Mark 3

Sabbath tom te Jesus kari bo kuting kueram mu nungam

(Mat 12:9-14; Luke 6:6-11)

Jesus aking synagogue ningi kasu naguram, se kari bo kuting kueram mu te ago bagaram. Se kari saki nuna lage bo aringimon ale te Jesus den ningi betemonko nongomang anikaso. Se nuna nu arikuawu se bagakasan, nu Sabbath tom te kari mu nungok agi mena agi wore ko ariwakasan.

Se Jesus kari kuting kueram mu maonam, “Bares tairko!” mam. Se nu barasam kariimet nomokete sanamaram.

Se Jesus aking Pharisee kari nunga isuam, “Munan awuk bore terong? Ana Sabbath kam te munan ningo betenak agi munan memek betenakko? Ana kari bo sangornak se yawarakala baguruk agi, memek te betenak se kuerukko?”

Bare nuna den koma me balukasan, am kutek maman.

Se nu kari suen biya nungarki gurugukaso, nunga nongomang aora biya, kari bo nongomang tumonko me terong, se nu nogo ko gomang magaram, ale aking nogo ko gomang batagakaso. Asele nu kari kuting kueram mu maonam, “Kiting dingumurko!” mam. Se kuting dingumuram se nungeram. Se mu te Pharisee kari alo barasaman arataman, ale namaman King Herod ko kari saki arungu biguwuman, ale Jesus momon se kuerukko ko den munakakasan.

Kariimet motam biya yu batoga duap te biguwuman

Jesus ko olekem arungu wonong mu beteman ale yu batoga Galilee te kapaman. Se Galilee kariimet kasik biya nu kowom karoman. Se kariimet saki Judea sor ko mu se, Jerusalem wonong biya, Idumea sor ko, yu Jordan komasang te, Tyre wonong, se Sidon wonong ko mu kasik biyala tala Jesus mel bitakaso mu ko den ikiman ale kote taiman.
Mark 3:7 Galilee, Judea, se Jerusalem mu Juda alo te bagakasan. Idumea sor mu koma south mu te, awar nuam, se yu Jordan komasang te mu koma east mu te, mu Juda alo se sor saki ko kariimet te bagakasan. Se Tyre se Sidon wonong mu koma north-west mu te se sor saki ko kariimet te bagakasan.


Se Jesus ko olekem nunga maonam, “Kariimet motam biya taiman anisan. Ale aninga kiti tugumon bore ko dal bo tairuk se ani te aragikko,” mam. 10 Mu awuk, nu kariimet suen biya nunga nungurukaso, se kariimet kuera ikes ago mu nuguting kumik te betemon se nungumik nungerukko nunumi diruwukasan tai nu kote sorakasan. 11 Se kariimet bur memek nungumik ningi anikasan mu Jesus arikasan tai kote doleng duap ningi dagulukasan, ale arukasan, “Ni Kaem ko Kuriang!” makasan. 12 Bare nu den aora biya nunga maonam, noko nup mu wetang te me balmonko mam.

Jesus den gilalong kari 12 nunga balam

(Mat 10:1-4; Luke 6:12-16)

13 Jesus duruk motongar te nama aragam baga se, kota ko ikia te kari nunga aurok se nukote namomonko ikiwakaso mu nunga auram se kote namaman. 14 Se nu kari 12 nunga balam, nup apostle nungaram, ale nunga maonam, “Nina ani agarak bagaralko kuesam,” mam. “Se ani ninga awurek se namaral kariimet den gilalong yawara nunga maonalko. 15 Ani bur memek te nunga kaoralko sokel ningarikko,” mam.

16 Se kari 12 nunga nunup mu iwita: Simon. Se Jesus ko nup bo beteram Peter mam. 17 Se Zebedee ko kuriang James John ilak. Se Jesus nunup iru beteram, Boanerges mam. Nup Boanerges mu ko nunguning “pure ko kuriang”.
Mark 3:17 Nuna ilagala nunga nongomang magara tairate agila, pure paga kam, se Jesus nunup iru beteram “pure ko kuriang” mam. Nunga namara taira ... wuli ago?? Mark 9:38; Luke 9:54.
18 Se Andrew, Philip, Bartholomew, Matthew, Thomas. Se Alphaeus ko kuriang James, se Thaddaeus, se Simon Zealot.
Mark 3:18
19 Se Judas Iscariot, mu nu udagi te Jesus kager kari nuguting te beteram. Mu kari 12 butata.

Nuna balukasan Jesus Beelzebul ko sokel te ura beteso makasan

(Mat 12:22-32; Luke 11:14-23; Luke 12:10)

20 Jesus kawam te namaram bagakaso. Se kariimet kasik biya akingtala kote biguwuman. Se nu ko olekem arungu na namonko tom mena. 21 Se Jesus ko nuam se ko uria mitak nuna den mu ikiman ale Jesus tamonko taiman. Mu awuk, kariimet saki noko balukasan, “Jesus ko ikia ngualoso,” makasan. 22 Se Law Den ko kausa kari saki Jerusalem beteman tai kapaman mu noko balukasan, “Nu bur memek nunga supuling Beelzebul nu kumik ningi bagoso, se borta ko sokel te nu bur memek nunga karoso,” makasan.
Mark 3:22 Satan ko nup bo Beelzebul.


23 Se Jesus nunga auram se pingi taiman se den ira sikina nunga maonam. Nu balam, “Satan kota ko saki nunga karuk i? Mena! 24 Ali sor bo ko kariimet papak mamon motam ilagala nunumi ago kagermon, mu ali sor umutang mu sokel ago me bagurukko, mu dagulokko. 25 Aking kari gue suwan nunumi ago kagermon, mu nuna betela sokel ago me bagomonko. 26 Se butatala, Satan ko ura kari nongorak kageruruk nunga karuk, mu nu sokel ago me sanamurukko, mu nu dagulokkowo!

27 “Bare imi ago ko ikialko. Kari bo kari sokel ago mu ko kawam te kasu nagurok mel giokko, mu nu girok kari sokel ago mu mayang te talipa bitiruk umutang asele nu noko kawam te mel suen la giokko.”
Mark 3:27 “Kari sokel ago” maso umutang Satan. Bare Jesus noko sokel kiaram. Nu Satan talipa beteram iwita, ale ko bur memek nunga karokaso.


28 Jesus balam, “Ani nunguningta ninga manorsam, Kaem kariimet nunga den memek se nunga memek duap duap betesan mu siwurokkowo. 29 Bare awiriya Kaem ko Korang Bur balu maguwuso, mu Kaem kari mu ko memek mu me ta siwurokkowo. Mena. Memek mu tom suen biya kari mu kumik te am anirukkowo.” 30 Jesus buta balam mu ko duap iwita: Nu Korang Bur ko sokel te ura tokaso, bare nuna kawelakasan ale balukasan, “Jesus bur memek ago,” makasan.

Jesus ko nuam se ko uria mitak

(Mat 12:46-50; Luke 8:19-21)

31 Tom mu te Jesus ko nuam se ko uria mitak taiman kawam duap te sanamiwa se Jesus kote den beteman se namaram. Nononga nongomang nu nongote tairukko. 32 Kariimet suen biya kawam ningi dagiman nu ilak baga se bo nu maonam, “Ikiko,” mam. “Nika niam, se ka uria mitak taiman matangi sanami se nika arusan,” mam. 33 Se Jesus isuam, “Kariimet awuk bore aninga ayam aninga uria mitak a?” mam. 34 Ale nu kariimet dagiman talurman mu nungarkam gurugam ale balam, “Arigalko! Aninga ayam, aninga uria mitak arungu dagiwasam!” mam. “Kariimet Kaem ko kuring karo tusan mu nuna aninga uria mitak, aninga agoras ari, aninga ayam alo.”

35 

Copyright information for `WSK