Luke 7

Jesus Rome kager kari supuling bo ko ura kari nungam

(Mat 8:5-13)

Jesus den kariimet nungaru kutuwuram ale Capernaum namaram. Se kager kari supuling bo wonong mu te bagaram, noko ura kari bo kuera tam ale kuerukko katirta. Nu ko ura kari umutang ninguru ko kuakaso. Bare nu Jesus ko dugu duap ikiam ale Juda ko kari bibiya sang nunga auram se kote taiman se nunga maonam, “Nina namaral ale Jesus isaru arigal se tairuk ale aninga ura kari nungokko,” mam.

Se kari bibiya Jesus kote namaman ale den nunga maonam mu manaru gilingiman. Ale balman, “Kari anananga beteram se kete taiman mu kari yawara pa!” maman. “Nu ana Juda kariimet nanga kueso. Ale kota anananga synagogue kalo nangaram. Se ana ni nu sangaruko ko kuesan.”

Se Jesus arungu namaram. Ale tai kawam duap te pipingi aram.

Bare kager kari supuling mu noko sikisaki nunga maonam se Jesus den tumonko nama biguwuman ale balman, “Kari biya,” maman, “ni ura kowar me bitarko! Kager kari supuling mu ana iwita ka manornakko balam: ‘Ani kari ningo nuam se ni aninga kawam ningi utu nagurko iwita mena,’ ma balam.
‘Uwutata se' mam, 'ani nikete namirikko me terong se me nikete namerem,' ma balam. 'Bare te bagasam sumu te la baga se ura kari nungerukko den mu la balu se nungerukko,' ma balam. Ale mam, 'Ani betela,' mam, 'aga biya nuam bowa ningi bagasam,' mam, 'ale ani agata aga kager kari sang ani abowa ningi bagasan mu karogotala,' mam. 'Se ani bo manorsam, “Namarko!” masam mu namoso. Aking bo manorsam, “Tairko!” masam mu taiso. Se aking aninga ura kari bo manorsam, “Imi bitarko!” masam mu beteso.’ Se kager kari supuling mu ko den butata ka manornakko balam.”

Se Jesus den mu ikiam biririkiram. Ale giris palagam kariimet motam biya nu kowom karo se animan mu nunga maonam, “Ani ninga manorsam, Israel ningi kari bo ta kari imi turan tala gomang ningi nunguning sokel karogo ani me arigem!”

10 Se kari ari kager kari supuling nunga beteram se namaman mu peleman kawam te taiman, ale ura kari kuera ago bagaram mu nungeram se aringiman.

Jesus Nain kuriang kueram se mumam

11 Tom katirta se Jesus wonong bo te namaram, ko nup Nain. Noko olekem mu kariimet motam biya arungu nu ilak namaman. 12 Nu wonong ko lage korang biya duap te namawaram se nuna kari kulak bo kueram mu giman mutim tugumonko ilak aratu se animan. Kari kueram mu ko nuam noko kuriang kari suwanta diram wore kueram, noko kuari ulengkala kueram tala. Se wonong mu ko kariimet suen biya tala nu ilak aolak iluman aratukasan.

13 Se Kari Biya nu arigam ale ko gomang batagam se maonam, “Me mo nierko,” mam. 14 Ale nu pingi namaram, ale pakapang kari kueram mu te bagaram mu iluwam. Se kari pakapang giwaman mu sanamaman. Se Jesus balam, “Kuriang kulak, baresko!” mam. 15 Se kari kulak kueram mu barasu daigam, ale munakara duap beteram. Se Jesus kuriang mu ko nuam maonam, “Ka kuriang maragaram se bita kisisam,” mam.

16 Se kariimet suen la mel mu aringiman biririkiman ale nguanga se Kaem la nup patawukasan. Ale balman, “Prophet biya bo anananga kusumuri aratam,” maman. “Kaem ana noko kariimet nanga sangukko tairam,” ma balman.

17 Se Jesus mel beteram mu ko dugu duap Judea sor te se sor sang te betela pagam namaram.

Anuwa Kari John Jesus ko isa beteram

(Mat 11:2-6)

18 John talipara kawam ningi baga se ko olekem nuguring te mel suen la Jesus bitakaso mu ko den ikiam. Ale nu ko olekem ilagala nunga maonam, 19 “Nina Kari Biya kote namaral ale iwita nu isualko, ‘Kari tairukko balukasan ale ko kimi bita lagakasan borta ni ye, agi kari bo kigilik ko kimi betenakko ye?’ ma iwita nu isualko.”

20 Se nuna ilagala nama Jesus kote arataman ale isarman, “Anuwa Kari John ko isa iwita ni kisinakko nanga maonam se ago kete taiman: ‘Kari tairukko balukasan se ko kimi bita lagakasan borta ni ye, agi kari bo kigilik ko kimi betenakko ye?’ “ ma balman.

21 Tom umutang te Jesus kariimet suen biya kuera ikes duap duap karogo anikasan mu nunga nungurukaso se nungiakasan. Nu bur memek kariimet nungumik ningi mu nunga karokaso se kariimet nungiakasan. Se kariimet nomotam mena mu nunga nungurukaso se loagakasan. 22 Se nu John ko den koma olekem ilagala mu iwita nunga maonam, “Nina peleral namaral ale mel suen la nemetam te aringiman ale nedegewa te ikiman mu John maonalko: Kariimet nomotam mena mu aitak loagasan, se kariimet nusuwik tilital mu aolak ilusan. Se kariimet nungumik laera posara karogo mu aitak nungumik yawarakala geragasan, se kariimet nodogowa mena mu aitak den ikisan. Se kariimet kuesan mu aking maraga gilingisan, se den gilalong yawara mu kariimet nungumik mel mena nunga manorsan se iki gilingisan.
Luke 7:22 Isaiah giram balam iwitata, Messiah mu tairuk kariimet uwutata nunga sangukko: Isa 29:18—19; 35:5—6; 42:18; 43:8; 61:1.
23 Se kariimet ani ago ko nongomang ningi nunguning me namoso taiso, mu nuna amilmilomonko.”

Jesus Anuwa Kari John ko nup patowaram

(Mat 11:7-19)

24 Kari ilagala John kote peleman namakasan, se Jesus John ko dugu duap kariimet nunga manarukaso ale iwita balam, “Tom John ali sor garagarayam mu te bagakaso mu nina anape mel arigalko sor umutang te namakasan a? Agi ara duap suwanta daula sisuwuwakaso se nama taiwakaso wore arigalko namakasan e? Mena. 25 Agi kari bo guang yawara yawara kataram ale karogo bagakaso wore arigalko namakasan e? Mena tala! Kari guang yawara yawara katasan ale mel ningo ningo la karogo bagasan mu kawam bibiya yawara mu ningi anisan!

26 “Se nina anape mel arigalko namakasan? Agi prophet bo e? Se ani ninga manorsam, prophet umutang mu prophet suen la nunga kia saparam. 27 Mu prophet borta nukung ko Kaem ko batoga te iwita balam se aniso: ‘Ani aga kari bo bitirik se aninga den karogo girok namuruk ale ka lage nunguru burangi sagurukko,’ mam.
Luke 7:27 Malachi 3:1. Luke 3:2-6 ago arikko.
28 Ani ninga manorsam, John nu kariimet ali imi te bagakasan mu suen la nunga kia saparam. Bare kariimet Kaem ko kingdom ningi bagasan mu nunga ningi bo kituwura nup mena agi wore, nu mu John kiaram tala.”

29 (Kariimet suen la, manga tata kari agotala, mu Jesus ko den mu ikiman ale balukasan, “Kaem ko munan mu ningo diram,” makasan, mu awuk, nuna John kuting te anuwa taman. 30 Bare Pharisee alo se Law Den ko kausa kari alo mu nuna lage yawara Kaem nungaram mu nubiring tuman, ale John kuting te anuwa tamonko meman.)

31 Se Jesus aking balam, “Ani kariimet tom imi ko mu anape te nunga iwita balikko? Nuna anape turan a? 32 Mu nunga ariga mu iwita: kuriang gotektek iwitata wonong tuagu te dagisan ale nunga sikisaki nunga manorsan, ‘Ana bawe eleman wur amilmil ago iluman, bare nina me taiman iruman! Aking ana nangamang bataga ko wur iluman, bare betelatala nina me taiman nangarak niaman!'

33 “Mu awuk, Anuwa Kari John tairam ale waen me nokaso, ale tom sang na yu naukko kuring kalokaso. Se nina balman, ‘Nu bur memek kumik ningi aniso!’ maman.
Luke 7:33-34 John ko bagara aolak: Luke 1:15. Jesus ko bagara aolak: Luke 5:30; 15:2.
34 Se aking Kari ko Kuriang tairam ale kuring me kaolam, na yu waen am nowoso, se nina balsan, ‘Kari ewere arigalko!’ masan. ‘Nu na biyala naso, ale waen biyala naso tala.' Ale ‘Imi takis tata kari se memek betera ko kari alo nunga geraga suwan tala!’ ma balsan. 35 Bare iwita ikialko. Kaem ko ura kari alo nu kota ikia nunguning nungarso se te ura betesan, mu ura mu ko nunguning aratoso mu te arigal ale ko ikialko.”

Jesus Pharisee kari Simon ko kawam te namaram

36 Pharisee kari bo Jesus kote kawam te namuruk ale ilak na naukko den beteram. Se nu namaram kasu naguram ale daigam na nowaram. 37 Se imet bo wonong mu te bagaram mu nu lage luan imet. Nu Jesus Pharisee kari mu ko kawam te na naukko namaram mu ko den ikiam, ale namaram ko yu kuting bo, manga alabaster te nungurman ale yu gureng siring yawara mu ningi langi beteman se aniram mu giam ago tairam. 38 Ale ago nama Jesus suwik duap ningi bugura kulukuam daigam ale mononge biyala kapakaso se ko mononge Jesus suwik susuru te kaparam. Se kota ko mone mu iluwam ale Jesus ko suwik awete ko mononge kaparam mu kagaruwakaso. Ale Jesus ko suwik ilu kalakumu se siwu se, aking ko yu gureng siring yawara aniram mu tam ale ko suwik awete waram.

39 Se Pharisee kari mu mel mu arigam ale gomang ningi la balam, “Kari imi prophet nunguning ale mu, nu imet nu ilu ilu taso mu maingkala ko ikiam ale noko munan awukaya mu ago ko ikiam alewo!” makaso. “Imet imi mu lage luan imet pa!”

40 Bare Jesus kari mu iwita maonam, “Simon,” mam, “ani den bo ka manikko.” Se Simon balam, “Kari biya, am baluko.”

41 Se Jesus den ira bo iwita balam, “Kari ilagala nunga ikup kari suwanta kote aniram. Kari bo ko ikup mu manga silver 500, se bo ko ikup mu manga silver 50. 42 Nuna ilagala ikup kutuwumonko me terong. Se kari mu kota nuna ilagala nononga ikup nukote aniram mu kutuwuram. Se Simon, ni awuk ikisam? Kari ilagala imi nunga ningi, mu kari awuk ta mu kari umutang gomang biyala tuokko?”

43 Se Simon den koma iwita balam, “Ani iwita ikisam,” mam, “kari noko ikup aromemek se nu kutuwuram borta.”

Se Jesus balam, “Ni diram balem,” mam.
44 Ale nu koma gurugu imet mu tuam ale Simon maonam, “Ni imet imi arigisam e?” mam. “Ani nika kawam ningi utu nagurem, bare yu asiwik te anuwekko mu ni me aisem. Bare imet imi kota ko mononge te aninga asiwik anuwam, ale ko mone te kaogam. 45 Ni mu ani amilmil me aisem, ale agol me misikirem. Bare tom ani utu nagurem eng tai aitak, mu imet imi aninga asiwik am iluwam ale ilu kalakumu lagaram. 46 Ni yu gureng siring yawara mu aninga asupuling te me warem. Bare nu mu aninga asiwik yu siring yawara wore te palungam. 47 Buta se ani nika manorsam, nu gomang tawun biya ani aisam, mu te nina iwita ikialko, noko ikup suen biya wore ani siwu saperem. Bare kari bo Kaem ko ikup katirta siwurokko balso se siwu tuso, mu kari mu ko gomang katirta Kaem tuso.”

48 Asele Jesus imet mu maonam, “Ani nika ikup siwu saperem,” mam.

49 Se kari nu ilak wete na no se animan mu nongota nunumi manarukasan, “Kari ewere awiri se ikup siwuso ya?” makasan.

Bare Jesus imet mu maonam, “Nika gemang ningi nunguning te Kaem ka saongam. Se gemang lila te namarko.”

50 

Copyright information for `WSK