Luke 5

Jesus balam se Peter wal suen biya giam

(Mat 4:18-22; Mark 1: l6-20)

Tom bo Jesus Yu Gennesaret
Luke 5:1 Yu Gennesaret mu Yu Galilee ko nup bo.
norogen te bagaram se kariimet suen biya Kaem den ikimonko nu taluru guruguman ale bagakasan.
Se nu dal ilagala yu norogen te animan se arigam, wal tata kari dal mu bita gilingiman ale pote anu se animan. Se nu dal bo te aragam, umu Simon ko dal, ale nu Simon maonam, “Ni dal atumu diruwur se katirta yu tuagu te kasu namurukko,” mam. Ale nu dal te daigam ale den kariimet nunga manarukaso.

Nu den balu kutuwuram mu Simon maonam, “Dal wos iluwal yu tuagu te namanak ale ninga pote beteral se kapuruk se wal te gialko,” mam.

Se Simon aking nu maonam, “Kari biya,” mam, “turom luan maiya ana ura kowar beteman bare wal bo me taman. Bare ni balem se yam pote betenakko.” Ale nuna butata beteman ale wal suen biya iluman, wal suen biya nunguningkiri se pote batagukko kaeyakaso.
Luke 5:5-6 Wal suen biya giman: John 21:3-6.
Buta se nunga sikisaki dal bo te mu nunga aruman, taimon nunga sangarmonko. Se nuna taiman ale dal ilagala la wal tuguman se kuring aratam, se dal sarengomonko kaeyakasan.

Se Simon-Peter mel mu arigam ale Jesus ko suwik duap ningi bugura kulukuam ale balam, “O Kari Biya, ni aninga bitar ale namarko! Ani kari karur ago,” mam. Nu uwuta balam, mu awuk, nu ko sikisaki arungu wal suen biya giman mu aringiman ale ninguru biririkiman ale nguangakasan. 10 Zebedee ko kuriang ilagala James John ilak, dal bo te taiman nunga sangorman, mu betela wal nukung aringiman tengeman ale nguangakasan.

Se Jesus Simon maonam, “Ni me nguangerko,” mam. “Ni udagi te kariimet iwitatala nunga giko.”
11 Se nuna dal tagiman karogo saun te tarigiman, ale mel suen la awu beteman ale Jesus kowom karoman.

Jesus kari kumik laera posara wore nungam

(Mat 8:1-4; Mark 1:40-45)

12 Jesus wonong bo te bagaram se kari bo mu te karogo bagaram nu kuera laera posara kumik lilim terong mam. Nu Jesus arigam ale koma dugu te tara kaparam ale ngatangaram balam, “Kari Biya,” mam, “ni ka gemang buta aniruk agi mu, ni aga nunguruko terong mam.”

13 Se Jesus kuting garukuam kumik awete beteram ale balam, “Aninga angamang butata. Ni nungerko!” mam. Se aitakta la laera posara kuera mu mena saparam. 14 Se Jesus nu maonam, “Ni kari bo mel imi manaru se me ikiokko,” mam. “Am dirme priest kote namar ale kimik kasuru se arigokko. Asele Moses balam butata, ni kimik nungeram mu ko tama bita Kaem tui se kariimet te ka ikimon, ni aitak kimik nungeram mamonko.”
Luke 5:14 Leviticus 14:1-4.


15 Bare Jesus mel bitawakaso mu ko duap ninguru namaram sor tam. Buta se imikiri suen biya noko den ikimonko taikasan, nononga kuera nungokko karogo taikasan. 16 Bare tom suen biya mu nu sor kariimet mena wore te namakaso ale Kaem ilak munakakaso.

Jesus kari tilital bo nungam

(Mat 9:1-8; Mark 2:1-12)

17 Tom bo te Jesus kawam bo te kariimet nunga manaruwaram se Pharisee sikina se Law Den ko kausa kari sikina karogo dagi se animan. Nuna Galilee ko se Judea ko wonong wonong ago kasik biya taiman, Jerusalem ko ago tai gilingiman. Se Kaem
Luke 5:17 Greek den te nup Kurios (Lord) aniso.
ko sokel Jesus kote anikaso se nu kariimet nunga kuera te nunguruwakaso.

18 Se kari sikina kari bo pakapang te giman ilak taiman, kari mu tilital, sokelel kua muruwuram. Nononga ikia mu gimon ilak kasu nagumon ale Jesus kumik duap te betemonko. 19 Bare kariimet sor sisi sapaman, se nuna lage bo te ilak namomonko loagaman bare mena. Buta se nuna ilak kawam gul te tarigiman, ale kawam gul kuring beteman, ale kari pakapang ago mu garukuman se kariimet nunga kusumuri Jesus koma dugu te nama kaparam.

20 Se Jesus kari nanga kari tilital giman mu nunga nongomang ningi nunguning arigam, ale kari tilital mu maonam, “Aga bo, ani nika memek siwu warem.”

21 Se Pharisee kari se Law Den ko kausa kari den mu ikiman, ale nongota nunumi karogo munakakasan ale balukasan, “Kari ewere nu awuk nunguningkiri se Kaem kiaso ale den owore balso! Kari bo ta memek siwu warukko me terong. Mu Kaem kota mu memek siwura ikiso!”

22 Bare Jesus nononga ikia bitakasan owore ikiam, ale nunga maonam, “Nina anape ko ikia sowore nengemang te aniso? 23 Mel awuk bore ko betera ikup biya? Ani balik, “Ani ka memek siwurem,” maik, agi ani balik, “Bares am aolak ilupko,” maik, mu am balikko. 24 Bare Kari ko Kuriang ali imi te memek siwurokko sokel nukote terong mam, se nina te ikialko ...” umu te Jesus kari tilital mu maonam, “Ani nika manorsam, bares, ka pakapang gi ale ka sor te namarko!”

25 Se tairatela imikiri nomotam te kari mu barasam, ko pakapang giam ago ko sor te nama se Kaem nup patawu patawu namakaso. 26 Se kariimet mel mu aringiman ale suen la tengeman, ale Kaem ko nup karogo patawukasan. Nongomang uririkikaso se balukasan, “Ana munan imi kilimik ta aitakta aringiman pa!” makasan.

Jesus Levi auram

(Mat 9:9-13; Mark 2:13-17)

27 Udagi te Jesus aolak iluwam namawa se takis tata kari bo, ko nup Levi, mu ko ura kuwim te dagiwaram se arigam ale maonam, “Ni agowom karoko!” mam. 28 Se Levi barasam ale mel suen la awuram ale Jesus ilak namakaso.

29 Ale udagi te Levi ko kawam te Jesus ko na biya beteram. Se takis tata kari suen biya, se kari sang karogo tala dagiman ale arungu na no gilingiman.

30 Se Pharisee kari sikina, se Law Den ko kausa kari sikina, nuna Pharisee agotala, mu nuna Jesus ko olekem nunga nongomang magaram se nunga isarukasan, “Awuk se nina takis tata kari, se memek betera ko kari alo arungu na nasan a?” ma balukasan.

31 Se Jesus nononga den koma iwita balam, “Doctor mu kariimet kuera ikes mena mu nogo ko ura me beteso. Mena. Nu kariimet kuera ikes karogo mu nunga ura beteso. 32 Iwitatala, ani kariimet ningo diram mu nunga manik se giris palagomonko me tairem. Mena. Ani kariimet memek te dagulaman ale bagasan wore nunga manik se giris palagomonko tairem.”

Nuna na kaola ko munan ko Jesus isarman

(Mat 9:14-17; Mark 2:18-22)

33 Se nuna Jesus iwita manorman, “John ko olekem pempem na inang ko nuguring kalosan ale ngatanga gilingisan. Pharisee nunga olekem betela iwitatala betesan. Bare nika olekem mu nuna na no gi se yu no se yam anisan!”

34 Se Jesus den iram ale nunga maonam, “Tom kari bo nu imet iru tam ale noko sikisaki arungu bagoso, mu tom mu te noko sikisaki na namonko mu nuguring kalomon i?
Luke 5:34-35 Kari imet tam ko den: John 3:29.
Mena.
35 Bare noko tom tai aratuk se kari saki taimon nu tamon ilak namomon, se tom mu te asele ko sikisaki nongomang bataguk se na memon nuguring kalomonko.”

36 Jesus den ira bo karogo nunga maonam, “Kari ko guang iru mu ko kinikan sang barukuso ale guang gigira mu karogo me biriso. Mena. Nu buta bitiruk mu nu guang iru mu maguwurokko. Se betelatala, guang bilik iru mu se guang gigira mu nunga ariga me koma suwanta arukko. 37 Aking kari bo waen iru taso ale belelek guang gigira mu ningi me langiso. Nu buta bitiruk mu waen iru mu laga kapuruk se belelek guang barukuk se waen aliti kapurukko. 38 Bare mena. Waen iru mu belelek guang iru kumik galuguluk mu ningi langirukko.
Luke 5:38 Jesus munan iru ago tairam mu munan giringila ko mu ago me biguwuram. Munan iru: John 1:17; Rom 10:4; 2 Cor 3:6.
Bare ikialko. Kari waen gigira no lagara, mu nu waen iru me ko kuerukkowo! Mu nu iwita baluk, ‘Waen gigira mu asele yawarakala,’ ma balukko.”

39 

Copyright information for `WSK