Mark 15

Nuna Jesus Pilate kuting te beteman se isarukaso

(Mat 27:1-2, 11-14; Luke 23:1-5; John 18:28-38)

Ukiram tumong biyala priest bibiya, se kari bibiya, se Law Den ko kausa kari, se Sanhedrin kari bibiya suen la mu aguwaya betemonko mu ko den nungurman. Ale Jesus kuting kaloman ale diruwuman ilak Pilate kote namaman.

Se Pilate Jesus isuam, “Ni Juda nunga king e?” mam.

Se Jesus balam, “Se ni ta balsam ta,” mam.

Se priest bibiya den suen biya te Jesus atumukasan.

Se Pilate aking nu isuam, “Ni ikiko, den kasik biya ni te ka atumusam. Se ni awuk se den koma me balsam a?” mam.

Bare Jesus den bo me balam.
Mark 15:5 Jesus den bo me balam: Isa 53:7; Mark 14:61; Luke 23:9.
Se Pilate ari bita ko, biririkiram ale ikia moakaso.

Jesus tam kangono te tagimonko Pilate balam

(Mat 27:15-26; Luke 23:13-25; John 18:39—19:16)

Yar suen biya te Passover ko tom te, mu kari talipara ningi anikasan mu kariimet kari awiriya ko balukasan mu Pilate kutuwu nungarukaso. Se yar mu te kari bo nup Barabbas ko saki ago kaola ningi bagakasan. Nuna ali supuling karomonko se kager patowaman ale kari saki nunga moman se kua gilingiman wore ko nunga talipaman se kaola ningi bagakasan. Se kariimet tai Pilate kote biguwuman ale isarukasan, nu munan pempem bitakaso butata bitirukko makasan.

Se Pilate ikiam kariimet suen biya Jesus ko kuakasan, se umutang ko priest bibiya noko nongomang magaram se Jesus nu kuting te beteman. Se nu kariimet nunga isuam, “Nenenga nengemang ani Juda ninga king kutuwu ningarikko e?” mam. 11 Bare priest bibiya kariimet nongomang atumuman ale nunga manarukasan, “Barabbas ko la Pilate maonal se kutuwu ningarukko,” makasan. Se nuna butata balukasan.

12 Se Pilate aking nunga isuam, “Se kari nina balsan Juda nunga king ma balsan mu la ani awuk maikko ya?” 13 Se nuna aikasan ale balukasan, “Tam kangono te tagiralko!” makasan.

14 Se Pilate nunga isuam, “Nu anape memek beteram se ya?” mam. Bare nuna am biyala aikasan ale balukasan, “Am tam kangono te tagiralko!” makasan.

15 Se Pilate kariimet nunga nuguring ko negeram ale Barabbas kutuwu nungaram. Ale balam se Jesus mayang whip te lilumaman. Asele tam kangono te tagimonko kager kari nuguting te beteram.

Kager kari alo gusia kilek Jesus kumik te beteman

(Mat 27:27-31; John 19:2-3)

16 Se kager kari mu Jesus diruwuman kawam biya mu ko dun sang nuna te bagara mu te ilak namaman, ale aiman se kager kari suen biyala taiman. 17 Ale nuna guang bo diriyam mu Jesus tugu tuman, ale mayang kore ago mu taman, ale lapik ko kereman, ale crown iwita supuling tuguman. 18 Asele den dolara iwita manarukasan, “O Juda nunga king, tom maiya biya bagurukko tawo!” makasan. 19 Ale yom kuting te supuling moakasan, kumik kuali katingikasan ale koma te nubugura patungurukasan ale nup patowara ko tuaturum bitakasan. 20 Nuna dolara tui kutuwuman, mu guang diriyam mu kutuwuman ale kota ko guang aking tugu tuman. Asele taman ale tam kangono te tagimonko ilak namakasan.

Nuna Jesus tam kangono te tagiman

(Mat 27:32-44; Luke 23:26-43; John 19:17-27)

21 Se Cyrene kari bo ko nup Simon, nu Alexander se Rufus nunga nonet, nu Jerusalem ningi namurukko taiwaram se aringiman ale Jesus ko tam kangono giokko iluman ale guguna tuman se giam ago namakaso.

22 Se nuna Jesus ilak sor bo ko nup Golgotha mu te namaman. Nup mu ko nunguning mu “Supuling sokel ko sor.” 23 Ale Jesus kumik yaman me te ikiokko nuna (yu) waen saki marasin myrrh masan mu karogo guruguman ale tuman, bare nu meram. 24 Se nuna Jesus tam kangono te tagiman. Ale ko guang kutuwu giman mu nuna pagaru tumonko se ko kola gilingikasan.
Mark 15:24 Nuna ko guang ko kolakasan: Psalm 22:18.


25 Mu turomola 9 o'clock Jesus tam kangono te tagiman. 26 Se duap aguwaya se nu moman mu ko den mu tam bilik te batagorman se supuling ko kualala tagiman se anikaso. Mu iwita balam, IMI JUDA NUNGA KING. 27 Se Jesus kumik duap te tere daong kari ilagala nunga tagiman, bo sengam ko tagiman, se bo ngas ko tagiman. 28 Se umutang te prophet Isaiah ko den bo ko nunguning aratam. Nu Jesus ko iwita balam: “Nuna nu tere daong kari nunga bo ko iwita beteman.”
Mark 15:28-29 Isaiah 53:12. Nuna den dolara tuikasan: Psa 22:7; John 2:19.


29 Se kariimet nama taikasan mu nuna ari se nusupuling sisuwukasan ale den dolara tuikasan, “Aha,” makasan, “ni kari ewerta temple parasuwur ale tom ilagala suwan te aking kaloko ma balem e?” makasan! 30 “Aria, buta se keta nimi sangaru to ale tam kangono bitar ale kaparko!” makasan.

31 Se uwutatala, priest bibiya, se Law Den ko kausa kari bibiya nuna agotala Jesus gusirukasan, ale nu te ikiokko nongota nunumi manarukasan, “Nu saki alo nunga saongam, bare nu kota numi sangukko me terong uwoya!” makasan. 32 Ale balukasan, “Nu ana Israel nanga king agi, nu Kristus agi, mu aitakta ewerta tam kangono bitiruk ale tai kapuruk se aringinak ale ana ko nangamang ningi nunguning arukko!” makasan.

Se tere daong kari ilagala Jesus kumik duap te nunga tagiman, mu nuna agotala den memek nu tuman.

Jesus kueram

(Mat 27:45-56; Luke 23:44-49; John 19:28-30)

33 Worem motam tai dirmam, 12 o'clock, mu sor koma umutang lilim la tiromorom iram nama worem motam 3 o'clock bainga ningi. 34 Se 3 o'clock mu te Jesus biyala airam, “Eli, Eli, lama sabaktani?” mam. Se den balam mu ko duap mu iwita: “Aninga Kaem, aninga Kaem, ni awuk se aga bita taem?”
Mark 15:34 Psalm 22:1.


35 Se kari saki pingi sanamingaman mu aira mu ikiman ale ko iwita balman, “Ikialko, nu Elijah aruwoso!” 36 Se bo mu naguram namaram ale mel bo tam ale waen aora mu ningi mituwuram, yom kuting ko kopa te atumam ale Jesus misikirokko kore sumulak te bita se balam, “Me negeral se ana Elijah tairuk ale nu kutuwurok agi bare aringinakko,” mam.
Mark 15:36 Waen aora tuman: Psa 69:21.


37 Bare Jesus biyala nunguningkiri airam ale eng kueram. 38 Se temple ningi guang biya aromemek kuwim kako nunguningkiri mu te kaloman se kekawaram mu norogen kualala mu te baraka duap beteram, ale kapa nukum te kutuwa palagam ale biling ilagala aratam.
Mark 15:38 Temple ningi guang kekawaram ko den: Exo 26:31-33; Heb 10:19-20.


39 Se Rome kager supuling bo tam kangono bituam ago bagaram mu nu Jesus biyala airam ale kueram se arigam ale nu balam, “Nunguningta kari imi Kaem ko Kuriang!”

40 Se imet saki mu nuna awar nuam sanamaman ale ariwakasan. Nunga ningi mu Maria Magdala, Maria bo James
Mark 15:40 James imi mu James bo kumik kulak wore ko baluwoso. Maria Magdala ko: Luke 8:2-3.
Joses ilak nunga nunam mu se, James John ilak nunga nunam Salome mu buta nuna imet umu nunga ningi bagakasan.
41 Imet mu nuna tom Jesus Galilee ningi bagakaso mu te nu kowom karo karo se ilak laga se na mel te sangarukasan. Se imet saki agotala Galilee beteman ale Jesus ilak tai Jerusalem mu nuna agotala Golgotha taiman ale ariwakasan.

Nuna Jesus ko kumik guang mutim tuguman

(Mat 27:57-61; Luke 23:50-55; John 19:38-42)

42 Worem nama kapuruk mu Sabbath ko tom duap bitirukko. Se Sabbath tom me tai arata la mu melmasak te nunga ko tom. Se sor baingawaram se 43 Arimathea kari Joseph, nu Juda nunga supuling bo tala, Sanhedrin ningi nup ago, se nu agotala Kaem ko kingdom tairukko kimi bitawakaso, mu nu nguangara bo mena Pilate kote namaram ale Jesus kumik guang tam kangono te kutuwurok taukko isuam.

44 Se mu te Pilate Jesus maingkala kueram mu ko den ikiam ale biririkiram, ale ko nu kager kari nunga supuling tam kangono bitaruwaram mu ko den beteram se tairam se nu Jesus maingkala kueram agi mu ko isuam. 45 Se kager supuling balam, “Kueram,” mam. Se Pilate Joseph am namuruk Jesus ko kumik guang taukko maonam.

46 Se Joseph guang yawara bo siraram mu diaram, ale giam ago namaram, Jesus ko kumik guang kutuwuram, ale guang mu te isi gurugam, ale giam ago nama manga garap mutim biya bo nunguru beteman mu ningi beteram, ale manga bo ikup mu gurugam ago tai kuring te baguram. 47 Se Magdala imet Maria mu se, Maria bo Joses ko nuam mu nuna ilagala mutim Jesus ko kumik guang ningi beteram mu ago aringiman.

Copyright information for `WSK