Luke 4

Satan Jesus ira arigam

(Mat 4:1-11; Mark 1:12-13)

Jesus Korang Bur kumik ago terong mam. Se nu Yu Jordan beteram pilawa se Bur nu tam ilak sor garagarayam mu te namaram. Se tom 40 mu te bagaram, se Satan taikaso nu ira arikaso. Jesus tom 40 mu ningi na bo me nokaso, ale nukum te na ko kueram.

Se Satan nu maonam, “Ni Kaem ko Namar agi mu, manga imi manaru se inang ko geraguk se noko.”

Bare Jesus noko den koma balu tuam, “Kaem ko batoga bo iwita baluwoso: ‘Inang te la kariimet marak me bagasan.’”
Luke 4:4 Deuteronomy 8:3.


Se Satan tam ilak duruk bo te nama tarigiram ale tairate ali sor kariimet te anisan mu suen la Jesus kausam, ale maonam, “Mel suen biya imi ani ni kisek se bitaru se nip ago te bagerko,” mam. “Mel imi maingkala aninga, se aninga angamang kari awiriya tuekko mu am tuekko. Ni aninga adeleng duap ningi bugura kulukuru ale aninga aip patawur, mu mel suen biya imi ni kisekko,” ma balam.

Bare Jesus den koma nu maonam, “Kaem ko batoga bo iwita baluwoso, ‘Ni Kari Biya la nup patawur ale kuring karo tuiko. Nu nika Kaem.”
Luke 4:8 Deuteronomy 6:13-14.


Se aking Satan Jesus tam ilak Jerusalem namaram, ale temple kawam ko gul kalel biya wore te ilak tarigiram ale maonam, “Ni Kaem ko Namar agi mu, ni imi te ting palage ale nama aliti kaparko. 10 Mu awuk, Kaem ko batoga bo iwita baluwoso: ‘Kaem noko engel nunga manuk se ni ninguru ka sinar tamonko. 11 Nuna nuguting te ka ilu gurugumon se manga bo me siwik morukkowo.’”
Luke 4:11 Psalm 91:11-12.


12 Bare Jesus den koma balu tuam, “Kaem ko batoga bo iwita baluwoso, ‘Ni Kari Biya me ira arikko, mu awuk, nu nika Kaem.’”
Luke 4:12 Deuteronomy 6:16.


13 Satan mel suen biya te Jesus ira arigam, bare Jesus noko ira ariga mu te me dagulam. Se Satan nu beteram namaram ale kam udagi ko kimi bitawakaso.
Luke 4:13 Satan Jesus ira arigam: Heb 2:18; 4:15.


Jesus Galilee sor te ura duap beteram

(Mat 4:12-17; Mark 1:14-15)

14 Jesus peleram Galilee namaram, se Korang Bur ko sokel kumik ago terong mam. Se ko dugu duap pagam Galilee wonong suen la iki sapaman. 15 Nu geragakaso nunga synagogue ningi kapakaso den kariimet nunga manarukaso. Se kariimet suen biya noko nup patawukasan.

Nazareth alo nuna Jesus nubiring tuman

(Mat 13:53-58; Mark 6:1-6)

16 Jesus Nazareth namaram, noko wonong duap te lagaram wore te peleram namaram. Ale nu pempem bitakaso turan te, Sabbath tom te synagogue ningi namaram. Se den kaura ale apura ko kam mu te nu barasam ale nama gira sanamaram, 17 se nuna prophet Isaiah ko den, batoga patunga te aniram (scroll), wore to tuman se tam, ale urukuam nama den batoga gotek bo iwita balam wore arigam ale kauram:

18 “Kaem ko Korang Bur ani agarak bagoso.
Mu awuk, Kaem aga balam, ani den gilalong yawara kariimet kituwura guat mu nunga manikko mam.
Nu aga beteram se tairem mu ani kariimet talipara ningi anisan mu nunga manik se aratomonko.
Ale kariimet nomotam sisira mu nunga nungek se aking loagomonko.
Ale kariimet ikup memek giwasan wore nunga nungekko.
19 Ale balik, ‘Aitak tom ningo, Kaem te ninga sangukko owore tai aratam,’ ma balikko. Borta ko Ba aga beteram se tairem.”
Luke 4:18-19 Isaiah 61:1-2.

20 Jesus batoga gotek mu kau kutuwuram mu scroll kuruwuram, ale kari scroll bitaruwara mu tuam, ale den balukko daigam. Se kariimet suen la synagogue ningi mu nomotam am nu la arikuawuwakasan. 21 Asele nu den apura duap beteram, ale nunga maonam, “Kaem ko den imi aitakta ani kaurem se nina ikiman mu ko nunguning aitakta la kaparam,” ma balam.

22 Se nuna nu den baluwakaso wore ikiman, mu ko ikia yawarakala, yaman nuam, se biririka gilingiman, ale nup patawu gilingikasan. Bare agotala nungamin yenakaso tala, “Imi mu Joseph ko kuriang pa!” makasan. “Bare awuk ta se nu den owore balso ya?” makasan.

23 Se Jesus nunga maonam, “Nunguningta nunguning ani ninga manorsam, nina den imi aninga maonalko, ‘Doctor,’ mal, ‘ni keta nimi nunguruko! Munan ni Capernaum beterem se ana ikiman, mu munan borta iwitatala imi te ka wonong duap te bitarko!’ 24 Bare ani nunguningta ninga manorsam, prophet bo ta kota ko wonong duap te ko kariimet noko kuring ikimon karo tumonko me kuesan.

25 “Ikialko. Girakala, prophet Elijah ko tom te, Israel imet nunga kari kuera wore suen biya Israel anikasan. Tom mu te mu yar 3 se sige 6 tuwik me kapakaso se karak biya wonong suen biya te kaparam.
Luke 4:25-26 Prophet Elijah: 1 Kings 17:1-18:1; 2 Kings 5:1-14.
26 Bare Kaem Elijah maonam se Israel imet bo kote me namaram. Mena. Nu maonam se Zarephath, Sidon ko wonong gotek bo te namaram, imet bo ko kuari kueram se bagaram wore nu sangukko kote namaram.

27 “Aking butata tala, prophet Elisha ko tom te, kariimet lepra ago mu suen biya Israel anikasan. Bare Elisha nunga ningi bo me nungam se nungeman. Mena. Nu lepra kari Naaman la nungam, mu Syria kari wore nu nungam.”
Luke 4:27 Naaman mu kager kari nunga supuling bo. Elisha nu maonam, “Ni namar ale yu Jordan ningi tom 7 guruko,” mam, se butata beteram ale/se kumik nungeram: 2 Kings 5:1-14.


28 Jesus buta balam, se kariimet synagogue ningi bagaman mu den mu ikiman ale suen la ninguru nongomang magaram. 29 Se barasaman Jesus iluman tagiman, ale ilak Nazareth wonong duruk te wore te ilak tarigiman. Ale sapomon se nama duruk gomeng ningi dagulok ale kuerukko. 30 Bare Jesus nunga ningi aolak iluwam ale eng am namaram.

Jesus kari bo kumik ningi wit kaoram

(Mark 1:21-28)

31 Jesus Galilee sor ko wonong bo Capernaum te namaram, ale Sabbath tom te synagogue ningi kaparam ale kariimet den nunga kasurukaso. 32 Se nuna noko den ikiman ale ninguru tengeman. Mu awuk, noko den bur sokel ago nunguningkiri se.

33 Se kari bo synagogue ningi bagaram mu nu bur memek kumik ningi, se biyala airam balam, 34 “Jesus Nazareth kari,” mam, “ni ana nangate awuk me ko tairem? Ni anananga maguwurko tairem e? Ani nika ikisam, ni Kaem kote tairem, ni laili!”

35 Bare Jesus bur memek sokel ago maonam, “Ni kutek me ale kari sowore bitarko!” mam. Se bur memek mu nu kari mu sisupuram se nama nuna nomokete dagulam se eng nu beteram, bare me maguwuram, am namaram.

36 Se kariimet suen biya biririkiman ale nongota nunumi isarukasan, “Mu anape den? Nu bur memek den nunga manarso, bare kari nup ago se kari sail ago iwita nunga manarso, se nuna kuring ikisan ale kari nunga betesan namasan!” 37 Buta se Jesus ko nup pagam sor wonong mu te geraga saparam se ikiman.

Jesus Simon-Peter ko nome nungam

(Mat 8:14-15; Mark 1:29-31)

38 Jesus synagogue beteram ale Simon ko kawam te namaram. Simon ko nome kuera kumik kowar biyala ago aniwaram, se nuna Jesus isaru gilingiman, nu tairuk sangukko ma balman. 39 Se nu nama kumik duap te sanamaram ale kuera kowar mu maonam se kuera nu beteram. Se aitakta la imet mu barasam ale nononga na yu te nunga bitaru se arungu bagakaso.

Jesus kariimet kuera ikes ago mu suen biya nunga nungam

(Mat 8:16-17; Mark 1:32-34)

40 Worem nama kaparam sor baingam se kariimet nunga sikisaki kuera duap duap karogo mu nunga diruwuman arungu Jesus kote taiman. Se nu kuting nuna suwan suwan te nunga awuram ale nunga nungam se nungeman. 41 Se bur memek kariimet suen biya nungumik ningi mu nunga bita se, aikasan ale balukasan, “Ni Kaem ko Kuriang!” ma se namakasan. Bare Jesus nuguring kaolam. Mu awuk, nuna ikiman nu Kristus.

Jesus wonong sang te ura to to geragam

(Mark 1:35-39)

42 Sor ukiram se tumongola la Jesus wonong mu beteram ale sor bo kariimet mena mu te namaram. Se kariimet me aringiman, ale ko kupuman nama aringiman. Ale guramomon se yam arungu bagurukko kaeyakasan. 43 Bare nu nunga maonam, “Ani wonong sang te Kaem ko den gilalong yawara karogo apu apu geragikko,” mam. “Kaem ani ura borta bitirikko aga beteram se tairem,” ma balam. 44 Ale nu Judea ningi koma suen biya te geraga se synagogue ningi den balukaso.

Copyright information for `WSK