Luke 15

Sipsip yumuram ko den ira

(Mat 18:12-14)

Tom bo takis tata kari se kilek memek betera ko kari alo Jesus kumik duap te den ikimonko taiman bagakasan. Se Pharisee kari se Law Den ko kausa kari nuna nongomang magaram se balukasan, “Kari imi kilek memek betera ko kari alo wore nunga giso ale arungak na naso!” makasan.

Buta se Jesus den ira imi nunga maonam, “Nenenga ningi kari bo ko sipsip 100, bare bo yumurok se koma me arigok, mu nu sipsip mu me kupok i? Mena. Mu nu sipsip 99 na nowasan mu nunga awu bitiruk ale suwanta yumuram mu ko kupok namuruk ale loaga gurugu laga nama arigokko. Asele amilmil ago patawuruk biwinang te giok ale ago ko kawam te tairukko. Ale ko sikisaki, ko bagara suwan nunga aurok ale nunga manukko, ‘Tairal ani agarak amilmilaralko! Aninga sipsip bo yumuram wore arigem!’ ma balukko. Ani ninga manorsam, koma suwanta tala, kari kilek memek bita lagoso bare giris palagoso ale ko kilek memek mu buring tuso, mu engel alo duruk te mu kari umutang ko amilmil biyala nunguningkiri betesan. Se engel alo kariimet 99 nunga munan ningo diram se me giris palagasan, mu nogo ko amilmil betesan mu kiaso.

Manga biling yumuram ko den ira

“Uwutatala, imet bo ko manga biling 10 se bo yumurok, mu nu me ko loaguruk i? Mena. Mu nu galep kasuruk ale sor ungiok, ninguru ko loaguruk nama arigok tauk, ale ko sikisaki se ko wonong suwan nunga aurok, ale nunga manuk, ‘Tairal ani agarak amilmil beteralko! Aninga manga bo yumuram wore aking arigem taem se,’ ma balukko. 10 Ani ninga manorsam, koma suwanta tala Kaem ko engel alo kari memek bo giris palagoso, mu nuna ko ningurutala amilmilasan.”

Kuriang kulak nuet beteram awar biya namaram wore ko den ira

11 Jesus nunga maonam, “Kari bo ko kuriang kari mu ilagala. 12 Se ko namar gotek mu nuet maonam, ‘Ba,’ mam, ‘ni ka melmasak udagi te ana ginakko wore kusumuri pagaru ale aninga mu aitakta aisuko,’ mam. Se nonet manga melmasak kusumuri paogam ale saki namar biya mu tuam, ale sikina namar gotek mu tuam.

13 “Se kam me maiyam tala, namar gotek mu barasam, melmasak pagaru tuam mu suen la giam, ale karogo ali sor bo awar biya mu te namaram. Ale ko melmasak giam ago namaram mu numi patowara ko munan te am ngual ngual waru sapa kutuwuram. 14 Asele udagi karak biya sor mu te kaparam. Se nu kumik mel mena se tataparam. 15 Ale wonong mu ko kari biya bo kote ura tuokko isaru arigokko namaram. Se kari biya mu nu namuruk buruk nunga bituokko balam, se namaram buruk nunga bitarukaso. 16 Buruk bin guang nokasan, se nu arikaso ale nu am ngual ago naukko kaeyakaso. Mu awuk, kariimet bo nu na tuok se naukko wore mena.

17 “Buta se nu nguala sipawa, asele ko ikia dirmam se balam, ‘Aninga ba ko ura dungan kari mu nunga inang nasan se saki yam aniso. Bare ani mu imi te karak kua lagasam ale kuerikko tom pingi aram! 18 Buta se ani am barasik ale pelerik aga ba kote namirik ale iwita balikko: Ba, ani ikup biya Kaem koma te se ni kema te beterem. 19 Se ani nika kuriang ko me aga baluko. Ani yam nika ura dungan ko iwita aga bitarko, iwitata ma balikko,’ mam. 20 Asele nu barasam ko ba kote namakaso.

“Bare nu awar biya taiwaram se ko nuet arigam ale ninguru gomang batagam, se naguram namaram ale iluwam yasaram, ale ilak mam niaram.
21 Se ko kuriang nu maonam, ‘Ba,’ mam, ‘ani ikup biya Kaem koma te se ni kema te beterem. Se ani nika kuriang ko me aga baluko.’

22 “Bare ko nuet ko ura kari alo nunga maonam, ‘Nina tairate namaral guang ningo nuam wore tal ago tairal ale tugu tualko. Ale ring bo kuting tugumal, ale su bo tugu tualko. 23 Ale bulmakau borok na ko koma mu arigal iluwal, se ana no se ilak amilmilanakko. 24 Mu awuk, aninga kuriang imi kueram bare aking maragaram. Aking yumuram bare aking ana arigisan.’ Nu iwitata balam mu te suen la amilmil duap beteman.
Luke 15:24 Nu kueram bare aking maragaram: Eph 2:1,5; Col 2:13.


25 “Bare noko namar biya mu ningam ningi bagaram. Ale udagi te nu peleram kawam te tai se, amilmil biya bawe ago bita se animan mu ikiam. 26 Ale ura kari bo auram se kote tairam se isuam, ‘Owore anape bitawasan a?’ mam. 27 Se ura kari balam, ‘Nika uria peleram tairam. Se ka niet bulmakau borok na ko koma wore iluwam. Mu awuk, ko kuriang nama yumuram, bare aking yawarakala peleram kote tairam, owore ko.’

28 “Bare kuriang laun mu gomang maga kaparam, se nu kawam ningi kasu nagurokko me kaeyakaso. Se ko nuet aratam tairam iluwam ale gomang kulukurukaso. 29 Bare nu yam gomang maga kaparam, se nuet maonam, ‘Ikiko! Ani yar suen biya nika ura bitakasam, nika ura dungan bo iwita bagakasam, ale nika kiring sang me mia arikasam. Bare ani nika belelek gotek bo me aisukasam se aga sikisaki arungu me nokasan amilmilakasan. Mena biya. 30 Bare nika kuriang sumu nika mel suen biya giam ale ago nama lage luan imet te nunga dia saparam, ale peleram tairam se ni bulmakau borok yawara wore ilu tuem ale ilak amilmilasam e?’

31 “Bare nuet den koma iwita nu maonam, ‘Aga kuriang,’ mam, ‘ni analak tom suen biya ana wete bagasan, se aninga mel suen la mu nika mel. Bare aitak ana na no se amilmil betenakko. Mu awuk, nika uria mu kueram, bare tai aratam. Nu nama yumuram, bare aking ana arigisan.’”

32 

Copyright information for `WSK