Mark 16

Jesus barasam

(Mat 28:1-8; Luke 24:1-12; John 20:1-10)

Sabbath ko tom menaram se turom bainga ningi Maria ko wonong duap Magdala mu se, Salome se, Maria bo James ko nuam, mu nuna ilagala suwan gureng yu bo siring yawarakala nunguningkiri wore Jesus ko kumik guang te sapomonko diaman. Ale ukiram ubou tumong biyala, nuna ali motam te namaman. Ale lage te nama se nunumi manarukasan, “Awiri nanga sanguk ale manga mutim kuring te baguman mu gurugu due ko bitirukko ya?” makasan. Mu awuk, manga mu aromemek se ko buta balukasan. Bare nuna nama nomotam patawu manga mutim kuring te mu maingkala gurugu due ko beteman se aniram mu aringiman. Ale mutim ningi kapaman mu engel bo, ko ariga kari kulak iwita, nu guang siraram maiya biya wore tugumam ale nu kuting koma sengam mu te daigam ale bagaram se aringiman, ale ninguru biririkiman, ale nguangakasan.

Se nu nunga maonam, “Nina me nguangaralko!” mam. “Ani ikisam, nina Nazareth kari Jesus, nuna tam kangono te tagiman, wore nina arigalko taiman. Bare kuwim te beteman mu arigalko! Nu ewela me bagoso, maingkala barasam! Se nina namaral ale olekem suen la se Peter karogotala mu iwita nunga maonalko, Jesus maingkala giram Galilee namoso, se nuna Galilee namomon ale nu aringimonko, nu ulengkala nunga maonam butata.”
Mark 16:7 Olekem alo Galilee namomonko: Mark 14:28.


Se imet mu mutim beteman arataman biyala nguangakasan nongomang daung daung makaso se naguman namakasan. Bare nuna lage te kari bo den bo me manorman, mu awuk, nuna nguangakasan.

Jesus Magdala imet Maria kote aratam

(Mat 28:9-10; John 20:11-18)

Mark 16:9-20 QQQ Batoga saki girakala batagorman mu te verse 9 nama 20 mu me te aniso. (The book / the Gospel of Mark ends at verse 8 in the two oldest copies we have of the book.) OR: There are many copies of the book of Mark from early years. The two oldest copies do not have verses 9-20. ((Some copies have a different ending to the book.))
Jesus ubou tumong biyala barasam. Ale nu Magdala imet Maria kote giram aratam se arigam. Imet mu ulengkala bur memek 7 kumik ningi animan se Jesus nunga kaoram. 10 Se Maria namaram kari Jesus ilak geraga lagaman mu nongomang batagakaso se nia mo se animan mu nongote namaram, 11 ale nunga maonam, “Jesus marak bagoso, se ani arigem,” mam. Bare nuna den mu ikiman bare me ko nongomang ningi nunguning aram.

Jesus olekem ilagala wonong Emmaus namangaman se nongote aratam

(Luke 24:13-15)

12 Udagi olekem ilagala Jerusalem beteman ale aolak iluman namangaman se Jesus koma kumik gurugam ale nongote aratam arungu namakaso se aringiman. 13 Ale peleman namaman olekem sikina nunga manorman, “Ana Jesus aringiman,” ma balman. Bare nuna betela ilagala nunga den ko me nongomang ningi nunguning aram.

Jesus olekem 11 nongote aratam

(Mat 28:16-20; Luke 24:36-49; John 20:19-23; Acts 1:6-8)

14 Udagi olekem 11 dagiman na nowaman se Jesus nongote aratam, ale nuna nongomang ningi nunguning mena wore ko ining nungaram. Ale kariimet saki nu barasam se arikasan ale balukasan bare nuna nongomang ningi me nunguning akaso wore ko nunga maonam.

15 Nu iwita nunga maonam, “Nina ali sor suen biya te geragal ale den gilalong yawara kariimet suen biya nunga maonalko. 16 Se kariimet nongomang ningi nunguning aruk se anuwa tamon, mu Kaem nunga sangaru taukko. Bare kariimet nongomang ningi me nunguning aruk, mu nuna koma memek tamonkowo.

17 “Kariimet ani ago ko nongomang ningi nunguning mu Kaem sokel nungaruk se kilek saki ago betemonkowo: nuna aninga aip te bur memek nunga karomonko, ale den saki ulengkala nuna me te munakara wore te munakomonkowo. 18 Nuna urer nuguting te ilumon, ale yu no kuera mu namon, bare mel mu nuna memek me nungarukkowo. Ale nuna nuguting kariimet kuera ago mu nungumik te betemon se nungemonkowo.”
Mark 16:18 Urer ko den: Luke 10:19; Acts 28:3-6.


Jesus peleram Kaem kote duruk te namaram

(Luke 24:50-53; Acts 1:9-11)

19 Kari Biya Jesus nu olekem alo den nungaru kutuwuram asele Kaem nu aru tam se duruk te nama tarigiram ale Kaem kuting sengam mu te daigam bagoso. Se olekem alo namaman sor suen biya te den apukasan. Se Kari Biya nuna arungak se ura bitakaso, ale kilek kilek ago nuguting te bitakaso, kariimet aringimon ale te ikimon, olekem den balukasan mu nunguningta mamonko.
Mark 16:19-20 Kaem Jesus aru tam: Acts 1:9-11. Jesus olekem alo nunga ura saongam: Acts 14:3; Heb 2:3-4.


20 

Copyright information for `WSK