Luke 23

Nuna Jesus Pilate moke te den ningi beteman

(Mat 27:1-2,11-14; Mark 15:1-5; John 18:28-38)

Asele nuna suen la barasaman Jesus diruwuman ilak Pilate kote namaman. Ale Pilate koma te den atumu nu la tuikasan, ale balukasan, “Kari imi nu Rome ko munan sokel ali ewere te aniso wore menawurokko ago kaeso! Mu iwita, mu nu Caesar takis me tunakko balukaso se ana ikikasan. Ale kariimet nongomang kulukurso ale balso, ‘Ani agata mu Kristus, se ani agata king,’ ma balso.”

Se Pilate den mu ikiam ale Jesus isuam, “Ni Juda nunga king e?”

Se nu balam, “Se ni ta balsam ta.”
Luke 23:3 Jesus Pilate moke te den ningo balam: 1 Tim 6:13.


Se Pilate den mu ikiam ale priest bibiya se kariimet motam biya animan mu nunga maonam, “Ani mel bo nu kumik te arigek ale ko nu den ningi bitirikko mu me arigem.”

Bare nuna am sail tagikasan ale balukasan, “Nu Judea ningi wonong wonong den balukaso se kariimet nongomang ninguru barasukaso. Nu Galilee ningi munan imi duap beteram ale karogo tai imi te aratam.”

Se Pilate den mu ikiam ale nunga isuam, “Kari imi Galilee kari e?” Se nuna nu manorman se ikiam, Jesus mu ta Galilee kari maman, ali batoga King Herod bitaruwaram wore ko kari. Buta se Pilate Jesus beteram se Herod kote namaram. Tom umu te mu Herod ago Jerusalem bagakaso.

Jesus Herod moke te sanamaram

Se Herod Jesus arigam ale ninguru amilmilaram. Nu ulengkala am ko den la ikiam, ale kam maiya biya arigokko ko kuakaso. Noko gomang Jesus kilek biya bo bitiruk se arigokko kuakaso. Buta se nu mel suen biya ko nu isarukaso. Bare Jesus noko den koma bo ta me balu tuam.

10 Se priest bibiya se Law Den ko kausa kari tai pingi ilak sanamaman, ale den aora garagar atumu nu kote bitakasan. 11 Se Herod ko kager kari ago nu bita maguwukasan ale gusia den manarukasan. Asele guang bo, ko bala yawarakala, wore taman nu tugu tuman, ale aking diruwuman ilak Pilate kote peleman namaman. 12 Tom ulengkala mu Herod se Pilate mu nuna ilagala nongomang suwanta me bagakasan. Bare aitak tom imi te nuna nongomang suwan awuman.

Jesus tam kangono te tagimonko Pilate balam

(Mat 27:15-26; Mark 15:6-15; John 18:39-19:16)

13 Se Pilate priest bibiya, kari supuling bibiya, se kariimet ago nunga auram se tai biguwuman. 14 Se nu nunga maonam, “Nina kari ewere diruwuman ilak aningate taiman, ale balman mu nu kariimet nongomang kulukurso ale Rome ko sokel menawurokko ago kaeso maman. Se ani nina nemetam te nu diram isem. Bare ani ikup ito, ko nina kari imi den ningi betesan wore ani me arigem. 15 Se Herod betela ikup bo me arigam tala, se aking nu beteram se ananangate peleram tairam. Kari imi ikup bo bitiruk se nina ko moral se kuerukko iwita mu nu me beteram. 16 Buta se ani balik se yam lilumomon ale betemon se namurukko,” ma balam. 17 
Luke 23:17 Batoga saki girakala batagorman mu te den imi ago aniso: Bare munan bo iwita anikaso: Pilate yar suen biya te Passover tom biya tai aratukaso, mu nu kari talipara ningi bagara wore bo balukaso se kutuwukasan se kariimet nongote pilakaso.


18 Bare kariimet suen la biyala aiman balman, “Kari ewere moar se kueruk se Barabbas kutuwu nangaruko!” maman. 19 (Barabbas nu ulengkala kari saki arungu Jerusalem ningi kager patowaman, ale Barabbas kari bo moram se kueram, owore ko nu talipara ningi beteman se bagakaso.)

20 Se Pilate ko gomang mu nu Jesus kutuwurok se yam aratuk namurukko, se nu akingtala kariimet nunga maonam. 21 Bare nuna am biyala aikasan balukasan, “Am tam kangono te tagiralko!” makasan.

22 Se aking Pilate udagi tala nunga isuam, “Awuk se nina buta balsan a? Kari imi anape memek beteram se ya? Ani ikup ito nu kumik te, se ko nu mora se kuerukko mu me arigem. Buta se balik se am lilumomon ale betemon se namurukko.”

23 Bare nuna am sail tagiman, ale biyala balukasan, “Ni balu se kari imi yam tam kangono te tagimonko,” ma balukasan. Ale sail tagiman Pilate ko den sokel menawuman. 24 Buta se nu nononga ikia la karo tuam, ale Jesus momonko mu ko den nungam. 25 Se Barabbas, kari kager patowaram ale kari bo moram se kueram se ko talipaman, mu kariimet ko balu lagaman se kari umutang kutuwu nungaram. Ale nononga ikia biya Jesus momon se kuerukko mu la karo nungaram.

Nuna Jesus tam kangono te tagiman

(Mat 27:32-44; Mark 15:21-32; John 19:17-27)

26 Se kager kari nuna Jesus iluman ilak namawa kari bo aringiman, mu ko nup Simon, nu Cyrene wonong ko kari bo. Aitakta diram tairam ale Jerusalem ningi kasu nagurokko negawaram. Se nuna iluman ale Jesus ko tam kangono giokko diruwuman, se giam karogo kowom karokaso.

27 Kariimet motam biya kowom karokasan. Se nunga ningi imet sang Jesus ko mo niakasan. 28 Bare Jesus punga geragam ale nunga maonam, “Nina Jerusalem imet, nina ani ago ko me malko,” mam. “Nina nengeta ninimi ko niaral malko, ale ninga kuriang agotala nunga ma niaralko. 29 Mu awuk, tom memek tai aratuk se kariimet iwita balmonko: ‘Imet kuriang me ilusan ale amin me tui gilingisan, se imet kuriang ilumonko me terong, mu nuna yawarakala!’ ma balmonko.
Luke 23:29 Luke 13:34-35; 19:41-44; 21:20-24.
30 Tom mu te nuna duruk se duruk dopang manarmonko, ‘Kaparal nanga ira muralko!’ ma balmonko.
Luke 23:30 Duruk ko den: Hosea 10:8; Rev 6:16.
31 Ikialko. Nuna aitak tam yu ago mu bita maguwusan. Buta se mu tam merang mu te awuk betemonko? Mu ninguru bita maguwumonkowo!”
Luke 23:31 Jesus den imi balam mu ko ikia iwita agila: tam yu ago balam mu nu kota numi ko balam. Nu memek bo me beteram bare nuna bita maguwukasan. Se kariimet memek beteman mu ninguru nunga bita maguwumonko / memek ninguru tamonko. CEV footnote “If this can happen to one who is innocent , what do you think will happen to one who is guilty?” i.e. much worse. / people who are guilty (i.e. the Jewish nation who rejected Jesus)


32 Nuna kari ilagala kilek memek beteman mu karogo nunga diruwuman Jesus ilak tam kangono te nunga tagimonko arungu namaman. 33 Se kuwim bo ko nup “Supuling ko Sokel” wore te arungu nama arataman. Kuwim umutang te Jesus tam kangono te tagiman. Ale kari ilagala mu agotala nu kumik duap te nunga tagiman, bo sengam ko, se bo ngas ko nunga tagiman.

34 Se Jesus balam, “Ba, ni nononga ikup siwurko,” mam. “Nuna mel betesan imi me ko ikisan,” ma balam.
Luke 23:34 Den saki girakala batagorman mu te den imi me aniso.
Se nuna kolakasan ale ko guang pagaru nunumi tuikasan.
Luke 23:34-36 Ko guang pagaru nunumi tuman: Psa 22:18. Den pelepel manorman: Psa 22:7-8; 69:21.


35 Se kariimet sanamaman mu am ari se bagakasan. Se Juda kari supuling alo kumik ko den dolara iwita nunumi manarukasan, “Nu kariimet sikina nunga sangarukaso. Se nu kota Kristus se Kaem ura nu balu tuam agi mu te kota numi sangukko!”

36 Se kager kari agotala nu den pelepel manarukasan. Nuna kote pingi taiman ale waen seselak tumonko negakasan, 37 ale balman, “Nunguningta ni Juda nunga king agi mu, keta nimi sangaruko!” maman.

38 Se den bo supuling ko kualala bataguru beteman se anikaso mu iwita: IMI MU JUDA NUNGA KING.

39 Se kari ilagala ago nu kumik duap te nunga tagiman mu bo gusia den iwita Jesus maonam, “Ni Kristus e?” mam. “Buta mu ni keta nimi sangaru ale ana ilagala ago nanga sangaruko!” mam.

40 Bare ko bo mu den umu ikiam ale nu ining tuam, ale iwita balam, “Ni Kaem ko me nguangasam e? Ni analak ikup taman wore turantala nu tam. 41 Bare ana mu memek beteman ale diram tala ko ikup taman. Bare nu mu memek bo me beteram bare ikup tam,” mam. 42 Nu uwuta balam ale aking Jesus maonam, “Jesus,” mam, “tom ni king ko aratu, mu ni ani ago ko ago kamin tugumko,” mam.

43 Se Jesus nu maonam, “Ani den nunguning ka manorsam, aitakta imitang ni ani agarak paradise ningi baganakko.”
Luke 23:43 Paradise: 2 Cor 12:2,4; Rev 2:7.


Jesus kueram

(Mat 27:45-56; Mark 15:33-41; John 19:28-30)

44 Worem motam tai dirmam, 12 o'clock, mu sor koma umutang lilim la tiromorom iram, nama worem motam 3 o'clock bainga ningi. 45 Se guang aromemek temple ningi kekawaram mu kusumuri barakam ale biling ilagala aratam.
Luke 23:45 Guang biya: Exodus 36:35; Heb 9:2-3, 6-8.
46 Asele Jesus biyala airam ale balam, “Ba, aninga adera ni kiting te betesam,” mam.
Luke 23:46 Psalm 31:5.
Nu iwita balam mu eng kueram.

47 Se kager kari nunga supuling mel aratam mu arigam, ale Kaem nup patowaram ale balam, “Nunguningta nunguning,” mam, “kari imi kari ningo diram!” 48 Se kariimet mel mu aringimonko taiman bagaman mu nuna mel suen la aratam mu aringiman, ale nongomang batagam, se nongomang motam iluman ale peleman uningi namaman. 49 Bare Jesus ko sikisaki, se imet sang agotala nuna Galilee sor te nu kowom karoman ilak taiman, mu nuna awar nuam sanamaman, ale mel aratukaso mu ari se bagakasan.

Nuna Jesus ko kumik guang manga mutim ningi tuguman

(Mat 27:57-61; Mark 15:42-47; John 19:38-42)

50 Kari bo bagaram, ko nup Joseph. Nu kari ko munan ningo diram. Nu Sanhedrin ko kari bo tala. 51 Bare nu kari supuling saki nunga ikia Jesus bita maguwumonko balukasan, wore nu arungak me balukaso. Nu Arimathea kari bo, Arimathea mu Judea sor ko wonong gotek bo. Ale nu Kaem ko kingdom tairukko wore ko kimi bitakaso.

52 Kari nukung mu Jesus ko kumik guang taukko, se Pilate isaru arigokko kote namaram. 53 Se Pilate aing mam asele nu namaram Jesus kumik guang kutuwuram ago kaparam, guang bo te isi gurugam, ale ago nama manga gogong ningi beteram. Kuwim ningi beteram mu manga biya bo gogong barukuman ale naung nunguru beteman, ale ulengkala kari kuera bo ta ningi me beteman, yam aniram, wore ningi beteram. 54 Tom mu nononga Sabbath mel nunga ko tom.
Luke 23:54 Mu anananga Friday, se worem nama kapuruk mu Sabbath duap bitirukko, se Juda alo ura te me tamonko (23:56).
Se Sabbath duap betera ko tom pingi aram.

55 Se imet Galilee sor te Jesus kowom karoman ilak taiman, mu nuna Joseph kowom karoman ilak nama kuwim Jesus te beteram mu aringiman. Ale Joseph Jesus ko kumik guang aguwaya beteram mu aringiman tala. 56 Asele peleman nunga sor te namaman. Ale melmasak siring yawara yawara se yu gureng karogo Jesus kumik te sapomonko mu nungurman. Bare aking Sabbath tom tala, se munan biya balam owore karo tuman ale nonoman sapakasan.

Copyright information for `WSK