Luke 16

Bitua kari kawel ko den ira

Jesus ko olekem nunga maonam, “Kari bo ko manga biya mu bagaram, se bitua kari bo ko melmasak bitarukaso. Se kari sang taiman kari biya mu manorman, ‘Nika bitua kari mu ka manga melmasak am ngual ngual warso,’ ma balman. Se nu ko bitua kari mu auram se tairam se isuam, ‘Ni awuk bitakasam se ani nika den ikiem a?’ mam. ‘Aninga mel suen biya ni kiting te aniram wore ko duap ninguru balu se ikiekko! Ni aninga bitua kari ko me bagerkowo!’

“Se bitua kari mu ko gomang ningi la balukaso, ‘Kari biya imi ani ko ura te bagirikko me kueso, aga karoso. Se ani awuk maik? Ani ningam ura iluwekko asokel me terong. Aking lage karik ale manga se inang mel ko airik ngatangirikko mu dolasam. Aa, ikia bo taem! Ani ikia mu bitirik, mu tom kari biya aga karuk, mu kari saki aga arumon se nunga kawam kawam te namirikkowo,’ ma balam.

“Ale nu kari suen biya noko kari biya kote mel tutuk giman se ko ikup nongote aniram mu nunga auram se suwan suwan taiman. Se nu kari giram tairam mu isuam, ‘Ni aninga kari biya ko ikup awila kete aniso ya?’ mam. Se nu balam, ‘Ani olive oil ZZZ drum / dram 100 diram,’ mam.
Luke 16:6 Mu olive oil biyala, 3000 litres iwitata.
Se nu balam, ‘Ka ikup tam gawa te aniso mu iweya. To dagi ale tairatela 50 ko iwita nunguruko.’

“Aking kari bo tairam se bitua kari nu isuam, ‘Nika ikup awila aniso ya?’ mam. Se nu balam, ‘Wheat singir 100 diram,’ mam.
Luke 16:7 Mu wheat biyala, 21,000 kilogram iwitata.
Se nu balam, ‘Nika ikup ko tam gawa imi to ale 80 ko diram ko tom nunguru bitarko!’ mam.

“Se udagi te ko kari biya mel ko bitua kari kawel imitang beteram mu ko ikiam, ale ko nup iwita patowaram, ‘Bitua kari imi kawel ko munan ninguru ikiso pa!’ ma balam.”

Jesus dugu duap umutang ko olekem nunga maonam, asele balam, “Nina ikialko. Kariimet ali imi ko munan karo tusan, mu nuna nunumi kula ko munan mu ninguru ikisan. Ale kariimet sang Kaem ko nikim te baga se kuring ikiwasan, mu kawel ko munan mu te nunga kiaman.
Se ani iwita ninga manorsam, nina ali imi ko manga tal ale kariimet te nunga saongal se nuna ninga singsang ko aratomonko. Se udagi, manga iluwa ko tom menaruk mu te, nuna ninga gimon ale duruk wonong te kawam tom suen biya te bagaralko mu te nengerak namomonko.

10 “Mu kari awiriya ura gotektek ko diram la sinar taso, kawel te me beteso, mu nu ura bibiya mu ko ago sinar taukko. Bare kari awiriya ura gotektek te kawel beteso, mu nu ura bibiya te ago kawelurukko. 11 Se nina ali imi ko manga mel nigiting te beteman wore munan kawel sang ago te beteral, mu Kaem duruk wonong ko mel yawara bitualko ningaruk i? Mena. 12 Akingtala nina kari bo ko mel ko me sinar tal, mu Kaem nina nengeta ninga mel yawara ningaruk i? Mena tala.

13 “Ura kari bo, nu kari bibiya ilagala nunga ura iluwokko mu me terong. Mu awuk, nu kari biya bo meruk ale bo la ko kuerukko. Aking bo la ko kuring karo tuok ale bo mu ko kuring merukko. Ni Kaem se manga, ilagala la nunga ura ilupko me terong. Ni manga nika kaem ko bitar, mu Kaem duruk wonong te bagoso mu nika Kaem mena.”

14 Pharisee alo den Jesus balam mu ikiman, bare nuna manga ko ninguru kuakasan ale Jesus gusirukasan. 15 Se Jesus nunga maonam, “Nina kariimet nomotam te kawelasan ale kilek ningo betesan se ninip patowasan, bare Kaem nenenga nengemang ningi ariwoso. Mel kariimet nup patowasan mu Kaem koma te iwiwara siring ago.

Law Den se Kingdom ko den

16 “Anuwa Kari John me taikaso la, Law Den se prophet nunga den mu ikia ningarukaso. Bare tom John ura duap beteram eng tai aitak, mu Kaem ko kingdom ko den gilalong yawara biyala balukasan. Se aitak kariimet kingdom mu ningi kasu nagumonko ninguru sail tagisan. 17 Bare ali se taiti bowa ko baras sige worem mu am menaruk, bare Law Den mu ko nuamur bo me mena namurukko.

Nuwus-kuari numi mera ko den

(Mat 5:31-32; 19:9; Mark 10:11-12)

18 “Kari bo ko nuwus karoso ale imet iru taso, mu nu nuwus-kuari ko munan maguwuso. Aking kari bo ko imet karoso se kari bo aking taso, mu betela, kari udagi imet umutang taso mu nuwus-kuari ko munan maguwuso.
Luke 16:18 Nuwus-kuari numi mera ko den: 1 Cor 7:10-11.


Kari kumik mel suen biya se kari kumik mel mena Lazarus buta nunga den

19 “Kari bo bagakaso, nu ko manga se ko melmasak suen biya. Se nu pempem kumik guang ningo la nagukaso, ale ko na ningo ningo la nokaso. 20 Se kari bo kumik mel mena, ko nup Lazarus, wore noko kawam kuringi bagakaso. Nu lot suen biya kumik te, se kausik taikasan ko lot kupikasan. Se noko gomang biyala mu nu manga kari ko na inang bunetutuk kapakaso wore naukko kuakaso.

22 “Udagi te kari kituwura Lazarus kueram, se duruk te ko engel taiman ilak Abraham kote nama beteman se ilak bagakaso. Se aking manga kari mu betela kueram se mutim tuguman. 23 Nu tama ningi baga se yaman tawun biya tokaso. Ale kualala loagaram mu Abraham arigam, mu Abraham awar biya Lazarus ilak bagaram se arigam. 24 Ale airam balam, ‘Ba Abraham,’ mam, ‘ani yaman gotek am mena tama ningi arigisam,’ mam. ‘Se ni ani ago ko neman bataguk se gemang aisu ale Lazarus manaru se tairuk, ale kuting peperek yu ningi mituwurok, ale bugulik ago tairuk angamili te pok mauk se angimik ipirokko,’ ma balam.

25 “Bare Abraham nu maonam, ‘O kuriang,’ mam, ‘tom ni marak bagakasam wore ko kamin ares maukko! Tom mu te nika mel yawara la karogo. Se Lazarus nu mel memek arikaso. Bare aitak kuwim imi te mu nu amilmil te bagoso, se ni yaman tasam. 26 Se mel bo agotala, gamung bataga wosasel se du biya mu kusumuri aniso tala. Buta se kariimet koma imi te anisan, mu komasang sumu te namomonko me terong. Aking kariimet koma sumu te mu imi te taimonko mu me terong tala.’

27 “Se manga kari mu balam, ‘Buta se, ba, ani nika arusam, ni Lazarus manaru se aninga ait ko kawam te namuruk ale 28 aninga launuria 5 anisan mu den aora biya nunga manuk se giris palagomonko. Nuna kuemon ale yaman kuwim ewerete taimon bore ko.’

29 “Bare Abraham balam, ‘Moses ko den, se prophet nunga den mu nuna ikisan tala. Bare am ningurutala ikimon ale te giris palagomonko.’

30 “Bare manga kari mu balam, ‘Ba Abraham,’ mam, ‘mu me terong. Bare kari kueman wore bo barasuk nongote namuruk ale nunga manuk, mu asele nuna giris palagomonko.’

“Bare Abraham nu maonam, ‘Nuna Moses ko den se prophet nunga den me karo tusan, mu kari bo kueram mu barasuk ale nongote namuruk, bare betelatala ko nongomang ningi me nunguning arukkowo.’”

31 

Copyright information for `WSK