Mark 1

Anuwa Kari John den apuram

(Mat 3:1-12; Luke 3:1-9; John 1:19-28)

Imi Kaem ko Namar Jesus Kristus ko dugu duap yawara. Prophet Isaiah ko batoga mu te Kaem iwita ko Namar Jesus maonam:

“Ani kari bo bitirik se girok aninga den giok ago namuruk ale
nika lage nungok dingumurokko.”
“Ali sor garagarayam mu te kari bo ai baluwoso,
‘Kari Biya ko lage nungal dingumuralko,’ ma baluwoso.”
Mark 1:2-3 Malachi 3:1; Isaiah 40:3.

Se Anuwa Kari John aratam. Nu sor garagarayam mu te baga se kariimet nunga aru manarukaso, “Giris palagal ale anuwa tal se Kaem ninga ikup memek mu siwurokko,” makaso. Se Judea sor te ko kariimet, se sor mu ko wonong supuling Jerusalem ko kariimet ago suen la John kote namakasan ale nunga memek wetang te balukasan se nu Yu Jordan ningi nunga anukaso.

John nu prophet, se guang camel mone te nungurman mu katakaso, ale let biling bo luan kalokaso. Nu kutuwurek se honey buta nokaso.
Mark 1:6 John ko guang se ko na inang: 2 Kings 1:8; Zech 13:4.
Ale nu iwita kariimet nunga manarukaso, “Kari bo ani agowom kaoram taiwoso mu noko sokel mu aninga asokel kiaram. Ani noko ura dungan bitirik ale taririk ale ko doleng tuagu ko lakira ko mayang kutuwurikko me terong, mu awuk, ani noko bowa ningi aliti biya. Ani yu te ninga anusam. Bare nu mu Korang Bur te ninga anuwokko.
Mark 1:8 Bala bo mu iwita: “Nu Korang Bur biyala ningarukko.”


John Jesus anuwam

(Mat 3:13-17; Luke 3:21-22)

Se udagi Jesus Galilee sor te Nazareth wonong beteram, ale John kote tairam. Se John Yu Jordan te Jesus anuwam. 10 Se Jesus yu ningi kaparam aratu motam kualala loagaram duruk kuring kaigam se arigam, se Kaem ko Korang Bur inanganang biton iwita kote kaparam. 11 Se Kaem duruk te baga se airam balam, “Ni aninga Kuriang, ani ninguru ka kuesam. Aninga angamang ni ko ko amilmiloso.”

Satan Jesus ira arigam

(Mat 4:1-11; Luke 4:1-13)

12 Se Korang Bur tairate Jesus diruwuram se sor garagarayam mu te namaram, 13 ale tom 40 mu te bagakaso se Satan nu kote taikaso ale ira arikaso. Sor Jesus te bagakaso mu mel daong agotala te anikasan. Se engel tai nu sangarukasan.

Jesus Galilee batoga ningi ura duap beteram

(Mat 4:12-17; Luke 4:14-15)

14 Udagi King Herod mu John talipara ningi beteram. Se tom mu te Jesus Judea beteram ale Galilee namaram, ale Kaem ko den gilalong yawara apukaso. 15 Nu balukaso, “Aitak tom aram. Kaem ko kingdom tai pingi aram. Se nina giris palagal ale den gilalong yawara ko nengemang ningi nunguning arukko!”

Jesus kari ilagala ilagala kowom karomonko nunga auram se kowom karoman

(Mat 4:18-22)

16 Tom bo Jesus yu batoga Galilee norogen te aolak iluwa se Simon ko uria Andrew ilak pote sapawaman se nungarkam. Nuna ilagala wal tata kari. 17 Se Jesus nunga maonam, “Nina tairal ani agowom kaoral, se ani kariimet nunga gia ko munan ninga kausekko.” 18 Se nuna tairate nunga pote mel awuman ale ilak namakasan.

19 Se nu katirta aolak ilu nama Zebedee ko kuriang James ko uria John ilak dal te pote kulingaman se nungarkam. 20 Ale nunga auram, se nuna tairatela nunga nonet Zebedee ko ura kari ago dal te animan mu nunga beteman, ale Jesus ilak namakasan.

Jesus kari bo kumik ningi bur memek kaoram

(Luke 4:31-37)

21 Nuna nama Capernaum wonong te arataman baga se Sabbath tom te Jesus synagogue ningi namaram, ale kariimet den nunga manarukaso. 22 Se nuna noko den ikiman ale biririkiman, mu awuk, nu nunga kasurukaso bare nononga kausa kari den nunga kasurukasan wore iwita mena, noko den bur sokel ago.

23 Tom mu te kari bo synagogue ningi bagaram, mu nu bur memek kumik ningi karogo. 24 Se nu airam balam, “Jesus Nazareth ko,” mam, “Ni anananga te awuk meko tairem a? Nanga maguwurko e? Ani nika ikisam, ni Kaem kote tairem, ni laili!”

25 Bare Jesus bur memek mu den sokel ago maonam, “Ni kutek me ale kari sowore bitarko!” mam. 26 Se bur memek mu kari mu ninguru ita bilakaso, ale kuring biyala airam kari mu beteram. 27 Se kariimet suen biya kilek mu aringiman ale ninguru tengeman, ale ko nunumi isarukasan, “Bare anape ya? Kari imi ikia iru anananga kasurso! Noko den sokel ago! Nu bur memek nunga manarso se kuring karo tusan,” makasan. 28 Se noko nup mu tairate Galilee sor lilim la te geragam.

Jesus Peter ko nome nungam

(Mat 8:14-15; Luke 4:38-39)

29 Jesus ko saki arungu synagogue beteman arataman ale dirmaman Simon Andrew nunga kawam te namaman. James John mu nuna agotala ilak namaman. 30 Simon ko nome nu kuera kumik kowar biyala ago barim te aniwaram. Se nuna Jesus manorman 31 se kote pingi namaram kuting iluwam saongam se barasam, se noko kuera mu menaram. Se nu nunga bitaru se arungu bagakaso.

Jesus kariimet kuera ikes karogo mu suen biya nunga nungam

(Mat 8:16-17; Luke 4:40-41)

32 Turom bainga ningi kariimet nuna imikiri kuera duap duap ago bagara mu nunga diruwuman arungu Jesus kote taiman, sikina bur memek nungumik ningi anira mu ago la. 33 Wonong mu ko kariimet kasik biya tai kawam kuringi biguwuman. 34 Se Jesus kariimet suen biya kuera ikes duap duap ago mu nunga nungurukaso, ale bur memek suen biya nunga karokaso. Bur memek noko ikiman, se nu nuguring kaolam, nuna wetang te arumon nu Kaem ko Kuriang iwita balmon bore ko.

Jesus Galilee sor te ura bita geragam

(Luke 4:42-44)

35 Jesus aniwa ukira luan ago kawam beteram kaparam sor koma bo kariimet mena ipi mu te namaram ngatangakaso. 36 Se Simon ko saki arungu udagi barasaman Jesus kupuman ko loagaman namaman ari gilingiman, ale manorman, “Kariimet suen biya nika loagawasan,” maman.

38 Bare Jesus nunga den koma balam, “Bo la bagomon se. Ana wonong saki te agotala namanak se ani mu te den karogo balikko. Ani ura borta ko tairem,” mam. 39 Ale nu Galilee ningi sor suen biya te geragakaso, ale biguwura kawam ningi den balu balu geraga se, bur memek agotala nunga karokaso.

Jesus kari bo kumik laera posara nungam

(Mat 8:1-4; Luke 5:12-16)

40 Tom bo kari bo kumik laera posara ago mu Jesus kote tairam, bugura patungam ale Jesus ilak wosengam ale balam, “Ni ka gemang buta aniruk agi mu, ni aninga nunguruko terong maem.”

41 Se Jesus kari mu ko gomang biyala batagam, se nu kuting garukuam ale kari mu kumik te beteram ale maonam, “Ani angamang butata. Ni nungerko!” mam. 42 Se tom mu te la kuera mu nu beteram se kumik nungeram. 43 Se Jesus kari mu bitiruk se namurukko se den aora biya maonam, 44 “Ikiko!” mam. “Ni kari bo mel imi manaru se me ikiokko. Ni dirme priest kote temple ningi namar se kimik kasuru se arigokko. Asele Moses balam butata, ni kimik nungeram mu ko tama bita Kaem tui, se kariimet te ka ikimon ni aitak kimik nungeram mamonko.”

45 Jesus buta balam. Bare kari mu nu namaram sor suen biya te Jesus nu nungam mu ko dugu duap balam. Se Jesus wetang te wonong ningi namurukko mu me terong. Nu sor kariimet mena mu te la bagakaso. Bare kariimet sor suen biya ko mu am nu kote tai biguwukasan.

Copyright information for `WSK