Luke 2

Maria Jesus iluwam

(Mat 1:18-25)

Tom mu te Caesar Augustus munan iru bo beteram se kariimet suen la nu bitaruwara mu nunup buk te bitakasan.
Luke 2:1-2 Mu census ura bitakasan.
Tom mu te Quirinius mu Syria sor bitarukaso, nu kari biya Caesar bowa ningi.
Se kariimet suen biya nunga wonong duap ko pilakasan ale nunup buk te bita bita namakasan.

Se Joseph mu David ko gue te nu aratam. Buta se nu Galilee ningi Nazareth wonong beteram ale Judea ningi Bethlehem wonong te namaram, mu awuk, Bethlehem mu David ko wonong duap. Se nu ko imet Maria, luan ilu beteman, mu ilak nunup batagarmonko namaman.

Maria mu tuagu karogo.
Se ilagala wonong mu te baga nu kuriang iluwokko tom aram. Bare daup kawam mu kariimet terong maman, se nuna bulmakau kawam ningi namaman ale baga, Maria ko kuriang laun mu iluwam, kari. Ale guang te isi gurugam, ale bulmakau nunga taiwir ningi beteram se aniwaram.

Engel alo sipsip bitua kari den nunga manorman

Koma mu te sipsip bitua kari saki bagaman, mu nuna turom wonong buring ko nunga sipsip bitaru se animan. Se Kari Biya ko engel bo nongote tairam ale ko nikim biyala nunga taluru gurugam, se nuna ninguru nguangaman. 10 Bare engel nunga maonam, “Me nguangaralko! Ani den yawara nunguningkiri giem ago nengete tairem. Kariimet den imi ikimon ninguru amilmilomonkowo! 11 Aitakta David ko wonong te kuriang bo bilangaram mu nenenga Saonga Kari, nu Kristus, nu Biya. 12 Nina te arigal ko ikialko mu, nuna kuriang mu guang te isi guruguman ale bulmakau nunga taiwir ningi beteman se aniwoso.”

13 Engel nu butata baluwaram se Kaem ko engel motam biya taiman ale engel umutang ilak Kaem nup patawukasan, ale balman:

14 “Ana Kaem duruk te ko nup kualala biya patowanakko!
Se aliti kariimet arikaya Kaem nogo ko kueso mu ko lila te bagomonko.”

Sipsip bitua kari namaman Jesus aringiman

15 Engel nunga beteman duruk te peleman namaman, se sipsip bitua kari alo nunumi manorman, “Aria, ana Bethlehem namanak ale Kari Biya mel nanga kausam wore aringinakko,” maman. 16 Ale nuna tairate namaman, Maria Joseph ilak nungarkaman, ale kuriang bulmakau nunga taiwir ningi aniwaram se aringiman.

17 Nuna kuriang aringiman, mu namaman ko den engel nunga maonam mu balu balu geragaman. 18 Se kariimet sipsip bitua kari nuguring te den mu ikiman ale biririkiman. 19 Bare Maria den mel suen biya aratam mu gomang motam ningi anikaso se ko iki gurugu se kuamin tugu se bagakaso. 20 Se sipsip bitua kari peleman Kaem nup patawu se nuguwim te namaman. Nuna mel suen biya engel balam se ikiman butata aringiman, ale Kaem ko ninguru amilmilakasan.

Kuriang nup beteman Jesus i maman

21 Tom 8 mu te nuna kuriang ko kumik guang batagorman ale nup beteman Jesus maman, nup mu noko nuam tuagu me arata la engel balam wore te beteman.

Nuna Jesus ilak Jerusalem temple ningi namaman

22 Moses ko Law Den te aniram iwitata, Maria temple ningi namuruk ale kuriang Kaem tui se nu kota ko karur ko Kaem tama tuokko ko tom tai aratam. Se Joseph Maria ilak kuriang giman ale ilak Jerusalem, Kari Biya kasurmonko namaman.
Luke 2:22 Juda nunga munan te, imet kuriang iluwok mu nu Kaem koma te “karur ago” makasan. Se nu am baguruk nama tom 40 mu asele nu temple ningi namuruk ale Kaem tama tuokko, nu kuriang tam ko karur te menawurokko: Lev 12:1-8.
23 Kari Biya ko Law Den te iwita batagorman se aniso, “Kuriang laun kari nuam iluwok, mu ilak nama Kari Biya kasurmonko.”
Luke 2:23-24 Exodus 13:2, 12, 15; Leviticus 12:8.
24 Se tom mu te nuna ilagala agotala tama betemonko namakasan, Law Den te aniram iwitata, inanganang biton ilagala agi, arum ilagala agi wore, ago nama Kaem tama tumonko.

25 Se kari bo Jerusalem bagakaso, ko nup Simeon. Nu Kaem ko munan karo tua ko kari, se ko bagara diram. Nu Israel nunga Saonga Kari tairukko mu ko kimi bita se bagakaso. Se Korang Bur nu ilak bagakaso. 26 Bur maingkala nu maonam, “Ni me kuar la, Kaem Kristus bitiruk se tairuk mu arik asele kuarko,” mam. 27 Se tom mu te Korang Bur Simeon ikia tuam, se temple ningi namaram ale bagaram. Se Jesus ko nuamnuet giman ale Law Den balam iwitata, Kaem koma te betemonko ilak taiman. 28 Se Simeon kuriang arigam ale tam yasaram, Kaem nup patowaram, ale iwita balam:

29 “O Kaem Biya, ni mel suen biya bitarsam,
ni balem butata beterem se aratam.
Ani nika ura kari, ni aitak aninga bitar se angamang yawarakala / lila te am namirikko.
30 Mu awuk, kari nanga sangukko ni balem, mu ani agata aga amatam te arigem,
31 ni ka ikia kariimet suen la nunga ningo nuam ko nunguru beterem se aniram mu ko nunguning wetang te aratam.
32 Mu nu galep, se sor saki ko kariimet ni me ka ikia mu ningi kaniruk nikim nungarukko,
se nu te nika kariimet Israel nup biya tamonkowo.”
Luke 2:32 Jesus mu ali lilim ko Nikim: John 8:12.

33 Simeon kuriang kumik te den uwutata balam, se Jesus ko nuetnuam mu ko biririkiman ale ikia nunga moakaso. 34 Se Simeon marak den nungaram ale kuriang ko nuam Maria iwita maonam, “Kuriang tairam imi te, Israel kariimet sang dagulomon memek tamon, se sang barasomon yawarakala bagomonko.
Luke 2:34 Israel kariimet sang Jesus nubiring tuman: Isa 8:14; Mat 21:42; 1 Cor 1:23; 1 Pet 2:8.
Nu Kaem kote tairam, bare kari suen biya balu maguwumon mu te,
35 nononga ikia nongomang ningi yumura te mu wetang te aratukko. Se ni, batir te gemang bataguruko iwita gemang batagukkowo.” Simeon den imitang Maria maonam.

36 Se tom mu te prophet imet bo agotala bagaram, ko nup Anna. Nu Asher ko gue te, kari Phanuel ko nanawus. Nu kari tam yar 7 ilak baga kari kueram, 37 se nu gerewa baga laga ko yar 84, nu garuk nunguningkiri. Nu tom suen biya temple ningi lagakaso, na yu kaolam ale Kaem aru wosenga se bagakaso, turom woremkalal am butata Kaem nup patawu se baga lagakaso. 38 Tom mu te nu karogo nongote aratam kuriang arigam amilmilaram ale Kaem nup patowaram. Ale Jerusalem kariimet Kaem nunga sangukko wore ko kimi bitangaman mu nu kuriang ko nunga manaru gurugukaso.

Nuetnuam kuriang ilak peleman Nazareth namaman

39 Se Joseph Maria ilak mel suen la Kari Biya ko Law Den te balam iwitata bita sapaman, ale peleman Galilee ningi nunga wonong te Nazareth namaman. 40 Se kuriang lagaram sail tam, ale ikia yawara kumik ago terong mam. Se Kaem marak sokel tuikaso.

Jesus kuriang kulak gotek ta temple ningi namaram, ale kari bibiya isa nungaram

41 Jesus ko nuamnuet yar suen biya te Passover ko tom biya mu nuna Jerusalem namakasan. 42 Se Jesus ko yar mu 12 se nuna pempem te bitakasan butata Jerusalem namaman. 43 Udagi Passover ko tom kutuwam se nuna peleman nunga wonong te namakasan. Bare kuriang Jesus mu nu am Jerusalem bagakaso, se nuamnuet nu mu te bagaram mu me ko ikiman.

44 Nuna ilagala kariimet motam biya mu arungu aolak iluwakasan, ale nuna ikiman mu nu kuriang saki arungu maingkala namawoso ko ma balman, ale woremkalal mu nuna am namaman. Asele udagi nunga launuria sikisaki nunga ningi loagaman. 45 Bare me aringiman. Ale aking peleman Jerusalem namaman sor gi geragakasan, bare me aringiman tala. 46 Ale animan ukiram tom ilagala suwan mu te nama temple ningi bagaram se ari gilingiman. Nu kausa kari bibiya nunga ningi daigam ale nunga den iki se nunga isaru se bagakaso. 47 Se kariimet ko isa koma betera mu aringiman, ko ikia aringiman, ale nu ko ikia nunga moakaso. 48 Se nuna ilagala nama nu aringiman ale ninguru biririkiman. Ale ko nuam nu maonam, “Kuriang,” mam, “ni awuk se ana ilagala buta nanga beterem a?” mam. “Ani ka niet ilak ni ko ko naneman sisiram se nika loaga lagaman.”

49 Bare nu nunga isuam, “Nina anape ko aninga sor gi lagaman? Nina me ikisan e? Ani aga Ba ko kawam ningi bagirikko.” 50 Bare nuna ilagala nu den balam mu ko duap me ikiman.

51 Se nu arungu peleram Nazareth namaram ale tom suen biya nuguring karo se bagakaso. Se noko nuam den mu suen biya gomang ningi la bita saparam, ale ko ikia to se bagakaso.

Se Jesus lagaram, ale ko ikia ago la lagaram yawarakala. Se Kaem arikaso ale ko kuakaso. Se kariimet ago la arikasan ko kuakasan ale amilmilakasan.

52 

Copyright information for `WSK