Luke 18

Imet gerewa bo judge nu sangukko manaru lagakaso ko den ira

Jesus ko olekem tom suen biya Kaem aru ngatanguru se bagomonko kuakaso,
Luke 18:1-8 Ana Kaem aru ngatanguru se baganakko: Luke 11:9; Rom 12:12; Col 4:2; 1 Thes 5:17;
ale umutang ko nu den ira imi nunga maonam ale balam:
“Tom bo te judge bo wonong bo te bagaram, mu nu Kaem ko me nguangakaso, ale kariimet nunga me kuakaso, nu kota ko ikia te la bagakaso. Se imet bo ko kuari kueram se gerewa bagaram mu wonong mu te ago bagakaso. Ale tom suen biya taikaso judge noko den sanguk ale ko kager kari ko den sokel menawurokko ko manarukaso.

“Tom suen biya nu judge mu manarukaso se ikikaso, bare nu me sangarukaso. Bare laga, udagi te gomang ningi la iwita balam, ‘Ani Kaem ko nguangirikko kari mena. Se imikiri saki nunga kuerikko kari mena tala. Bare imet gerewa imi ani ura ikup aisiso. Se ngual ta, ani noko den ikup mu ko am sangikko. Nu tom suen biya agate nama tai laguruk se angimik gagoruruk bore ko!’”

Se Kari Biya Jesus den ira imi uwutata balam, asele ko olekem nunga maonam, “Nina judge memek mu ko kuring ani balem mu ikiman e? Judge mu ko munan memek, bare nu imet gerewa mu saongam. Se kariimet Kaem noko ma nunga balam se turom woremkalal nu aru ngatanguru lagasan, mu Kaem me nunga sanguk i? Agi yam iki bita laga tairate me nunga sanguk i? Mena. Ani ninga manorsam mu nu tairate nunga sangukkowo! Bare tom Kari ko Kuriang mu peleruk tairukko, mu kariimet suen la nongomang ningi nunguning te bagomon se nungarkuk i?”

Pharisee kari se takis tata ko kari buta nunga den ira

Kariimet saki nunumi ikikasan nongota la kariimet ningo diram ko nunumi balukasan, ale sikina mu memek ago iwita nungarkikasan. Se Jesus den ira imitang nunga maonam: 10 “Kari ilagala,” mam, “temple ningi Kaem aru ngatangomonko namaman. Kari bo mu Pharisee, se kari bo mu takis tata ko kari.

11 “Se Pharisee mu kota nama kigilik sanamaram, ale iwita Kaem aru maonam, ‘O Kaem,’ mam, ‘ani kari sikina, o tere kari, se kawel kari, se imet ago tere na ko kari, mu nunga iwita mena, se takis ta ko kari imi tuar mena tala. Buta se ani ni amilmil kisisam. 12 Ani week suwanta ningi tom ilagala te na yu naikko agiring kalosam. Ale manga mel gisam mu suen la pagorsam ale bo kutuwusam ni kisisam,’ mam.
Luke 18:11-12 Pharisee alo nunga munan: Mat 23:23,28; Luke 16:15.


13 “Bare takis tata ko kari mu awar sanamaram, ale motam kau patowaram kualala me loagaram. Mena. Nu am maigam baga se Kaem aru maonam, ‘O Kaem, ani ikup memek ago pa,’ mam. ‘Ni gemang ani aisuko!’ mam.”

14 Jesus balam, “Ani ninga manorsam, tom nuna ilagala temple beteman arataman ale nunga kawam kawam te namaman, mu takis tata ko kari umutang la Kaem noko balam kari ningo diram ko balam. Mu awuk, kari nu kota numi nup patawoso, mu Kaem nu ira kutuwurok se kapurukko. Bare kari kota numi ira kutuwuso ale nup mena iwita lagoso, mu Kaem nu patawu kualala bitirukko.”

Jesus kuriang gotektek marak nungaram

(Mat 19:13-15; Mark 10:13-16)

15 Se kariimet saki nunga kuriang arungu Jesus kote taikasan. Nononga nongomang Jesus nu kuting nungumik te bitirukko wore ko arungu taikasan. Bare noko olekem nungarkaman ale ining nungarukasan. 16 Se Jesus kuriang gotektek nunga auram se kote pingi taiman. Se balam, “Nina kuriang gotektek me nunga kaoralko, am nunga awural se aningate taimonko. Mu awuk, Kaem ko kingdom mu kariimet kuriang gotektek es ta imitang iwitata wore nunga. 17 Ani den nunguning ninga manorsam, nina ninimi gurugal ale kuriang gotektek imi nunga turan me aratal, mu nina Kaem ko kingdom ningi me ta kasu naguralko.”

Kari bo kumik mel suen biya ago wore ko den

(Mat 19:16-22; Mark 10:17-22)

18 Se kari supuling bo Jesus isuam, “Nanga kari biya yawara, ani awuk maik ale marak yawara tom suen biya te bagirikko wore taikko ya?”

19 Se Jesus nu maonam, “Ni anape ko aninga balsam ‘kari biya yawara’ masam? Kaem kota suwanta diram yawarakala. 20 Ni maingkala munan Kaem Moses tuam se batogam mu ko ikiem: Ni saman katagot bitar ale nuwus-kuari ko munan me maguwurko. Ni kari bo me moar se kuerukko. Ni me tere noko. Ni kari bo kumik te den kawel me baluko. Ni niam niet nuguring karo tui se nunup patawurko.’”

21 Se kari supuling mu balam, “Tom ani kuriang gotek la tai aitak mu ani munan imi suen la karo tui saperem.”

22 Se Jesus den mu ikiam ale balam, “Mel suwanta ni me beterem. Ni namar ale ka melmasak suen la dia sapar, ale ko manga to ale kariimet nungumik mel mena mu nungaruko. Ni uwutata bitar mu asele nika mel yawara yawara mu duruk wonong te anirukko. Asele ni tair ale ani agowom karoko.”

23 Bare kari supuling den mu ikiam ale gomang biyala batagam. Mu awuk, nu kari kumik mel suen biya ago ewerete se.

Kariimet nungumik mel suen biya ago nunga den

(Mat 19:23-30; Mark 10:23-31)

24 Jesus kari mu arigam mu gomang batagam se balam, “Kari nungumik mel suen biya ago, mu nuna Kaem ko kingdom ningi kasu nagumonko mu ura kowar nunguningkiri. 25 Camel mu guang te birira ko nil ko gogong gotek mu ningi kasu nagurokko mu ikup biya. Bare kari ko manga melmasak suen biya mu Kaem ko kingdom ningi kasu nagurokko mu ikup biya nunguningkiri.”

26 Se kariimet noko den ikiman ale isarman, “Buta mu arika marak yawara tom suen biya te bagomonko mu tamonko ya?”

27 Se Jesus den koma balam, “Mel kariimet betemonko me terong, mu Kaem bitirukko terong mam.”

28 Se Peter nu maonam, “Ana nanga melmasak suen la awu beteman ale ni kewom karoman!”

29 Se Jesus nunga maonam, “Ani den nunguning ninga manorsam, kariimet Kaem ko kingdom ko den balmonko mu ko, nunga wonong kawam beteman, ale nunga imet kuriang, nunga launuria nunam nonet nunga awu beteman, 30 mu Kaem tom imi te mel mu ko koma biyala nungarukko. Ale tom udagi te mu marak ningo nuna tom suen biya te bagomonko mu ago nungarukko.”

Jesus akingtala balam nu kueruk ale barasukko mam

(Mat 20:17-19; Mark 10:32-34)

31 Se Jesus ko olekem 12 nunga giam ale arungu tagi tam ale nunga maonam, “Ikialko!” mam. “Ana aitak Jerusalem namasan. Se den suen biya Kari ko Kuriang ko prophet girakala balman mu ko nunguning kapurukkowo. 32 Nuna nu ilumon ale ali sor saki ko kari nuguting te betemonko. Se nuna gusia den manarmon ale dolara tumon, ale katingurmon, 33 ale lilumomon, ale momon se kuerukko. Bare tom ilagala suwan mu te nu aking barasukkowo.”

34 Bare ko olekem den mu ikiman, bare ko nunguning ko ngualakasan. Mu den suen la nu balukaso mu ko nunguning mu nononga te yumuram.

Jesus kari bo motam sisira mu nungam

(Mat 20:29-34; Mark 10:46-54)

35 Jesus tai Jericho aratuwaram se kari bo motam sisira mu lage kinikan ko dagiwa se imikiri manga mel ko nunga aru ngatangaruwakaso. 36 Se kariimet motam biya aolak iluman taiman se nirung ikiam, ale kari sang nunga isuam, “Bare awuk masan a?” mam.

37 Se nuna nu manorman, “Jesus Nazareth ko wore aolak iluwam taiwoso,” maman.

38 Se nu biyala airam balam, “Jesus, ni David ko Kuriang, ni gemang aisuko!” mam.

39 Se imikiri gira animan mu nu ining tuman, “Ni kutek meko!” makasan. Bare nu yam biyala airam balukaso, “Ni David ko Kuriang, ni gemang aisuko!” makaso.

40 Se Jesus pingi tairam sanamaram ale nunga maonam, “Diruwural ilak aningate tairalko,” mam. Se ilak nukote taiman se Jesus nu isuam, 41 “Nika gemang ani kimik te awuk bitirikko kuesam?”

Se nu balam, “Kari Biya, ani loagirik sor arigekko kuesam.”

42 Se Jesus balam, “Sor arikko!” mam. “Nika gemang ningi nunguning ka nungam se nungerem.”

43 Se tairatela kari mu ko motam nungeram se sor arigam. Ale nu Jesus kowom karo se, Kaem nup patawukaso. Se kariimet mel mu aringiman ale nuna agotala Kaem nup patowaman.

Copyright information for `WSK