Mark 4

Kari na muguri ningam te waram ko den ira

(Mat 13:1-9; Luke 8:4-8)

Tom bo Jesus aking yu batoga Galilee norogen te kariimet den nunga kausa duap beteram. Bare kariimet suen biya nu kote biguwuman sor sisi saparam. Se nu dal bo te aragam daigam ale katirta yu tuagu te kasu namaram baga se kariimet matangi saun te biguwuman bagakasan se den nunga manarukaso. Ale nuna te ikimonko den ira suen biya nunga manarukaso.

Nu iwita balam,
“Nedegewa gurugal ikialko! Kari bo ko ningam te na muguri warukko namaram. Ale aolak iluwam nama se na muguri mu warukaso. Se saki lage te kapaman, se inanganang taiman naman. Se saki ali manga ago mu te kapaman, ale ali nunguning biyala mena, manga la, se tairate papak maman tarigiman. Bare ko yager mu kuringita ali guang la namaram, se worem bausam ale kaiyam se marakaman. Se na muguri saki mayang kore ago mu ningi kapaman papak maman. Se mayang mu tarigiman ale ereman se nunguning me kapaman. Bare na muguri saki ali ningo nuam mu te kapaman, mu tarigiman kalelaman ale nunguning kapaman. Saki nunguning ilagala nuam 30 iwita, saki nunguning suen nuam 60 iwita, saki nunguning suen biya 100 iwita.”

Jesus buta balam asele nunga maonam, “Nina nedegewa ago agi mu den imi ninguru ikialko!”

Jesus den ira ira balukaso ko duap

(Mat 13:10-17; Luke 8:9-10)

10 Kariimet biya parasaman se udagi Jesus ko olekem 12 se kari saki agotala nu den ira ira balam wore ko nunguning ko isarukasan. 11 Se nu nunga maonam, “Kaem nina nego ko ikiam ale ninga balam, nina ko kingdom ko duap aguwaya mu ko ikialko. Bare saki alo buring ko bagasan mu nuna den ira mu la ikimonko, ko nunguning me ikimonko. 12 Umutang te,

‘Nuna loaga lagomon bare mel bo me aringimonko.
Nuna den iki lagomon bare ko duap me ikimonko.
Buta se nuna me giris palagomon,
se Kaem nunga memek me siwurokko.’”
Mark 4:12 Isaiah 6:9-10.

Jesus na muguri ko den ira wore ko duap balam

(Mat 13:18-23; Luke 8:11-15)

13 Asele Jesus nunga maonam, “Nina den ira imi ko duap me ikisan mu nina den ira suen biya ko duap awuk ikialko? 14 Kari na muguri waram balem mu kari Kaem ko den saki alo nunga manarso wore balem. 15 Na muguri lage te kapaman mu iwita: Mu kariimet saki den ikisan, bare Satan tairate taiso nunga nongomang ningi den agu beteram mu kutuwu taso. 16 Se na muguri ali manga ago mu te kapaman mu iwita: Mu kariimet saki den ikisan tairate tasan ale ago amilmilasan. 17 Bare den mu ninguru me ilukuawusan, am tom katirta ago baga den mu ko nunga bita maguwusan ale ikup tusan mu tairatela patawu sapasan. 18 Se na muguri mayang kore ago mu ningi kapaman mu iwita: Mu kariimet saki den ikisan, 19 bare ali ewere ko bagara ko ikia nunga moso, ale manga biyala tamonko / nungumik manga mel ago bagomonko ko ikia tawun biya nongote aniso, se ikia duap duap agotala tagisan. Se nononga ikia umutang sail tagiso ale mayang kore ago mu iwita den ningo taman mu ereso menawuso. Buta se den nuna taman mu ko nunguning me kaposo.
Mark 4:19 Nangimik manga mel ago bagara: 1 Tim 6:9-10.


20 Bare na muguri ali ningo nuam mu te kapaman mu iwita: Kariimet saki den ikisan ale tasan ilukuawusan se nunguning kaposo, saki nunguning ilagala nuam 30 iwita, saki nunguning suen nuam 60 iwita, saki nunguning suen biya 100 iwita.”

Galep wetang te ituwura ko

(Luke 8:16-18)

21 Jesus aking nunga maonam, “Kari bo galep kasuruk ago tairuk, mu nu kani ningi agi barim bowa ningi bitiruk i? Mena. Nu galep mu kualala wetang te ituwurokko. 22 Mel suen la yumura te aniso mu wetang te aratukko. Den mel suen biya kari iramuram se aniram mu kariimet ko ikimonko. 23 Nina nedegewa ago agi mu, den imi ninguru ikialko!”

24 Jesus nunga maonam, “Den nina ikisan mu ninguru ko ikia talko! Nina munan kariimet nungarsan mu ko tuartala aking Kaem nina ningaruk kunasuruk se maiyukko. 25 Kariimet Kaem ikia nungarso se ilukuawusan, mu Kaem ikia sang udagi agotala nungarukko. Bare kariimet Kaem ko ikia nungaram mu me ilukuawusan, mu ikia katirta nongote aniso mu mena sapurukko.”

Na muguri papak maso tarigiso ko den ira

26 Jesus aking nunga maonam, “Kaem ko kingdom mu kari ningam ningi na muguri warso se kota papak maso ale tarigiso wore iwitata. 27 Turom woremkalal, kari mu aniwoso agi barasoso aolak iluwoso agi, bare mu na muguri mu papak maso ale tarigiwoso. Bare duap aguwaya se uwutata beteso mu nu ninguru me ko ikiso. 28 Mu ali kota ura beteso, se na muguri mu tarigiso nama nunguning kaposo. Motam motam gurek pagoso, ale tarigiso gawa beteso, ale tarigiso nama kaleloso mu gurek te nunguning beteso. 29 Se nunguning nama garukoso umutang gia ko tom, se kari nunguning batutumuso giso.”

Tam mustard ko muguri ko den ira

(Mat 13:31-32; Luke 13:18-19)

30 Jesus aking nunga maonam,

“Kaem ko kingdom mu anape mel te balik se ikialko?

31 Mu Kaem ko kingdom mu tam mustard mu ko muguri iwita. Tam mustard ko muguri mu gotektir nunguningkiri. Bare kari ningam te aguso, 32 se tarigiso ningam te tam suen biya nunga kiaso, se inanganang taisan ale tam mu ko kower te nunga singir moa gilingisan.”

Jesus den ira te la den apukaso

(Mat 13:34-35)

33 Jesus kariimet den ira iwitata suen biya nunga manarukaso, nunga ikia te iki iki den nungarukaso. 34 Nu den bo wetang te me nunga manarukaso, am den ira te la den apukaso. Bare tom olekem nongota ilak bagakasan, mu nu den ira suen biya ko nunguning wetang te nunga manarukaso.

Jesus daula gagi nunga maonam se kutek mam

(Mat 8:23-27; Luke 8:22-25)

35 Se tom mu ko bainga ningi Jesus ko olekem nunga maonam, “Ana yu batoga norogen komasang te nama kapanakko,” mam. 36 Se nuna kariimet biguwura biya mu nunga awu beteman, ale dal bo maingkala Jesus te aragam dagiwaram mu te aragaman, ale Jesus ilak namakasan. Kari sang dal saki te ago arungak namakasan. 37 Se daula biya urukuam ale gagi barasam dal mituwurokko ago kaeyakaso. 38 Bare Jesus maingkala dal nukum ko peleram supuling saen te beteram aniwaram. Se olekem alo nu mumurman ale balman, “Kari biya, ana sarenganakko katir aram bare ni me ikisam e?”

39 Se Jesus barasam daula gagi barasuwaman mu den sail ago la nunga maonam, “Nina kutek malko!” mam. Se daula kueram gagi kutek mam. 40 Se nu ko olekem nunga maonam, “Nina anape ko nguangasan? Ale nina awuk se ani ago ko nengemang ningi nunguning mena ya?” Se nuna ninguru biririkiman ale nongota nunumi isarukasan, “Kari ewere awiri ya? Nu balso se daula gagi noko kuring karo tusan!” Luke: Kari ewere awiri se nu gagi daula nunga manarso se kuring karo tusan a?” makasan.

41 

Copyright information for `WSK