Luke 13

Kari me giris palaguk, mu sarenga namurukko

Tom mu te kari sang taiman Galilee kari sikina nunga duap Jesus manorman, Galilee kari mu temple ningi Kaem tama bita tuiwaman se Pilate balam se nunga moman se kueman wore ko nu manorman.

Se nu den koma iwita balu nungaram, “Nina ikisan Galilee kari memek taman umu, nononga memek biyala nunguningkiri, se Galilee saki nunga memek mu katirta, se umutang ko nuna ikup giman, iwitata ikisan e? Bare suwuta mena! Ani ninga manorsam, nina me giris palagal, mu nina agotala sarenga namaralko. Aking Jerusalem kari 18, Siloam wonong ningi wore ko kawam kalel biya mu dagulam nunga iram se kua gilingiman, mu betelatala nina ikisan nononga memek biyala nunguningkiri, se kari sang Jerusalem anikasan mu nunga memek mu katirta, se umutang ko nuna ikup giman, iwitata ikisan e? Bare mena! Ani ninga manorsam, nina me giris palagal, mu nina suen la betelatala sarenga namaralko!”

Tam fig nunguning mena se ko den ira

Jesus den mu balam asele den ira imi kariimet aking nunga maonam, “Kari bo ko ningam ningi ko tam fig aguwam. Ale udagi te tairam nunguning ko loagaram, bare nunguning mena. Se ko ura kari maonam, ‘Ikisam e? Ani yar ilagala suwan ningi taikasam bare tam ewere nunguning me kapakaso se arigem. Buta se kau saparko! Anape ko ali welang yam ipi nu kumik ko namoso ya!’

“Bare ura kari mu den imi balu tuam, ‘Kari biya,’ mam, ‘bo karogo baga yar imi aringinak ale. Yar imi te ani ali welang iru pagaru duap ningi awurek, se nunguning kapuruk agi mena agi mu aringinak ale asele,’ mam. ‘Yar imi te nunguning kapuruk agi mu asele. Mena, mu ni kau saparko!’”
Luke 13:8-9 Giris palaga ko den: 2 Peter 3:9,15.


Jesus Sabbath tom te imet bo nungam

10 Sabbath tom bo te Jesus synagogue bo ningi kariimet den nungarukaso. 11 Se imet bo bagaram, noko kumik ningi bur memek bo bagakaso, se bur memek mu ilak baga se kuera tui tui ilak tai yar 18 aram. Se imet mu ko susurukuting patangam se dirmaukko me terong. 12 Se Jesus imet mu arigam ale auram se kote tairam se maonam, “Imet,” mam, “ani nika kuera menawurem,” ma balam, 13 ale kuting nu kumik te beteram se tairatela susuru dirmam se Kaem nup patawukaso.

14 Bare synagogue ko kari supuling nu Jesus nononga Sabbath kam wore te imet nungam se nungeram mu ko gomang magaram. Buta se nu kariimet nunga maonam, “Nenenga nengemang kari bo ninga kuera menawurokko, mu ura kam 6 mu bo ningi tairalko. Nina Sabbath tom te me tairalko.”

15 Se Kari Biya nu maonam, “Nina kawel kari! Nina nengeta suen la Sabbath kam te ura ilusan tala! Nina bulmakau nunga kawam te namasan ale bulmakau donkey nunga kututuwusan arungu namasan se yu no gilingisan. 16 Imet imi Abraham ko taleng girigir, bare Satan yar 18 ningi kuera memek te iluwam ilak bagakaso. Buta se ani kuera memek nu taliparam ilak bagaram mu Sabbath kam te se ani nungekko me terong e?”
Luke 13:16-17 Jesus mu Sabbath kam ko Kari Biya: Luke 6:5.


17 Nu uwutata balam se kari nu kumik ko nongomang magawaram mu den ikiman ale dolakasan. Bare kariimet mu Jesus ura mel bitakaso mu ko amilmilaman.

Tam mustard se yeast buta nunga den ira

(Mat 13:31-33; Mark 4:30-32)

18 Se Jesus den ira imi nunga maonam, “Kaem ko kingdom wore anape iwita? Se ani awuk ta ko balikko? 19 Kaem ko kingdom mu tam mustard ko muguri kari bo tam ale ko ningam te aguwam wore turan. Se tarigiram tam biya iwita lagaram. Se inanganang taiman ale ko kower te nunga singir moa gilingiman.”

20 Se akingtala balam, “Kaem ko kingdom mu anape turan tala? 21 Mu yeast iwita, se imet bo yeast mu tam ale plaua biyala karogo gurugam se lagaram aromemek aram wore iwita.”

Lage korang kirikimik gotek

(Mat 7:13-14; 21-23)

22 Jesus Jerusalem namurukko se ko lage kaoram aolak ilu se, wonong bibiya se wonong gotektek te kariimet den nunga kasuru kasuru namakaso. 23 Se kari bo nu isuam, “Kari biya,” mam, “Kaem kariimet ilagalata nunga giokko e?”

Se Jesus nunga maonam,
24 “Sail tagiral ale lage korang gotek mu ningi nama naguralko. Mu awuk, ani ninga manorsam, kariimet suen biya lage korang mu ningi nama nagumonko kaemon, bare nuna me terong mamonko. 25 Mu awuk, kawam kotam barasuk ale kawam ko songkuring baguruk, se nina saki udagi tairal matangi sanamaral, ale kawam songkuring moral, ale iwita airal balalko, ‘Kari biya, ana kawam korang kagaru nangaruko!’ malko.

“Se nu ninga manukko, ‘Nina arikaya wore ani me ninga ikisam,’ ma balukko.

26 “Se nina nu maonalko, ‘Ana nikerak na yu naman wore taiman ale ka arusan. Ale aking ni anananga wonong te tairem den nanga manem,’ ma balalko.

27 “Bare nu ninga manukko, ‘Ani ninga manorsam, nina arikaya bare ani me ninga ikisam. Yam tagi talko! Nina suen la memek kari!’ maukko.
Luke 13:27 Luke 6:46 ago arikko.


28 “Se nina Abraham Isaac Jacob, se prophet suen la Kaem ko kingdom ningi bagomon se nungarkal, bare nina mu ninga warmon se matangi sanami se nungarkal, ale ninguru mo nia se negere gik gek ma se bagaralko. 29 Kariimet sor wonong suen biya ko taimon ale Kaem ko kingdom ningi nama nagumon dagimon, ale na biya kapuruk mu no se bagomonko. 30 Ikialko. Kariimet saki aitak nukum te biya bagasan, mu tom mu te gira motam te bagomonko. Se kariimet saki aitak gira motam te anisan, mu tom mu te nukum te pelemon ale bagomonko.”

Jesus Jerusalem ko mo niakaso

(Mat 23:37-39)

31 Tom mu te Pharisee saki Jesus kote taiman ale manorman, “Herod
Luke 13:31 Mu Herod Antipas, Herod Biya ko kuriang bo.
nika moruk se kuarko! Se ni ewela me bagerko, sor bo te namarko!”

32 Se Jesus nunga maonam, “Namaral kausik diwang sumu aninga agiring iwita maonalko, ‘Ikiko, aitakta se ukurukse ani bur memek nunga karo warik, ale kariimet kuera ikes ago mu nunga nungekko. Ale ko ukirok, mu ani sor te namawasam mu te nama aratik ale aninga ura nukum kalikko.’ Se namaral aninga agiring uwutata maonalko. 33 Bare aitakta, se ukurukse, se ko awurukse, mu ani am Jerusalem lage karowirikko. Mu awuk, prophet bo ta Jerusalem wonong buring ko matangi me kueso!

34 “O Jerusalem, Jerusalem! Nina prophet alo nunga mosan se kuesan, se kari saki tala Kaem nunga beteso se nengete taisan wore manga te nunga usagasan se kuesan! Tarak nuam ko gotek nunga gi luman bowa ningi nunga tuguso ale nunga bitarso iwitatala, ani tom suen biya ninga biguwurek ale angamang ningarikko, bare nina miakasan. 35 Buta se ikialko, nenenga temple
Luke 13:35 Greek den te “kawam” aniso. Kaem Jerusalem alo nunga meruk ale Jerusalem wonong se ko temple bitirukko: 1 Kings 9:6-9; Jer 12:7; Luke 21:5-6.
am ipi anirukko. Ani ninga manorsam, nina ani bo karogo me agarkal, nama tom udagi nina iwita aga balal, ‘Kari nu Kari Biya ko nup te taiwoso imi Kaem marak sokel tuam,’ ma balalko.”

Copyright information for `WSK