Se Jesus balam, “Ani ali imi te tairem mu te kariimet nomotam sisira iwita, lage me ko ikia, mu nomotam sor aringimonko. Se kariimet nomotam sor arigisan ale balsan, ‘Ana lage ko ikisan,’ masan, mu nomotam sisirokko.”

40 Se Pharisee sang nu kumik duap te bagaman mu den mu ikiman ale balman, “Awuk! Ana agotala namatam sisira e?”

Se Jesus nunga maonam, “Nina nemetam sisira ale mu, nina ningimik ikup mena ale. Bare nina balsan, ‘Ana sor arigisan,’ masan. Buta se nenenga ikup am ningimik te aniso.”
John 9:40-41 Pharisee alo mu nomotam sisira iwita: Mat 15:14; 23:26.


41 

Copyright information for `WSK