Mark 2

Jesus kari tilital bo nungam

(Mat 9:1-8; Luke 5:17-26)

Tom saki namaram se Jesus Capernaum aking namaram. Se kariimet nu kawam te bagakaso mu ko den ikiman ale nuna suen biya taiman biguwuman kawam mu naung terong mam. Se kawam kuring duap te betela kuwim bo ipi me aniram. Se Jesus den nunga manaruwakaso.

Se kari sang kari tilital bo sokelel mena mu pakapang te giman ale ilak taiman. Bare kariimet sor to muruwuman, se nuna ilak pingi Jesus kote taimonko me terong. Se nuna kawam gul te aragaman gul kuring beteman, ale kari tilital mu pakapang ago la mayang te kaloman ale beteman se Jesus koma te kaparam. Se Jesus nononga nongomang ningi nunguning arigam mu nu kari tilital mu maonam, “Aga bo, ani nika memek siwu warem,” mam.

Se Law Den ko kausa kari sang Jesus kumik duap te dagiman bagaman mu nuna den mu ikiman ale nongomang magaram, se nongomang ningi la balukasan, “Kari ewere awuk se nu buta balso? Nu Kaem kiaso ale den owore balso pa! Kari bo ta memek siwu warukko me terong. Mu Kaem kota mu memek siwura ikiso!”

Bare Jesus tairate nononga ikia mu arigam ale nunga maonam, “Nina anape ko ikia sowore nengemang ningi aniso ya? Mel awuk bore ko betera ikup biya? Ani balik ‘ani ka memek siwurem’ maik, agi ani balik ‘bares ka pakapang gi ago aolak ilupko' maik, mu am balikko. 10 Bare Kari ko Kuriang ali imi te memek siwurokko sokel nukote terong mam se nina te ikialko ....” umu te Jesus kari tilital mu maonam, 11 “Ni bares ka pakapang gi ago kawam te namarko!” mam.

12 Se kariimet suen la nomotam te kari tilital mu barasam ko pakapang giam aolak iluwam namaram. Se nuna ninguru tengeman, ale Kaem ko nup patawukasan ale balukasan, “Ana girakala mel bo iwita me aringiman!” makasan.

Jesus takis manga tata kari Levi auram

(Mat 9:9-13; Luke 5:27-32)

13 Aking udagi Jesus aolak iluwam yu batoga Galilee te langi namaram. Se kariimet motam biya nu kote taiman se nu Kaem den nunga manarukaso. 14 Aking aolak iluwam nama Alphaeus ko kuriang Levi, ko nup bo Matthew, nu takis tata kuwim te dagiwaram se arigam, ale maonam, “Ni ani agowom karoko!” mam. Se nu barasam Jesus ilak namakaso.

15 Udagi Jesus Levi ko kawam te na nokaso. Se takis tata kari, se memek betera ko kari alo mu suen biya olekem arungu Jesus ilak dagiman na no se animan. Mu awuk, kari nunga dugu duap buta buta mu suen biya Jesus kowom karokasan. 16 Nuna na nowaman se Law Den ko kausa kari saki, nuna Pharisee tala, mu nuna Jesus takis tata kari, se memek betera ko kari alo arungu na nowaram se aringiman, ale ko olekem nunga isarman, “Awuk se Jesus takis tata kari, se memek betera ko kari alo mu arungu na naso ya?” maman.

17 Se Jesus nononga den mu ikiam ale nunga maonam, “Doctor mu kariimet kuera ikes mena mu nogo ko ura me beteso. Nu kariimet kuera ikes ago mu nunga ura beteso. Iwitata, ani kariimet ningo nuam nunga me tairem. Ani kariimet memek te dagulaman ale bagasan wore nunga giekko tairem.”
Mark 2:17 Jesus kariimet nunga sangaru taukko tairam: Luke 19:10; 1 Tim 1:15.


Nuna na kaola ko munan ko Jesus isarman

(Mat 9:14-17; Luke 5:33-39)

18 Tom bo te Pharisee kari saki, Anuwa Kari John ko olekem arungu, nuna na inang namonko ko nuguring kaloman. Se kari saki taiman Jesus isarman, “Awuk se Pharisee nunga olekem, se Anuwa Kari John ko olekem na namonko nuguring kalosan, bare nika olekem buta me betesan a?”

19 Se Jesus den iram ale nunga maonam, “Tom kari nu iru imet tata se noko sikisika arungu bagoso, mu tom mu te noko sikisaki na namonko nuguring kalomon i? Mena. Nuna kari mu ilak na no se amilmil betemonko. 20 Bare ko tom tai aratuk se kari sang taimon ale nu tamon ilak namomonko, se tom mu te asele noko sikisaki nongomang bataguk se na namonko nuguring kalomonko.
Mark 2:20 Butata Jesus ko olekem arungu bagakaso se nuna ko amilmil bitakasan ale na namonko nuguring me kalokasan, am no gilingikaso.


21 “Kari bo guang iru mu ko bilik taso guang gigira mu te me biriso. Nu buta bitiruk mu guang bilik iru mu numi tagi tauk peleruk se guang gigira mu QQQ choose one for both books (not really done in MAT): akingtala barukuk mutim biyala bitirukko. / MAT aking eng biyala baraka sapurukko. 22 Se aking kari bo waen iru taso belelek guang gigira mu ningi me langiso. Nu buta bitiruk mu waen iru mu laga kapuruk, se belelek guang barakuk se waen aliti kapurukko. Bare mena. Nu waen iru taso ale belelek guang iru kumik galuguluk mu ningi langiso.
Mark 2:21-22 Jesus munan iru ago tairam mu munan girakala ko mu ago me biguwuram.


Jesus nu Sabbath tom ko Kari Biya

(Mat 12:1-8; Luke 6:1-5)

23 Sabbath tom bo te Jesus aolak iluwam ale inang wheat ko ningam ningi lage la namakaso. Se noko olekem nu ilak aolak ilu se wheat ko nunguning saki giman nokasan. 24 Se Pharisee kari Jesus manorman, “Awuk se nika olekem anananga munan den kiasan ale ura tasan? Aitak Sabbath ko tom, ura te me tanakko.”

25 Se Jesus nunga maonam, “Nina David kilek beteram wore ko dugu duap me kauman ikiman e? Tom nu ko sikisaki arungu na ko kueman ale bagakasan wore ko ani balsam. 26 Abaiata Priest Supuling bagakaso tom mu te David Kaem ko kawam sel ningi kasu naguram, ale priest maonam se bread Kaem tuman se aniram mu tam tuam se nam. Bread mu kaola biya. Priest la namonko. Bare David nam ale ko sikisaki karogo nungaram se naman.”

27 Jesus butata nunga maonam, asele balam, “Kaem giram kariimet nunga beteram, ale udagi Sabbath tom kariimet te nunga sangukko beteram. Nu kariimet Sabbath ko munan karo tumonko me nunga beteram. Buta se Kari ko Kuriang mu Sabbath tom ko Kari Biya,” ma balam.

28 

Copyright information for `WSK